1. ¿Kenijkatsa kinamiki tikitasej Jehová?

JEHOVÁ kinpia itekipanojkauaj katli elij kej ichampoyouaj uan nochi kiueyichiuaj, kej Jesús, katli iachtouiKone, uan tlauel miakej iluikaeuanij (Col. 1:15; Sal. 103:20). Kema Jesús itstoya ipan Tlaltipaktli kinextik toTeotsij itekipanojkauaj ueliskiaj kiitasej Jehová kej ininTata. Se tonali kema itstoya ininuaya itokilijkauaj kiniljuik iTata Jehová nojkia eliyaya ininTata (Juan 20:17). Uan kema tijmaktiliaj Jehová tonemilis uan timoatsonpoliuiltiaj, toikniuaj elij kej tochampoyouaj (Mar. 10:29, 30).

2. ¿Tlake tikitasej ipan ni tlamachtili?

² Se keskij toikniuaj ouij kimatij kiitasej Jehová kej se Tetaj katli teiknelia. Uan sekij uelis amo kimatij kenijkatsa kinextisej kinikneliaj toikniuaj. Ipan ni tlamachtili tikitasej kenijkatsa Jesús techpaleuia ma tikitakaj Jehová kej toTata katli tlauel teiknelia uan nojkia technextilia uelis timonechkauisej iuaya. Nojkia, tikitasej kenijkatsa uelis tijchiuasej kej Jehová kema tiitstosej ininuaya toikniuaj.

3. ¿Kenke nopa tlajtoli “toTeko toTata” techpaleuia ma timonechkauikaj ika Jehová?

³ Jehová tlauel teiknelia. Yeka, Jesús kineki ma tikitakaj kej ya kiita: kej se tetaj katli tlauel teiknelia uan katli nochipa kineki iuaya ma timonojnotsakaj, uan amo kej se akajya katli san tlanauatijtok. Kiampa kinextik Jesús kema kinmachtik itokilijkauaj kenijkatsa momaijtosej, ya kiijtok: “ToTeko toTata” (Mat. 6:9). Maske Jesús ueltoskia kiijtos ma tijnojnotsakaj Jehová kej nesi ipan Biblia, kej “toTeko  Tlen kipia Nochi Chikaualistli”, Tlachijchijketl o “Tlanauatijketl tlen tlanauatis para nochipa”, ya kitekiuik se tlajtoli katli asi ipan toyolo, kej “toTata” (Gén. 49:25; Is. 40:28; 1 Tim. 1:17).

4. ¿Kenke tikijtouaj Jehová kineki ma timonechkauikaj iuaya?

⁴ Uelis se keskij toikniuaj kimatij ouij kiitasej Jehová kej se tetaj katli tlauel teiknelia, uelis pampa kema moskaltijkej tlaijiyouijkej. Yeka, tlauel techyolchikaua tijmatisej Jehová kikuamachilia tlen tijyolmatij uan kineki itstos tonechka. Biblia kiijtoua: “Ximonechkauikaj kampa toTeko uan yajaya inmechnechkauis” (Sant. 4:8). Jehová techiljuia san ya eli se kuali Tetaj uan tlauel techiknelia.

5. Kej kiijtoua Lucas 10:22, ¿kenke Jesús techpaleuia ma tijnechkauikaj Jehová?

⁵ Jesús uelis techpaleuis timonechkauisej ika Jehová pampa ya kuali kiixmati uan nojkia kinextia nopa kuajkuali tlamantli tlen iTata kinextia. Yeka kiijtok: “Yajaya tlen nechitstok, ya kiitstok noTata” (Juan 14:9). Jesús eli kej toikni katli achtouiejketl pampa techmachtia kenijkatsa tijtlepanitasej uan tijchiuasej tlen toTata technauatia, kiampa tijyolpakiltisej uan Jehová kuali techitas. Kema Jesús itstoya ipan Tlaltipaktli, kinextik Jehová kipia kuali iyolo uan tlauel teiknelia (xijpoua Lucas 10:22). Ma tikitakaj se keski neskayotl.

6. ¿Kenke tikijtouaj Jehová kena kitlakakilik Jesús kema momaijtok?

