BIBLIA kiijtoua nochi katli kitekipanouaj Jehová uan momaijtouaj tlauel kinpaleuia (Lucas 22:40; Santiago 5:13). Kema timomaijtouaj techpaleuia kuali ma titlaneltokakaj, kuali ma tijyolmatikaj uan kuali ma tiitstokaj. ¿Kenke tlauel techpaleuia?

Ma tikitakaj se neskayotl. Kema kinnemaktiaj se tlamantli konemej, ¿tlake kiniljuiaj inintatauaj? Amo moneki san yolpakisej nojkia moneki tetlaskamatisej. Kema titetlaskamatij, nojua tlauel tijpatiitaj tlen kichijkej. Nojkia kiampa pano kema tijnojnotsaj toTeotsij. Ma tikitakaj kenijkatsa techpaleuia tlamaijtoli kema amo sanse tlamantli tikijtouaj.

Kema tijtlaskamatiliaj tlen techmakatok. Kema tijtlaskamatiliaj toTeotsij, techpaleuia ma timosentlalikaj ipan kuajkuali tlamantli tlen tijseliaj. Uan nopa kichiua nochipa ma titetlaskamatilikaj, ma tiyolpakikaj uan amo tlauel ma timotekipachokaj (Filipenses 4:⁠6).

Se neskayotl: Kema Jesús kitlaskamatilik iTata pampa kitlakakiliyaya uan kinankiliyaya kema momaijtouayaya (Juan 11:41).

Kema tijtlajtlaniaj ma techtlapojpoljui. Kema tijtlajtlaniaj toTeotsij ma techtlapojpoljui, techpaleuia amo tlauel ma timoyolkokojtokaj. Nojkia, techpaleuia kuali ma timoyoliljuikaj kema tijchiuaj se tlamantli, ma tikitakaj eli se ueyi tlajtlakoli tlen tijchijkej uan sampa ma timoyolkuepakaj.

Se neskayotl: Kema David momaijtok pampa moyolkueptoya (Salmo 51).

Kema tijtlajtlaniaj ma techyakana uan ma techmaka tlalnamikilistli. Techpaleuia amo ma timoueyimatikaj pampa techilnamikilia amo tiuelij tijchiuaj nochi. Nojkia techpaleuia ma timotemachikaj ipan toTeotsij Jehová uan amo ipan tojuantij (Proverbios 3:​5, 6).

Se neskayotl: Kema Salomón kitlajtlanik toTeotsij ma kiyakana uan ma kimaka tlalnamikilistli uan kiampa ueliskia kuali tlanauatis ipan Israel (1 Reyes 3:​5-12).

Kema tikiljuiaj ma techyolchikaua pampa timokuesouaj. Kema techtekipachoua se tlamantli, tlauel techpaleuia kema tikiljuiaj toTeotsij nochi tlen tijyolmatij, uan nojkia techpaleuia nojua tlauel ma timotemachikaj ipan ya (Salmo 62:⁠8).

Se neskayotl: Tlamaijtoli tlen kichijki tlanauatijketl Asa kema nechka kiteuiskiaj ikualankaitakauaj (2 Crónicas 14:11).

Kema tijtlajtlaniaj ma kinpaleui sekinok. Techpaleuia amo ma titekualankaitakaj, nojua ma titetlasojtlakaj uan nojkia techpaleuia ma tijyolmatikaj tlen sekinok kiyolmatij.

Se neskayotl: Kema Jesús kitlajtlanik toTeotsij ma kinpaleui itokilijkauaj (Juan 17:​9-17).

Kema tijueyichiuaj toTeotsij ipan tlamaijtoli. Techpaleuia nojua tlauel ma tikiknelikaj Jehová kema tikiljuiaj nopa kuajkuali tlamantli tlen techpaktia tlen ya uan nochi tlen kichijtok. Kema kiampa tijchiuaj nojua tlauel tijnechkauiaj toTata Jehová.

Se neskayotl: Kema David momaijtok uan kiijtok kipatiitayaya nochi tlen Jehová kichijchijtoya (Salmo 8).

Tlamaijtoli nojkia uelis techpaleuis ipan sekinok tlamantli pampa ipan Filipenses 4:⁠7 kiijtoua: “ToTeko inmechmakas tlaseuilistli ipan inmoyolo tlen tlakamej axuelis kimachilisej”. Uajka, kema tijpiaj tlaseuilistli nelia eli se yejyektsi tlamantli pampa ipan ni tonali miakej maseualmej tlauel mokuesouaj, uan nojkia tlauel kipaleuia totlakayo (Proverbios 14:30). Uan, ¿kenijkatsa uelis tijpiasej tlaseuilistli? ¿Uelis toselti tijchiuasej kampeka kiampa tiitstosej o moneki techpaleuis seyok tlamantli?