Tijyolmatisej tlen sekinok kiyolmatij kiijtosneki “timoiljuisej tojuantij techpano tlen kinpano uan tijkuamachilisej tlen kiyolmatij”. Nopa tepajtijketl Rick Hanson kiijtoua “uelij tijyolmatij tlen sekinok kiyolmatij pampa kiampa techchijchijtokej”.

XIMOILJUI NI: ¿Kenke tojuantij uelij tijyolmatij tlen sekinok kiyolmatij uan tlapialmej amo? Pampa kej kiijtoua Biblia, toTeotsij techchijchijki kej itlachialis (Génesis 1:26). Nopa kiijtosneki uelis tijnextisej se keski kuajkuali tlamantli tlen toTeotsij kinextia. Yeka, kema se akajya kikuamachilia tlen sekinok kiyolmatij, kinextia kichiua kej Jehová, toTeotsij katli tlauel tetlasojtla uan katli kikuamachilia tlen tijyolmatij (Proverbios 14:31).

ToTeotsij nojkia moyolkokoua kema tojuantij titlaijiyouiaj uan amo kipaktia kema titlaijiyouiaj. Israeleuanij tlauel tlaijiyouijkej kema itstoyaj Egipto uan nojkia kema itstoyaj cuarenta xiuitl ipan uaktok tlali, yeka Biblia kiijtoua: “Ipan nochi inintlaijiyouilis yajaya nojkia tlaijiyouik” (Isaías 63:9). Uajka, toTeotsij amo san kimatiyaya itekipanojkauaj tlaijiyouiyayaj, ya nojkia kiyolmatiyaya tlen inijuantij kiyolmatiyayaj. ToTeotsij kiijtok: “Nikintlasojtla pampa tlauel tlaijiyouiaj” (Éxodo 3:7). Biblia techiljuia: “ToTeko kiijtoua para aki ueli tlen inmechkuatotonia [...] eltok keja kikokoua iixteyol sitlal” (Zacarías 2:8). Uajka, kema techtlaijiyouiltiaj, toTeotsij kimati kejuak ya kitlaijiyouiltiaj.

Biblia kiijtoua maske kemantika timoyolkokosej o timoiljuisej toTeotsij amo kinamiki ma techikneli, moneki tikilnamikisej “tlen toTeko kiijtoua tlen tojuantij ipati más tlen nopa tlen toyolo techiljuia, pampa yajaya kimati nochi tlen onka” (1 Juan 3:19, 20). ToTeotsij tlauel kuali techixmati uan amo kej tojuantij timoixmatij. Kimati tlake techpano, tlake timoiljuiaj uan tlake tijyolmatij, yeka kuali techkuamachilia.

 Biblia techiljuia:

• “Uan kema intechtsajtsilisej na, niinmoTeko, para ma niinmechpaleui, na nimantsi niinmechnankilis uan niinmechiljuis: ‘Nikaj niitstok’” (ISAÍAS 58:9).

• “‘Pampa na nijmati kuali nopa tlamantli tlen nijsenkajtok para inmojuantij’, kiijtoua toTeko. ‘Nijsenkajtok tlen kuali uan axtlen fiero, para nochi kisas kuali para inmojuantij teipa uan para inkiselisej tlen inkichiaj. Uan ipan nopa tonali inmojuantij inualasej inmomaijtosej ika na, uan na niinmechtlakakilis’” (JEREMÍAS 29:11, 12).

• “Nochi noixayo tijsentilijtok uan tikajoktok ipan se frasco. Uan ipan molibro tikijkuilojtok keski imiaka” (SALMO 56:8).

¿Uelis techpaleuis ma tikijiyouikaj kuesoli tlaj tijmatisej toTeotsij kikuamachilia tlen techpano? Ma tikitakaj tlen kipanok María.

“Tlauel nechyolkokok kema nikitak kenijkatsa notelpoka, katli kipixtoya 18 xiuitl, tlaijiyouik ome xiuitl pampa kipixtoya cáncer uan kenijkatsa teipa mijki. ¿Kenke kiampa kipanok? Nikualanki iuaya Jehová pampa amo tleno kichijki uan amo kichikajki.

”Nijmatiyaya Jehová amo nechikneliyaya. Kema panok chikuasej xiuitl, nikiljuik tlen nijyolmatiyaya se nouampo katli tlauel teiknelia, katli kuali tetlakakilia uan katli itstoya ipan notlanechikol. Se keski horas kuali nechtlakakilik uan kikajki ma nikijto nochi. Teipa nechilnamikilik se texto tlen nechyoltlalik: 1 Juan 3:19, 20, kampa kiijtoua ‘tlen toTeko kiijtoua tlen tojuantij ipati más tlen nopa tlen toyolo techiljuia, pampa yajaya kimati nochi tlen onka’. Uan teipa nechiljuik Jehová techkuamachilia kema titlaijiyouiaj.

”Maske nechyolchikajki, na nojua nikualaniyaya iuaya Jehová. Teipa nijpojki Salmo 94:19, kampa kiijtoua: ‘NoTeko, kema san nimoyoliljuia tlen miak kuesoli uan san ya nopa nijmati, ta tinechyoltlalia. Tinechchiuilia ma nimotemachi ipan ta uan tinechmaka pakilistli’. Ya nopa tlen nijnekiyaya nijkakis. Tlauel kuali nijyolmatki kema uelki nikiljuia Jehová tlen nechyolkokouayaya uan nimotemachik ya nechtlakakilia uan kikuamachilia tlen nijyolmati”.

¡Tlauel techyolchikaua tijmatisej Jehová kikuamachilia uan kiyolkokoua tlen techpano! Maske tijmatij ni, ¿kenke nojua onka miak tlaijiyouilistli? ¿Techtlatsakuiltia toTeotsij pampa tijchijkej se tlajtlakoli? ¿Asis se tonali kema kitsontlamiltis nochi tlaijiyouilistli? Ni tlajtlanili monankilis ipan sekinok tlamachtili.