⁶ Jehová kintlakakilia ikoneuaj. Ma tikitakaj kenijkatsa tlauel kuali kitlakakilik iachtouiKone. Jehová nochipa kitlakakilik Jesús kema itstoya ipan Tlaltipaktli (Luc. 5:16). Jehová kitlakakilik kema kintlapejpenik nopa 12 apóstoles (Luc. 6:12, 13). Nojkia kitlakakilik kema tlauel moyoltekipachojtoya. Kema Judas nechka kitlauelkauaskia kiiljuik iTata ma kipaleui kiixnamikis nopa kuesoli. Jehová amo san kitlakakilik, ya kititlanki se iluikaejketl ma kiyolchikauati (Luc. 22:41-44).

7. ¿Kenijkatsa tijyolmati pampa Jehová mitstlakakilia?

 ⁷ Ipan ni tonali, Jehová nojkia techtlakakilia kema timomaijtouaj uan technankilia kema kinamiki uan ika tlen uelis techpaleuis (Sal. 116:1, 2). Kiampa kipanok se tosiuaikni katli eua ipan altepetl India. Ya tlauel mokuesouayaya miak tonali, yeka ika nochi iyolo kiiljuik Jehová ma kipaleui. Ya kiijtoua: “Nopa JW Broadcasting^® tlen kiski ipan mayo, 2019, kiijtok tlake ueliskia nijchiuas. Nikitak kenijkatsa Jehová nechnankilik, uan nechmakak tlen nechpaleuik”.

8. ¿Kenijkatsa kinextik Jehová tlauel kiiknelia Jesús?

⁸ Jehová nojkia tlauel techiknelia kej kinextik ika iKone kema itstoya ipan Tlaltipaktli (Juan 5:20). Ya nochipa kipaleuik nojua tlauel kuali ma tlaneltoka, ma kipia tlen moneki uan kuali ma kiyolmati. Nojkia, kiiljuik tlauel kiikneliyaya uan kuali kiitayaya (Mat. 3:16, 17). Jesús amo kema kiyolmatki itstoya iselti pampa kimatiyaya iTata, katli tlauel teiknelia, nochipa kipaleuiskia (Juan 8:16).

9. ¿Tlake tlamantli kinextia Jehová tlauel techiknelia?

⁹ Sanse kej Jesús, nochi tikitstokej kenijkatsa Jehová tlauel techiknelia. Ma timoiljuikaj ipan ni tlamantli: Jehová techyoltilanki ipan itlanechikol uan techmakatok toikniuaj katli elij kej tochampoyouaj. Inijuantij tlauel techikneliaj, uan kema tiitstokej ininuaya, kichiua kuali ma tijyolmatikaj uan ma tiyolpakikaj (Juan 6:44). Nojkia, nochipa techmaka tlamachtili tlen techpaleuia kuali ma titlaneltokakaj, uan techmaka tlen ika timopanoltiaj (Mat. 6:31, 32). Kema timoyoliljuiaj kenijkatsa Jehová tlauel techiknelia, techpaleuia nojua tlauel ma tikiknelikaj.

10. ¿Kenijkatsa uelis tijnextisej tikinikneliaj toikniuaj?

¹⁰ Jehová tlauel kiniknelia toikniuaj. Maske kiampa kichiua, uelis kemantika ouij tijmatij tijnextisej uan tikiniljuisej toikniuaj tlauel tikinikneliaj. Uelis kiampa pano pampa amo sanse techiskaltijkej o amo tieuaj ipan sanse altepetl. Nojkia, pampa nochi timokuapolouaj, uelis tijchiuasej se tlamantli tlen kinyolkokos sekinok. Maske kiampa pano, uelis tijchiuasej kej Jehová kema tikiniknelisej nochi toikniuaj katli elij kej tochampoyouaj (Efes. 5:1, 2; 1 Juan 4:19). Ma tikitakaj tlake techmachtia tlen Jehová kichiua.

11. ¿Kenijkatsa Jesús kinextik tlauel tetlasojtla kej Jehová?

¹¹ Jehová kinextia tlauel “techtlasojtla” (Luc. 1:78). Se katli tetlasojtla kitekipachoua kema kinita sekinok tlaijiyouiaj uan kineki kinpaleuis uan kinyolchikauas. Kema Jesús kiniknelik maseualmej, kinextik Jehová nojkia kiampa kichiua (Juan 5:19). Biblia kiijtoua: “Kema kinitak nochi nopa miak tlakamej [...] kintlasojtlak pampa nelia miak kuesoli kipixtoyaj hasta moiljuijkej ayok tleno ininpati. Itstoyaj keja borregojmej tlen axkipixkej inintlamokuitlauijka” (Mat. 9:36). Jesús amo san kiijtok kintlasojtlayaya maseualmej, ya kinextik kema kinchikajki katli mokokouayayaj uan kinpaleuik katli tlauel tekitiyayaj uan tlauel siajtoyaj (Mat. 11:28; 11:29, 30, TNM; 14:14).

