Omar: Na amo nechpaktia miak nias ipan se religión. Nimoiljuia amo tleno uelis timoiljuisej.

Bruno: Tlaskamati pampa tinechiljuia nopa. Na notoka Bruno. ¿Uan ta?

Omar: Omar.

Bruno: Nipaki nimitsixmati Omar.

Omar: Na nojkia.

Bruno: Nijnekiskia nimitstlajtlanis se tlamantli. ¿Amo kema tiajki ipan se religión?

Omar: Kema niokichpil kena, uan kema pejki nimomachtia ipan universidad ayokmo niajki ipan nopa religión.

Bruno: ¿Nelia? ¿Uan tlake timomachtik?

Omar: Nimomachtik Historia uan Ciencias sociales. Nochipa nechpaktijtok nijmatis tlen ya panok, nechpaktia nimomachtis tlen kichijtiualauij maseualmej ipan Tlaltipaktli.

Bruno: Kena, nopa tlauel kuali. Uelis nojkia tijmatiyaya Biblia kiijtoua tlen uejkajkia panok. ¿Amo kema tijtemojtok se tlamachtili ipan ni amochtli?

Omar: Amo. Maske nijmati Biblia se kuali amochtli amo kema nimoiljuijtoya tlaj kiijtoua tlen uejkajkia panok.

Bruno: Nikita mitspaktia tijmatis miak tlamantli. Tlaj amo tlauel timotekiuia, nechpaktiskia nimitsnextilis kenke Biblia kiijtoua tlen nelia panok.

Omar: Kena, maske nikaj amo nijpia se Biblia.

Bruno: Amo ximotekipacho, na nijualika se. Ma tijpouakaj tlen kiijtoua 1 Crónicas 29:26 uan 27. Kiijtoua: “David, ikone Isaí, tlanauatik ipan tlali Israel 40 xiuitl. Tlanauatik 7 xiuitl ipan altepetl Hebrón ipan tlali Judá uan 33 xiuitl tlanauatik ipan altepetl Jerusalén ipan nochi tlali Israel”.

Omar: ¿Nopa nelia panok?

Bruno: Kena. Sekij katli amo kineltokaj tlen kiijtoua Biblia, kiijtouaj David amo nelia itstoya.

Omar: ¿Nelia? ¿Kenke kiijtoua nopa?

Bruno: Pampa san Biblia kiijtouayaya itstoya David, uan amo onkayaya sekinok tlamantli tlen kinextiyaya nopa. Uan ipan 1993, se keskij ixtlamatinij kiasikej se tetl kampa ijkuilijtoya se tlajtoli tlen kiijtosneki “David ichaj”.

Omar: Mmm... ¿Nelia?

Bruno: Miakej nojkia kiijtouayayaj amo nelia itstoya Poncio Pilato katli tlanauatiyaya kema itstoya Jesús. Itoka uala ipan Lucas 3:1 uan tlen sekinok tlanauatianij inintoka.

 Omar: Aaa kena, nikaj kiijtoua: “Poncio Pilato eltoya gobernador ipan estado Judea, uan Herodes Ántipas ipan estado Galilea”.

Bruno: Tlaskamati. Maske ixtlamatinij uejkajki kiijtouayayaj Poncio Pilato amo nelia itstoya, kipia se 50 xiuitl ne Oriente Medio kiasikej seyok tetl kampa ijkuilijtoya itoka.

Omar: Nopa amo nijmatiyaya.

Bruno: Nipaki pampa nama ya tijmati.

Omar: Nimitsiljuis ni. Na nochipa nikitstok Biblia san kej se amochtli tlen kipia kuajkuali tlajtoli, uan nimoiljuia amo uelis techpaleuis ipan ni tonali. Kiijtoua san tlen panok uejkajkia.

Bruno: Maske miakej kiampa moiljuiaj, na amo nijneltoka nopa. ¿Tijmati kenke? Tojuantij nochipa techpolojtok sanse tlamantli. Tlen tijkuasej, tlen timokentisej uan kampa tiitstosej. Uan nochipa tijyolmajtokej moneki timonojnotsasej ininuaya sekinok uan tiyolpaktosej ininuaya tochampoyouaj. O, ¿amo nelia?

Omar: Kena, nopa nelia.

Bruno: Biblia uelis techpaleuis tijpiasej tlen moneki. Maske uejkajkia moijkuilok, nojua techpaleuia ipan ni tonali.

Omar: ¿Timoiljuia nelia techpaleuia?

Bruno: Kena. Ximoiljui ni. Tlen Biblia tetlajtolmaka tepaleuiyaya uejkajkia uan ipan ni tonali nojkia tepaleuia.

Omar: ¿Uelis tinechiljuis kenijkatsa tepaleuia?

Bruno: Biblia techpaleuia tijtlapejpenisej tlake tijchiuasej ika tomij, ika tochampoyouaj uan ika touampoyouaj. Eliskia kejuak se mapa tlen technextilia ipan tlake ojtli uelis tiasej. Ipan ni tonali se tlakatl ouij mochiua se kuali tetaj uan se kuali iueue se siuatl. O, ¿tlake timoiljuia ta?

