¿Mitspaleuia tlen ika timoyolpakiltia?

“Uajka xijchijtinemikaj kampeka para inkimachilisej tlen kipaktia toTeko” (EFES. 5:10).

1, 2. 1) ¿Tlake textos kinextia Jehová kineki ma tiyolpakikaj? 2) Nopa tonali tlen ika timoyolpakiltiaj eli se “regalo tlen toTeko techmakatok”, yeka, ¿kenijkatsa moneki tijtekiuisej?

 IPAN Biblia, miakpa kiijtoua Jehová amo san kineki ma tiitstokaj, nojkia kineki ma tiyolpakikaj. Kiampa kiijtoua Salmo 104:14, 15: “Ta toTeko [...] tijchiua ma onka kilitl, kuatlajkayotl uan trigo tlen tlakamej kitokaj para ma ika mopanoltikaj. Nojkia tikinmaka xokomekatl iayo para ma ika yolpaktokaj, uan aceite para ma mopolokaj ipan ininxayak, uan nojkia tikinmaka tlakualistli para ma kipiakaj fuerza”. ToTeotsij kichiua ma moskalti tlen tijtokaj, ma onka aceite uan vino tlen ika uelis timopanoltisej. Nopa vino amo san kipaleuia totlakayo, nojkia kichiua ma tiyolpakikaj (Ecl. 9:7; 10:19). Nochi ni kinextia Jehová kineki maseualmej kuali ma itstokaj uan ma yolpakikaj (Hech. 14:16, 17).

² Kej tikitaj, amo eli se tlajtlakoli tlaj kemantika Jehová itekipanojkauaj moyolpakiltiaj. Se neskayotl, kema tikintlachiliaj “totomej tlen patlantinemij” uan tijtlachiliaj “xochitl tlen moskaltia kampa ueli”, kichiua kuali ma timomachilikaj uan ma tiyolpakikaj (Mat. 6:26, 28; Sal. 8:3, 4). Kema kuali tiitstokej uan tiyolpakij eli kejuak “se regalo tlen toTeko techmakatok” (Ecl. 3:12, 13). Uan nopa tonali kema timosiajketsaj nojkia eli se tlen nopa tlamantli tlen Jehová techmakatok, yeka moneki tijtekiuisej kej ya kipaktia. a

Amo ma tikixpanokaj toTeotsij itlanauatiljuaj kema timoyolpakiltiaj

3. ¿Kenke moneki tikilnamikisej onka miak tlamantli tlen ika uelis timoyolpakiltisej?

³ Kej tikitasej ipan ni tlamachtili, se Cristo itokilijka kimati ya iselti uelis kitlapejpenis tlen ika moyolpakiltis, san moneki amo kiixpanos tlen toTeotsij tlanauatia. Tlen ika timoyolpakiltiaj eli sanse ika se keski tlakualistli, ipan se keski altepemej kiitaj tlauel ajuiyak se tlakualistli, uan ipan sekinok nopa tlakualistli amo kinpaktia pampa amo mokua. Ipan se keski altepemej, Cristo itokilijkauaj moyolpakiltiaj ika se keski tlamantli tlen sekinok toikniuaj katli itstokej sejkanok amo kinpaktia. Uan ni nojkia pano maske itstokej ipan sanse altepetl. Sekij uelis kinpaktia kipouasej se amochtli, uan sekij kochisnekij kema tlapouaj; sekij tlauel kinpaktia nemisej ipan bicicleta, uan sekij amo kinpaktia pampa kinsiauiltia. Nochi moneki tijmatisej onka miak tlamantli tlen uelis tijchiuasej kema timoyolpakiltisej, sanse kej onka miak tlamantli tlen uelis tijkuasej (Rom. 14:2-4).

4. ¿Kenke moneki tijmajtos amo uelis timoyolpakiltis ika nochi tlen ta tijnekis? Xikixtoma ika se neskayotl.