12. ¿Kenijkatsa uelis tijnextisej tlauel titetlasojtlaj?

¹² Tlaj tijnekij tijnextisej tikintlasojtlaj toikniuaj, moneki timoiljuisej ipan tlake tlaouijkayotl kiixnamikij. Ma timoiljuikaj ipan ni tlamantli: uelis se tosiuaikni  kipia se ueyi kokolistli, uan maske amo tleno kiijtoua, tlauel kipatiitas tlaj tijpaleuisej. Nama ma timotlatsintokikaj: “¿Ueli kichiua se keski tlamantli ichaj? ¿Kinekiskia ma tijtlaxkaljuitij o ma tijtlachpanitij?”. O tlaj se toikni amo kipia tekitl uan ayamo kipantia kampa tekitis, ueliskia tijpaleuisej ika se kentsi tomij. Kema kiampa tijchiuasej, amo kinamiki tikijtojtinemisej.

13, 14. ¿Kenijkatsa tijchiuasej kej Jehová uan titemakasej tlen tijpiaj?

¹³ Jehová kipaktia temakas tlen kipia (Mat. 5:45). Tlaj tijnekij tijnextisej titetlasojtlaj amo moneki tijchiasej ma techiljuikaj toikniuaj ma tikinpaleuikaj. Kej Jehová kichiua, moneki tojuantij tikitasej kenijkatsa tikinpaleuisej. Ya amo kichia mojmostla ma tijtlajtlanikaj ma kisa Tonati, tijmatij iselti kichiua uan nochi techtlauilia, uan amo san katli kitlaskamatij. Kiampa kinextia tlauel techiknelia uan nochipa techmaka tlen techpaleuia. ¡Jehová kipia tlauel kuali iyolo uan nochipa techmaka tlen techpoloua! Yeka, tlauel tikikneliaj.

¹⁴ Miakej toikniuaj kichiuaj kej Jehová uan kiitaj kenijkatsa temakasej tlen kipiaj. Ma tikitakaj tlen panok ipan 2013, kema ipan Filipinas tlasosolok nopa chikauak ajakatl Haiyan. Tlauel miakej toikniuaj kipolojkej ininchaj uan nochi tlen kipixtoyaj. Yeka, toikniuaj tlen kampa ueli euaj nima kinpaleuijkej. Miakej tlapaleuijkej ika tomij uan ika tekitl, kiampa uelkej kikualchijchiuaj nechka 750 kali ipan nechka se xiuitl. Uan pampa ipan ni tonali momoyajtok COVID-19, nochi toTeotsij itekipanojkauaj kichijtokej kampeka tlapaleuisej. Kema nima tikitaj kenijkatsa tikinpaleuisej toikniuaj, katli elij kej tochampoyouaj, tijnextiaj tlauel tikinikneliaj.

15, 16. Kej kiijtoua Lucas 6:36, ¿tlake kinamiki tijchiuasej uan kiampa tijchiuasej kej Jehová?

¹⁵ Jehová tlauel techtlasojtla uan techtlapojpoljuia (xijpoua Lucas 6:36). Ya mojmostla kiampa kichiua (Sal. 103:10-14). Jesús nojkia kiampa kichijki. Maske itokilijkauaj eliyayaj tlajtlakolejkej, ya nochipa kintlasojtlak uan kintlapojpoljuik. Nojkia,  motemaktilik uan mijki, kiampa Jehová ueli techtlapojpoljuia (1 Juan 2:1, 2). Kema tikitaj Jehová uan Jesús tlauel techtlasojtlaj uan techtlapojpoljuiaj, kichiua nojua ma tikinnechkauikaj.

¹⁶ Kema titetlapojpoljuiaj ika nochi toyolo, kichiua nojua ma tikiniknelikaj toikniuaj (Efes. 4:32). Maske kemantika ouij titetlapojpoljuisej, moneki tijchiuasej kampeka kiampa tijchiuasej. Se tosiuaikni kiijtoua tlauel kipaleuik kema kiski nopa tlamachtili “Perdónense liberalmente unos a otros” ipan La Atalaya. * Ya kiijtoua: “Kema nimomachtik nopa tlamachtili nikitak monejki nijpatlas kej nimoiljuiyaya. Nopaya kiixtoma kema se akajya tijtlapojpoljuiaj, amo kineki kiijtos amo kenijki tlen kichijki o amo techyolkokok. Kineki kiijtos tijkixtisej ipan toyolo tlen techiuilijkej uan tiitstosej ika tlaseuilistli”. Kema tikintlapojpoljuiaj toikniuaj uan tikilkauaj tlen techchiuilijkej, tijnextiaj tikinikneliaj uan tijchiuaj kej Jehová.

