Inijuantij elij katli kimoyauaj nopa kuali tlamachtili tlen toTeotsij iTlanauatijkayo kej kiijtoua Salmo 68:11, nopaya Jehová kiijtok: “Tlauel miakej nopa siuamej katli kimoyauaj nopa kuali tlamachtili” (La Biblia. Traducción del Nuevo Mundo).

Nochi tlen kichiuaj siuamej katli elij Jehová itlajtoltemakauaj amo eli sanse ika tlen kichiuaj nopa siuamej katli tlayakanaj ipan sekinok religiones. ¿Kenke kiampa tikijtouaj?

Pampa amo sanse kej tlamachtiaj. Siuamej katli tlayakanaj ipan sekinok religiones, kej katli kiijtouaj tlaneltokaj ipan Jesús, kinyakanaj sekinok maseualmej katli yauij ipan nopa religión uan san kinmachtiaj katli nopaya mosentiliaj. Uan siuamej katli elij Jehová itlajtoltemakauaj, amo kiampa kichiuaj pampa inijuantij tlamachtiaj kajkalpa uan kinkamanaljuiaj tlen Biblia nochi katli kinpantiaj kema tlajtolmoyauaj uan nojkia kampa ueli.

Tlen kichiuaj kampa mosentiliaj siuamej katli elij Jehová itlajtoltemakauaj uan siuamej katli itstokej ipan sekinok religiones, nojkia kinextia amo elij sanse, pampa siuamej katli itstokej ipan sekinok religiones kinmachtiaj uan kinyakanaj katli nopaya monechikouaj. Uan siuamej katli elij Jehová itlajtoltemakauaj, amo kema tlamachtiaj ipan tlanechikoli kema itstokej tlakamej katli moatsonpoliuiltijtokej. Nopa tekitl san kichiuaj tlakamej katli kintekitlalijtokej kej tlamachtianij (1 Timoteo 3:2; Santiago 3:1).

Tlen Biblia kiijtoua, kinextia uejkajkia san tlakamej tlayakanayayaj ipan tlanechikoli. Uan tlen apóstol Pablo kiiljuik Tito, katli nojkia tlayakanayaya ipan tlanechikoli, kiampa kinextia. Pablo kiiljuik: “Nimitskajtejki ipan nopa piltlaltsi Creta. [...] Nimitsiljuik xikintlali ueuejtlakamej para tlayakanasej kampa mosentiliaj tlaneltokanij ipan sejse altepetl” (Tito 1:5). Teipa kiijtok katli tlayakanayayaj ipan tlanechikoli monekiyayaj elisej ueuejtlakamej katli nochi kimatiskiaj “kichiuaj tlen kuali, uan tlen kipiaj san se ininsiua” (Tito 1:6). Pablo nojkia kiampa kiiljuik Timoteo ipan se amatlajkuiloli tlen kititlanilik. Ya kiiljuik: “Intla se tlakatl kineki mochiuas se ueuejtlaneltokaketl para tlayakanas ipan tlasentilistli, kineki se kuali tekitl. Pero moneki se tlayakanketl tlen tlaneltokanij ma eli se tlakatl tlen axaka uelis kiteiljuis. Moneki kipias setsi isiua [...], uan tlen nelia kuali tlamachtia itlajtol toTeko” (1 Timoteo 3:1, 2).

Uajka, ¿kenke san tlakamej uelis tlayakanasej ipan tlanechikoli? Pablo kiijtok: “Axnikinkauilia siuamej ma kipiakaj nopa tekitl para kinmachtisej tlakamej ipan tlasentilistli, niyon para kipiasej tekiuejkayotl ika tlakamej. Ma san tlakakikaj. Pampa toTeko kichijki Adán achtoui uan teipa kichijki Eva” (1 Timoteo 2:12, 13). Kej tikitaj, toTeotsij achtoui kichijchijki nopa tlakatl, uan nopa kiixnextia ya mosentlalijtoya kitekitlalis nopa tlakatl ma tlamachti uan ma tlayakana.

Jesucristo eli katli kinyakana Jehová itlajtoltemakauaj, yeka inijuantij kichiuaj sanse kej ya. Lucas, katli nojkia eliyaya se Jesús itokilijka kiijtok “Jesús nejnemiyaya kampa ueli ipan altepetinij uan ranchos tlayolmelajtinemiyaya itlajtol toTeko uan tenotsayaya ma kalakikaj ipan itlanauatilis toTeko”. ¿Uan tlake kichijkej itokilijkauaj kema kintitlanki nojkia ma tlajtolmoyauatiaj? “Nejnenkej kampa ueli ipan nochi ranchos. Uan tlayolmelauayayaj itlajtol toTeko” (Lucas 8:1; 9:2-6).

Ipan ni tonali, tlakamej uan siuamej katli elij Jehová itlajtoltemakauaj, kichiuaj ika pakilistli tlen ijkuilijtok ipan Mateo 24:14. Nopaya Jesús kiijtok: “Uan tlakamej tlakamauitij ni kuali tlamachtili tlen kejatsa eltos kema toTeko tlanauatia. Uan kiuikasej hasta kampa ueli techaj ipan nochi tlaltinij ipan ni Tlaltipaktli para nochi tlakamej ma kimatikaj. Uan teipa ualas itlamia nochi tlen onka”.