⁴ Maske kena uelis tijtlapejpenisej tlen ika timoyolpakiltisej, amo kiijtosneki uelis tijchiuasej tlamantli tlen amo kinamiki. Sampa ma tikilnamikikaj nopa neskayotl tlen tlakualistli. Maske techpaktia tijkuasej tlakualistli tlen amo sanse, amo kema tijkuaskiaj se tlakualistli tlen ya ijtlakajtok. Tlaj kiampa tijchiuaskiaj amo san tijnextiskiaj amo titlalnamikij, nojkia timokokoskiaj. Maske uelis tijtlapejpenisej tlen ika timoyolpakiltisej, amo tijchiuaj yon tikitaj kampa nesi momekatiaj, kampa moteuiaj o tlen eli mauilili, pampa nopa tlamantli kiixpano tlen toTeotsij tlanauatia uan uelis kitlanauis totlakayo uan totlaneltokilis. Ni kiijtosneki moneki amo tijchiuasej tlen Jehová amo kipaktia. Yeka, achtoui moneki tikitasej tlaj Jehová kuali kiita tlen ika tijnekij timoyolpakiltisej (Efes. 5:10). Ma tikitakaj kenijkatsa uelis tijchiuasej.

5. ¿Kenijkatsa uelis tijmatisej tlaj kipaktia Jehová tlen ika timoyolpakiltiaj?

⁵ Tlen ika timoyolpakiltiaj uelis techpaleuis tlaj Jehová kuali kiita. ¿Kenijkatsa uelis tijmatisej tlaj amo kiixpano Jehová itlanauatiljuaj? (Sal. 86:11). Tijmatisej ika ni eyi tlajtlanili: tlake, kema uan ajkia. Ma tikixtomakaj sejse tlen ni eyi tlajtlanili.

¿Tlake mochiua?

6. ¿Ika tlake tlamantli amo timoyolpakiltiaj, uan kenke?

⁶ Kema tijtlapejpenisej ika tlake tlamantli timoyolpakiltisej, achtoui moneki timotlajtlanisej: “¿Tlake mochiua tlen ika nechpaktiskia nimopakilismakas?”. O ¿kenijkatsa eli? Se toTeotsij itekipanojka nochipa moneki kiilnamikis eltok ome tlamantli tlen ika uelis moyolpakiltis: achtoui, nochi tlen moneki amo kichiuas, uan ika ome, tlen uelis kichiuas tlaj itlalnamikilis kikauilia. ¿Tlake moneki amo kema kichiuas? Nochi tlamantli kampa kichiuaj o kinextiaj tlen kiixpano Jehová itlanauatiljuaj (1 Juan 5:19). Maske ipan ni tonali miakej maseualmej kinpaktia kitlachilisej kampa nesi tetlaijiyouiltiaj, tetlajchiuiaj, mosiuanekij o motlakanekij, pornografía, kampa nesi mosisiniaj uan sekinok tlamantli tlen Biblia kiijtoua amo kuali, Cristo itokilijkauaj amo timoyolpakiltiaj ika nopa tlamantli (1 Cor. 6:9, 10; xijpoua Apocalipsis 21:8). Maske kampa ueli tiitstokej, amo timoyolpakiltiaj ika ni tlamantli pampa kiixpano Jehová itlanauatiljuaj, uan kiampa tijnextiaj tijneltokaj ni tlanauatili: “Xijtlauelkauakaj tlen axkuali” (Rom. 12:9; 1 Juan 1:5, 6).

7, 8. ¿Kenijkatsa uelis kimatis se Cristo itokilijka tlaj Jehová kuali kiita tlen ika kineki moyolpakiltis? Xikijto ika se neskayotl.

⁷ Nama ma tikitakaj nopa ompa tlamantli tlen ika uelis timoyolpakiltisej pampa timoiljuiaj amo kiixpano toTeotsij itlanauatiljuaj. ¿Kenijkatsa uelis kimatis se Cristo itokilijka tlaj Jehová kipaktia tlen ika moyolpakiltis? Moneki kitlachilis ika tlen kiijtoua Biblia (Prov. 4:10, 11). Kiampa tlen kitlapejpenis amo kiyolkokos itlalnamikilis (Gál. 6:5; 1 Tim. 1:19). ¿Tlake kipaleuis kuali ma kitlapejpeni tlen kichiuas? Sampa ma tikitakaj nopa neskayotl tlen tlakualistli. Kema tijkuasej se tlakualistli tlen amo kema tijkuajtoyaj, uelis achtoui titlajtlanij ika tlake kichijchijtokej. Nojkia, kema tikitasej ika tlake tlamantli timoyolpakiltisej, achtoui moneki tijmatisej tlake mochiua nopaya (Efes. 5:17).

