Kema tijpouaj Eclesiastés 5:8, timoiljuiaj se ome tlamantli. Nopaya kiijtoua: “Intla ipan se estado ipan ni tlali tikitas para se rico [se tekichijketl] kitlaijiyouiltia se tlen teikneltsi uan axkichiuilia tlen xitlauak, amo ximosentlachili. Sejse tekiuejketl kipia seyok tlen kinauatia, uan tlen kinauatia ya nojkia kipia seyok tlen kitlachilia. Uan itstok seyok más uejkapa tlen nopa omej uan teipa itstok nopa ueyi tlanauatijketl”.

Tojuantij timaseualmej kuali tijkuamachiliaj ni pampa kiijtoua tlen nama kichiuaj tekichiuanij uan tlanauatianij. Tlen kiijtoua nopa texto nojkia technextilia se tlamantli tlen Jehová, uan tlauel techyoltlalia uan techyolchikaua tijmatisej nopa.

Eclesiastés 5:8 kiijtoua se tekichijketl kintlaijiyouiltia katli teikneltsitsij uan amo kinchiuilia tlen xitlauak. Nopa tlakatl moneki kiilnamikis itstokej sekinok katli nojua tlauel kipiaj tekitikayotl uan inijuantij kiitaj tlen kichiua. Uan uelis itstokej sekinok tlanauatianij katli nojkia kinyakanaj nopa tekichiuanij. Maske itstokej, uelis ipan ni tonali nochi nopa tekichiuanij amo kichiuaj tlen xitlauak uan yeka maseualmej tlauel tlaijiyouiaj.

Maske nopa kuesoli tlauel techtetsopa, nojkia timoyolchikauaj pampa tijmatij Jehová kintlachilijtok nochi nopa tekichiuanij uan tlanauatianij. Uelis chikauak tijtlajtlanisej Jehová ma techpaleui uan tijkauasej imako nochi tokuesol (Sal. 55:22; Filip. 4:6, 7). Kuali tijmatij “toTeko kintlachilijtok nochi tlakamej kampa ueli ipan Tlaltipaktli para kinnextilis iueyi chikaualis inijuantij tlen motemachiaj ipan ya ika nochi ininyolo” (2 Crón. 16:9).

Uajka, tlen kiijtoua Eclesiastés 5:8, techilnamikilia ni tlamantli: se tekichijketl amo moyakana iselti pampa itstok seyok katli kiyakana. Uan nojkia techilnamikilia seyok tlamantli tlen tlauel ipati: san Jehová tlauel kipia miak tlanauatili, amo aka seyok kej ya. Ipan ni tonali, Jehová kinauatijtok iKone Jesucristo ma tekichijto ipan toTeotsij iTlanauatijkayo. Jehová, katli kipia Nochi Chikaualistli uan kiita nochi tlen pano, tlanauatia ika xitlaualistli, uan iKone nojkia kiampa kichiua.