17. Kej kiijtoua Mateo 5:16, ¿kenijkatsa uelis tijuejkapantlalisej Jehová?

¹⁷ Tlauel tijpatiitaj tiitstosej ipan toTeotsij itlanechikol kampa nochi moikneliaj. Uan tijnekij tlauel miakej maseualmej nojkia ma kiueyichiuakaj Jehová. Yeka, amo tijnekij tijchiuasej yon se tlamantli tlen ueliskia kisokiuis toTeotsij itoka o itlanechikol. Nochipa tijnekij kuali timonejnemiltisej, kiampa maseualmej kinekisej kitlakakilisej nopa kuali tlamachtili (xijpoua Mateo 5:16).

18. ¿Tlake techpaleuis amo timajmauisej kema titlajtolmoyauasej?

¹⁸ Kemantika sekij techkualankaitasej o techtlatsakuiltisej pampa tijchiuaj tlen Jehová kineki. ¿Tlake techpaleuis amo timajmauisej kema titlajtolmoyauasej? Ma tikilnamikikaj Jehová uan Jesús techpaleuisej. Jesús kiniljuik itokilijkauaj amo ma motekipachokaj ika tlen kiijtoskiaj. Ya kiniljuik: “Kema inmechuikasej para inmechtsakuasej, amo ximokuesokaj  tlachke inkiijtosej para inmomanauisej, pampa [...] elis itonal toTeko tlen kamatis ipan inmojuantij” (Mat. 10:19, 20).

19. ¿Kenijkatsa se katli namanok momachtia Biblia amo majmajki tlajtolmoyauas?

¹⁹ Ma tikitakaj tlen kipanok toikni Robert. Kema pejki momachtia Biblia kiuikakej kampa tekichiuanij ipan Sudáfrica. Ya amo majmajki kiniljuis tekichiuanij amo yas kampa tlateuiaj pampa kiniknelia toikniuaj. Tlauel kinpatiitayaya iikniuaj katli elij kej ichampoyouaj. Se katli tetlajtolsenkaua kitlatsintoki: “¿Ajkia elij moikniuaj?”. Robert nima kiilnamijki Mateo 12:50 kampa kiijtoua: “Tlen kichiua ipakilis noTata tlen itstok iluikak, yajaya noikni uan nonana”, tlen kipojtoya ipan pilamochtsi Mojmostla timomachtiaj toTeotsij iTlajtol. Maske Robert namanok pejtoya momachtia Biblia, Jehová kipaleuik ika itonal ma kinankili nopa tlajtlanili uan sekinok tlen kichiuilijkej. ¡Jehová tlauel yolpajki! Uan nojkia yolpakis touaya tlaj timotemachiaj ya techpaleuis titlajtolmoyauasej maske tikixnamikij tlaouijkayotl.

20. Kej kiijtoua Juan 17:11, 15, ¿tlake nojua moneki tijchijtosej?

²⁰ Nojua ma tijpatiitakaj tiitstosej ininuaya toikniuaj katli elij kej tochampoyouaj. Tijpiaj toTata katli tlauel techiknelia uan miakej toikniuaj katli nojkia kiampa kichiuaj, yeka nochipa ma tijpatiitakaj. Satanás uan katli kinnauatia kinekij ma timoiljuiaj Jehová amo techiknelia uan kitemoliaj kenijkatsa ayokmo timouampojchijtosej iuaya. Maske kiampa kichiuaj, ma tikilnamikikaj Jesús kiiljuik Jehová ma techmokuitlaui uan ma techpaleui amo timoxelosej (xijpoua Juan 17:11, 15). Uan Jehová kichijtok tlen Jesús kitlajtlanik. Yeka, ma tijchiuakaj kej Jesús uan amo kema ma timoiljuikaj Jehová amo techiknelia. Ma tijchijtokaj kampeka nojua kuali timouampojchijtosej ininuaya toikniuaj, katli elij kej tochampoyouaj.