Omar: Nopa nelia. Nosiua uan na timosenkajkej kipia se xiuitl, uan kemantika nikita ouij timoiljuisej tlake tijchiuasej.

Bruno: Biblia techtlajtolmaka tlen amo ouij se kichiuas uan nochipa techpaleuia. Ma tikitakaj Efesios 5:28. ¿Ueliskia tijpouas?

Omar: Kena, kiijtoua: “Nojkia moneki se tlakatl kiiknelis isiua keja moiknelia. Yajaya tlen kiiknelia isiua, moiknelia”.

Bruno: Tlaskamati. Uajka, ¿timoiljuia se tlakatl tlauel kuali itstoskia ininuaya ichampoyouaj tlaj kichiuaskia ni?

Omar: Uelis kena. Maske amo ouij tikijtos, kena ouij tijchiuas.

Bruno: Nopa nelia, amo aka ueli kichiua nochi tlen xitlauak. Nopaya nojkia kiijtoua moneki tijnextisej kuali tlalnamikilistli. * Nochi moneki kimatisej tlake kinamiki kichiuasej uan moneki kinekisej kichiuasej. Nosiua uan na tlauel techpaleuijtok Biblia ma tijnextikaj nopa.

Omar: Nopa nelia.

Bruno: Kampa titlamachtiaj ipan Internet tijpiaj tlamachtili tlen kinpaleuia katli mosenkajtokej uan ininchampoyouaj. Uelis nimitsnextilis ipan se keski minutos tlake uelis tikasis ipan Internet.

Omar: Kena, kualtitok.

Bruno: Ika jw.org/nah uelis tijpeualtis.

Omar: Tlauel yejyektsitsij ni tlaixkopinkayomej.

Bruno: Kena, inijuantij nouampoyouaj katli tlajtolmoyauaj kampa ueli ipan Tlaltipaktli. Ma tikitakaj... Nikaj kampa kiijtoua “Amatlajkuiloli”. Nopaya nesi nopa amatlajkuiloli tlen kipia miak tlamachtili uan nojkia kenijkatsa uelis kuali tiitstosej ininuaya tochampoyouaj. Ma tikitakaj nopa pilamochtsi ¡ToTeotsij techmaka  kuali tlamachtili! Se tlamachtili tlen kipia itoka “¿Kenijkatsa uelis tiyolpakis ininuaya mochampoyouaj?”

Omar: Nesi kuali nopa tlamachtili. Nijnekiskia nijmatis kenijkatsa kiixtoma.

Bruno: Ni tlamachtili kiijtoua se keski tlamantli tlen uelis techpaleuis tiyolpakisej ininuaya katli timosenkajtokej. Xikita nopa párrafo kampa uala tlajtlanili 2. Omar, ¿mitspaktiskia tijpouas kampa tlami?

Omar: Kena. Kiijtoua: “Moneki ma moiknelikaj uan ma motlepanitakaj. Uan pampa tlajtlakolejkej moneki motlapojpoljuisej uan kiampa uelis yolpakisej”. Nelnelia tlen kiijtoua nikaj.

Bruno: Tlaskamati. Nikaj kiijtoua ma tijpouakaj Efesios 5:33. Na nikitas ipan noBiblia, ¿ueliskia tijpouas?

Omar: Ma nijtemo... ya nikasik Efesios 5:33. Kiijtoua: “Sejse tlakatl ma kiikneli isiua keja moiknelia, uan se siuatl moneki kitlepanitas iueue”.

Bruno: ¿Tikitak tlake tetlajtolmaka? Kiijtoua se moneki kimakas isiua o iueue tlen kinamiki.

Omar: Mmm... amo nijkuamachilia.

Bruno: Se tlakatl kitemolia ma kitlepanita isiua uan se siuatl kineki kiyolmatis kiiknelia iueue.

Omar: Kena, nopa nelia.

Bruno: Tlaj se tlakatl kitemolis kinextis kiiknelia isiua, ya amo kimatis ouij kitlepanitas iueue.

Omar: Kena, na nojkia kiampa nikijtoua.

Bruno: Maske tlen tijpojkej ipan Biblia moijkuilok kipia nechka 2,000 xiuitl, katli mosenkajtokej kinpaleuia ma kipiakaj tlen moneki, uan pampa tetlajtolmaka tlen tlauel ipati, tlaj kichiuasej ipan ininnemilis tlauel kinpaleuis.

Omar: Nama nikita Biblia kipia miak tlamachtili tlen tlauel ipati, uan amo kej nimoiljuiyaya.

Bruno: Tlauel niyolpaki pampa tikijtoua nopa. Nechpaktiskia sampa niualas uan tinechiljuis kenijkatsa tikitak nopa tlajtlanili 3, “¿Moneki ma mokauakaj tlaj katli mosenkajtokej amo kuali itstokej?”. Ni nojkia nesi ipan ni tlamachtili kampa jw.org/nah.