Biblia kinpaleuik kuali ma monejnemiltikaj

¿TLAKE kipaleuik se tlakatl katli mauiltiyaya ika tomij uan tlachtekiyaya ayokmo kiampa ma kichiua uan ma kipatla inemilis? Ma tikitakaj kenijkatsa ya technankilia.

“Nechpaktiyaya nikitas kema motlaniyayaj kauayojmej” (RICHARD STEWART)

TLAKATKI IPAN: 1965

EUA: JAMAICA

SEKINOK TLAMANTLI: MAUILTIYAYA IKA TOMIJ UAN TLACHTEKIYAYA

TLEN NECHPANOK: Nimoskaltik ipan altepetl Kingston, Jamaica. Nopaya itstokej tlauel miakej maseualmej teikneltsitsij, amo tlauel onkayaya tekitl uan miakej kichiuayayaj tlen amo kuali. Maseualmej tlauel majmauiyayaj pampa itstoyaj katli san tlemach kichiuayayaj. Mojmostla nijkakiyaya motoponiyayaj ika pistola.

Nonana tlauel tekitiyaya uan kiampa techpanoltiyaya na uan omej nopilikniuaj, se okichpil uan se siuapil. Nojkia, techtitlanki ipan se kuali escuela. Maske kiampa kichiuayaya, na amo nijnekiyaya nias pampa tlauel nechpaktiyaya nikitas kema motlaniyayaj kauayojmej. Miakpa amo niauiyaya escuela pampa niauiyaya kampa motlalouaj kauayojmej, uan kemantika nojkia ninemiyaya kauayojtipa.

Teipa, pejki tlauel nechpaktia nimauiltis ika tomij uan nisiuanemis. Nojkia nijchichinayaya marihuana. Uan pampa kiampa nijchiuayaya, monekiyaya nitlachtekis, yeka nijpiayaya miak pistolas. ¡Niyolpaki pampa amo kema nijmiktik se akajya kema nitlachtekiyaya!

Maske teipa nechitskijkej uan nechtsajkej, kema nikiski, sampa pejki nijchiua kej achtouia. Nijchiuayaya sekinok tlamantli tlen nojua tlauel amo kuali. Maske nesiyaya amo nijchiuayaya tlamantli tlen amo kuali, nelia nitochontik nieliyaya, nima nikualaniyaya uan amo nitetlasojtlayaya. Amo nechtekipachouayaya tlen kinpanoyaya sekinok.

BIBLIA NECHPALEUIK KUALI MA NIMONEJNEMILTI: Ipan nopa tonali, nonana pejki momachtia Biblia uan mochijki se tlen Jehová itlajtoltemakauaj. Kema nikitak kipatlatiauiyaya inemilis, nijnejki nijmatis kenke kiampa kichiuayaya, yeka pejki nimokamanaljuia tlen Biblia ininuaya Jehová itlajtoltemakauaj.

Nima nikitak inijuantij amo sanse tlamachtiyayaj kej sekinok religiones, uan nochi tlen tlamachtiyayaj kikixtiyayaj ipan Biblia. Nikitak san inijuantij yauij kajkalpa uan kimoyauaj nopa kuali tlamachtili tlen kipia Biblia sanse kej uejkajkia kichiuayayaj Cristo itokilijkauaj (Mateo 28:19; Hechos 20:20). Kema nikitak nelnelia moikneliaj, nimotemachik inijuantij itstokej ipan religión tlen melauak (Juan 13:35).

Kema nimomachtiyaya Biblia, nikitak monekiyaya nijpatlas miak tlamantli ipan nonemilis. Jehová amo kipaktia kema se akajya momekatia, uan tlaj nijnekiyaya nijyolpakiltis, monekiyaya ayokmo nijchiuas tlamantli tlen kisokiuia notlakayo (2 Corintios 7:1; Hebreos 13:⁠4). Tlauel nechpaleuik kema nijmatki uelis tijyolpakiltisej o tijyolkokosej Jehová ika tlen tijchiuasej (Proverbios 27:11). Yeka, nimosentlalik ayokmo nijchichinas marihuana yon nijtekiuis pistola, uan nijpatlas kej nieliyaya. Tlauel ouij nijmatki ayokmo nimauiltis ika tomij uan nisiuanemis.

Maske achtouia amo nijnekiyaya nouampoyouaj ma kimatikaj nimomachtiyaya Biblia, kema nijpojki tlen ijkuilijtok ipan Mateo 10:33 nijpatlak kej nimoiljuiyaya, nopaya kiijtoua: “Ajkeya teyolmelaua para axnechneltoka, uajka na nojkia nikiljuis noTata nepa iluikak para yajaya axnoaxka”. Nimantsi nikiniljuik nouampoyouaj tlen nijchiuayaya. Amo kineltokayayaj tlaj se akajya kej na mochiuaskia se Cristo itokilijka. Maske kiampa moiljuiyayaj, na nikinixtomilik nimosentlalijtoya nijpatlas kej nimonejnemiltiyaya.

¿KENIJKATSA NECHPALEUIJTOK? Nonana tlauel yolpajki kema kiitak nijchijtiauiyaya ipan nonemilis tlen Biblia tetlajtolmaka. Nama ayokmo kitekipachoua tlen nijchiua. Tlauel techpaktia kema timokamanaljuiaj kenijkatsa tikikneliaj Jehová. Kemantika nikilnamiki tlen uejkajkia nijchiuayaya uan nimosentlachilia pampa Jehová nechpaleuik ma nijpatla nonemilis. Nama ayokmo nijneki nimomekatis yon nitlapijpias.

Tlaj amo nijchijtoskia tlen Biblia tetlajtolmaka, ipan ni tonali nitsaktoskia o ayokmo niitstoskia. Uan nama tlauel niyolpaki ininuaya nochampoyouaj pampa nijchiua tlen nimomachtik. Tlauel niyolpaki nijtekipanos Jehová iuaya nosiua, katli tlauel nechpaleuia uan noichpoka katli nechtlepanita. Nijtlaskamatilia Jehová pampa se akajya kichijki kampeka nechmachtis ika Biblia. Yeka nijchiua kampeka nikinkamanaljuis sekinok tlen Biblia tlamachtia. Nojkia tlauel nijtlaskamatilia Jehová pampa nechkaua ma niitsto ininuaya toikniuaj katli tlauel nechikneliaj, uan nojkia pampa kinejki ma niitsto ipan itlanechikol.

[Tlajtoli katli pankisa]

“Tlauel nechpaleuik kema nijmatki uelis tijyolpakiltisej o tijyolkokosej Jehová ika tlen tijchiuasej”

[Tlaixkopinkayotl]

Kema nikitak nonana kipatlatiauiyaya inemilis, nijnejki nijmatis kenke kiampa kichiuayaya

[Tlaixkopinkayotl]

Iuaya nosiua uan noichpoka