⁸ Ma tikitakaj seyok neskayotl. Sekij tlauel techpaktia deportes pampa kichiua kuali ma tijyolmatikaj. Maske amo kenijki tlaj techpaktia, ¿techyoltilana tlen kipia nopa deporte maske monekis tikinmakilisej o tikinkokosej sekinok pampa tijnekij titlatlanisej o tojuantij uelis timokokosej? ¿Techpaktia pampa iljuichiuaj kema tlatlanij o kichiua tlauel ma tikiknelikaj toaltepe? Kuali ma tikitakaj ika tlake timoyolpakiltiaj. Tlaj kiampa tijchiuasej, uelis tikitasej amo kinamiki kej timoyolpakiltiaj pampa Jehová amo kipaktia, uan nojkia amo tijnextiskiaj tlayolseuilistli yon tlaiknelili tlen tijmoyauaj, yeka kualtiaskia ayokmo timoyolpakiltisej ika nopa tlamantli (Is. 61:1; Gál. 5:19-21). Uan tlaj tlen tijchiuaj amo kiixpano Jehová itlanauatiljuaj, uajka kuali timoyolpakiltisej (Gál. 5:22, 23; xijpoua Filipenses 4:8).

¿Kema nijchiuas?

9. Xikijto tlake uelis tijmatis tlaj timotlajtlanis: “¿Kema nimoyolpakiltis?”.

⁹ Nojkia, moneki timotlajtlanisej: “¿Kema nimoyolpakiltis?”. Moneki tikitasej kema uan keski tiuejkauasej kema timoyolpakiltisej. Kema timotlajtlaniaj tlake, techpaleuia tijmatisej tlaj kuali kiita toTeotsij tlen ika timoyolpakiltiaj; uan nopa tlajtoli kema, techpaleuia tikitasej tlake tikachtouitlaliaj uan tijnextiaj tlake tikitaj tlauel ipati ipan tonemilis. ¿Tlake techpaleuis amo ma timotonalpolokaj kema timoyolpakiltiaj?

10, 11. ¿Kenijkatsa Mateo 6:33 techpaleuia tijmatisej keski kinamiki tiuejkauasej kema timoyolpakiltisej?

¹⁰ Ma tikilnamikikaj tlen Jesús kiijtok: “Xikikneli toTeko Dios ika nochi moyolo uan ika nochi moalma uan ika nochi motlalnamikilis uan ika nochi mochikaualis” (Mar. 12:30). Tijnextiaj tlauel tikikneliaj Jehová kema tijneltokaj tlen Jesús kiijtok: “Achtoui xijtemokaj para inkalakisej ipan itlanauatilis toTeko uan para inkipiasej se yolistli tlen xitlauak iixpa. Uan yajaya inmechmakas nojkia nochi ni tlamantli tlen moneki” (Mat. 6:33). Tlen Jesús kiijtok techpaleuis ma tijmatikaj kenijkatsa kinamiki tikitasej tlen ika timoyolpakiltiaj uan keski moneki tiuejkauasej.

¹¹ Jesús amo kiijtok ma tijtemokaj san “toTeotsij iTlanauatijkayo”, ya kiijtok achtoui ma tijtemokaj tikalakisej ipan “toTeotsij iTlanauatijkayo”. Ya kimati moneki tijchiuasej sekinok tekitl pampa moneki tijpiasej kampa tiitstosej, tlen tijkuasej, toyoyo, timomachtisej escuela, titekitisej, timoyolpakiltisej uan sekinok tlamantli. Maske moneki ya nopa tijchiuasej, moneki tikachtouitlalisej toTeotsij iTlanauatijkayo (1 Cor. 7:29-31). Tlaj tijneltokasej tlen Jesús kiijtok ipan nopa texto, amo kema tijkauasej tlen ika timoyolpakiltiaj ma techtsakuili tijchiuasej tlen tlauel ipati, tijtekipanosej Jehová. Tlaj kema timoyolpakiltiaj tijchiuaj tlen Jesús kiijtok, kuali tijtekiuisej tonali uan kuali tijyolmatisej kema timoyolpakiltisej.

