2. Mayantli

“Onkas uejueyi mayantli” (MARCOS 13:8).

● Se tlakatl yajki ipan se pilaltepetsi tlen itoka Quaratadji (Níger). Imachikniuaj uan iikniuaj nojkia kistejkej tlen ininchaj pampa amo kipiayayaj tlen kikuasej. Nopa tlakatl mokuamajkajki kampa se petlatl. ¿Kenke amo itstok ininuaya ichampoyouaj? “Pampa amo ueli kinmaka tlen kikuasej uan ayokmo kineki kinixtlachilis”, kiampa kiijtok Sidi, katli tlayakana ipan nopa pilaltepetsi.

¿TLAKE KINEXTIA TLEN PANOTOK? Sekij kiijtouaj kampa itstokej chikomej maseualmej, se tlen inijuantij nochipa amo tlakua, uan ipan África subsahariana nojua tlauel miakej mayankamikij pampa kampa itstokej eyij maseualmej, se tlen inijuantij kikua pilkentsi tlakualistli uan yeka amo kipaleuia itlakayo. Ma timoiljuikaj ipan se kali itstok tetaj, tenaj uan se okichpil, nopa tlakualistli tlen kipiaj san omej kinaxilis, yeka moneki moiljuisej tlaj tlakuas nopa tenaj o nopa tetaj. Miakej maseualmej kiampa kinpano mojmostla.

TLEN SEKIJ KIIJTOUAJ. Ipan Tlaltipaktli tlauel tlaejeli uan nopa tlakualistli uelis kinaxilis nochi maseualmej, san moneki kiitasej kenijkatsa nochi uelis kinaxilis.

¿NELIA TLEN KIIJTOUAJ? Ipan ni tonali tlauel tlaejeli uan kimoyajtokej miak tlakualistli ipan nochi Tlaltipaktli. Tlanauatianij monekiskia kinmajmakasej tlakualistli nochi maseualmej uan kiampa ayokmo onkaskia mayantli. Maske miak xiuitl kichijtokej kampeka kiampa kichiuasej, amo ueltok kitlamiltiaj mayantli.

¿TLAKE TIMOILJUIA? ¿Nelia tlen kiijtoua Marcos 13:8? Maske kichijchijtokej yajyankuik tlamantli, ¿nojua onkatok mayantli?

Ipan itlamia tonali amo san mojmoliniskia tlali uan onkaskia mayantli, nojkia panoskia sekinok tlamantli.

[Tlajtoli tlen pankisa]

“Miakej konemej katli kipiaj neumonía, mapitsaj uan katli kipiaj sekinok kokolistli amo mikiskiaj tlaj kuali tlakuaskiaj” (ANN M. VENEMAN, KATLI ACHTOUIA TLAYAKANAYAYA IPAN UNICEF).

[Katli iaxka tlaixkopinkayotl]

© Paul Lowe/​Panos Pictures