12. ¿Kenijkatsa Lucas 14:28 techpaleuia tijmatisej kenijkatsa kinamiki timoyolpakiltisej?

¹² ¿Keski horas timoyolpakiltisej? Achtoui moneki timoseuisej uan tikitasej tlaj nojua tijpiasej tonali tijchiuasej sekinok tlamantli (Luc. 14:28). Moneki tikitasej keski tiuejkauasej kema timoyolpakiltisej uan tlaj amo kichiuas san ma timotonalpolokaj. Tlaj tikitaj kichiuas ayokmo ma timomachtikaj toselti, ayokmo ma timomachtikaj ininuaya tochampoyouaj, ayokmo ma tiakaj tlanechikoli yon ma titlajtolmoyauakaj, uajka kejuak “san kej ueli” tijtekiuiskiaj tonali, uan amo moneki kiampa tijchiuasej (Mar. 8:36). Uan tlaj tikitasej ika tlen timoyolpakiltiaj kichiua kuali ma timomachilikaj uan ma tikachtouitlalikaj toTeotsij iTlanauatijkayo, uajka kuali tijtekiuisej tonali.

¿Ajkia yas nouaya?

13. ¿Kenke moneki kuali tikitasej ajkia ininuaya timoyolpakiltisej?

¹³ Nopa seyok tlajtlanili tlen nochi moneki timotlajtlanisej eli: “¿Ajkia yas nouaya kema nimoyolpakiltiti?”. Moneki tijmatisej ajkia ininuaya tiitstosej, pampa uelis kuali timoyolpakiltisej tlaj kuali tijtlapejpeniaj ajkia ininuaya tiasej. Sanse kej tlauel tiyolpakij kema titlakuaj ininuaya kuali touampoyouaj, nojkia kuali tijyolmatij kema timoyolpakiltiaj ininuaya touampoyouaj katli kuali monejnemiltiaj. Yeka, nochi tlauel techpaktia timoyolpakiltisej ininuaya sekinok uan telpokamej nojua tlauel kinpaktia kiampa kichiuasej. Uelis timoyolpakiltis kej kinamiki tlaj kuali tikintlapejpenis mouampoyouaj uan tlaj amo timouikas ininuaya katli amo mitspaleuisej kuali ximonejnemilti (2 Crón. 19:2; xijpoua Proverbios 13:20; Sant. 4:4).

14, 15. 1) ¿Tlake kichijki Jesús kema kintlapejpenik iuampoyouaj? 2) ¿Tlake moneki timotlajtlanisej kema tikintlapejpenisej touampoyouaj?

¹⁴ Kema tijtlapejpenisej ajkia ininuaya timouampojchiuasej, moneki tijchiuasej kej Jesús. Kema toTeotsij pejki kinchijchiua maseualmej, Jesús ipa kinikneliyaya (Prov. 8:31). Uan kema itstoya ipan Tlaltipaktli, nochipa kinextik kinikneliyaya maseualmej uan kitekipachouayaya tlen kinpanoyaya (Mat. 15:29-37). Maske kiampa kichijki, ya kimatiyaya amo ueliskia mouampojchiuas ininuaya nochi maseualmej. Maske kuali mouikayaya ininuaya miakej, ya kuali mouampojchijki ininuaya katli kichiuayayaj se tlamantli. ¿Tlake tlamantli? Tlen kiniljuik nopa 11 itokilijkauaj katli amo kitlauelkajkej: “Initstokej innouampoyouaj intla inkichiuaj tlen niinmechnauatia” (Juan 15:14; nojkia xikita Juan 13:27, 30). Kej tikitaj, Jesús kuali mouampojchijki san ininuaya itokilijkauaj katli nojkia kitekipanouayayaj Jehová.

¹⁵ Tojuantij nojkia moneki kiampa tijchiuasej. Tlaj tijnekij tijmatisej tlaj kinamiki timouampojchiuasej iuaya se akajya, moneki timotlajtlanisej: “¿Tlen kichiua uan tlen kiijtoua kinextia kineltoka tlen technauatiaj Jehová uan Jesús? ¿Nojkia kineltoka tlen na nijneltoka uan tlen Biblia tlamachtia? ¿Nechpaleuis kuali ma nimonejnemilti uan nochipa kuali ma nijtekipanojto Jehová uan ma nikachtouitlali iTlanauatijkayo?”. Tlaj tijnankiliaj kena nochi ni tlajtlanili, uajka uelis timoiljuisej nopa maseuali kena elis se kuali touampo kema timoyolpakiltisej (xijpoua Salmo 119:63; 2 Cor. 6:14; 2 Tim. 2:22).

Ma tikitakaj tlaj kuali tijtlapejpeniaj tlen ika timoyolpakiltiaj

16. ¿Tlake moneki tijchiuasej ika tlen timoyolpakiltiaj?

¹⁶ Ipan ni tlamachtili tikitakej eyi tlamantli tlen uelis tijchiuasej kema amo titekitij: tijtlapejpenisej ika tlake timoyolpakiltisej, kema tijchiuasej uan ajkia iuaya tijchiuasej. Tikitstokej tlaj tijnekij ma techpaleui kema timoyolpakiltiaj, moneki tijchiuasej tlen Biblia kiijtoua ipan ni eyi tlamantli. Kema tijtlapejpenisej ika tlake timoyolpakiltisej, moneki timotlajtlanisej: ¿Tlake mochiua nopaya? Moneki tikitasej tlaj nopaya amo mochiua tlen amo kinamiki kichiuas se Cristo itokilijka (Prov. 4:20-27). ¿Kema tijchiuasej? Moneki amo tijkauasej ma techkixtili miak tonali (1 Tim. 4:8). ¿Ajkia ininuaya tiasej? Moneki amo timouikasej ininuaya katli amo kuali monejnemiltiaj (Ecl. 9:18; 1 Cor. 15:33).

17, 18. 1) ¿Kenijkatsa uelis tijmatisej tlaj Jehová kuali kiita tlen ika timoyolpakiltiaj? 2) ¿Tlake moneki kichiuas se Cristo itokilijka kema kitlapejpenis ika tlake moyolpakiltis?

¹⁷ Tlaj tlen ika timoyolpakiltiaj amo mochiua nopa eyi tlamantli tlen Biblia kiijtoua: tlake, kema uan ajkia, uajka amo kinamiki kiampa timoyolpakiltisej. Uan tlaj tikitaj kena mochiua nopa eyi tlamantli, uajka kuali tijyolmatisej pampa techpaleuis ipan tonemilis uan nojkia techpaleuis ma tijueyichiuakaj Jehová (Sal. 119:33-35).

¹⁸ Uajka, kema timoyolpakiltisej, nochipa moneki tikitasej tlake kinamiki tijchiuasej, kema kinamiki tijchiuasej uan ajkia iuaya tijchiuasej. Ma tijchiuakaj kampeka tijneltokasej tlen kiijtoua ni texto: “Ika nochi tlen inkikuaj, o inkiij, o nochi sekinok tlamantli tlen inkichiuaj, moneki xijchiuakaj nochi para iuextilis toTeko” (1 Cor. 10:31).

[Tlatsintla kiijtoua]

¿Tlake titlanankiliskia?

¿Kenijkatsa uelis tijchiuasej tlen kiijtoua ni versículos kema timoyolpakiltisej?

• Filipenses 4:8

• Mateo 6:33

• Proverbios 13:20

[Tlajtlanili tlen monankilis]

[Tlaixkopinkayotl]

(Tlaj tijneki tikitas kej nelnelia iuexka ni tlajkuiloli, xikita amatlajkuiloli)

Tlake

[Tlaixkopinkayotl]

(Tlaj tijneki tikitas kej nelnelia iuexka ni tlajkuiloli, xikita amatlajkuiloli)

Kema

[Tlaixkopinkayotl]

(Tlaj tijneki tikitas kej nelnelia iuexka ni tlajkuiloli, xikita amatlajkuiloli)

Ajkia

[Tlaixkopinkayotl]

¿Kenijkatsa techpaleuia tlen kichijki Jesús kema kintlapejpenik iuampoyouaj uan ika tlake moyolpakiltis?