Kema mijki Jesús tlauel ipati pampa maseualmej sampa uelis kipiasej tlen kipolojtoyaj. Kema kinchijkej maseualmej, amo kichiuayayaj tlen amo kuali, amo kipiayayaj kokolistli yon mikiyayaj (Gén. 1:31). Maske toTeotsij amo kinekiyaya nopa, Adán kichijki maseualmej ma kipiakaj tlajtlakoli. Yeka, Jesús motemaktilik uan kiampa techmakixtik tlen tlajtlakoli uan mikilistli. (Xijpoua Mateo 20:28 uan Romanos 6:23.)

ToTeotsij kinextik tlauel techiknelia kema kititlanki iKone ipan Tlaltipaktli uan ma motemaktili (1 Juan 4:9, 10). Jesús kinnauatik itokilijkauaj ma kiilnamikikaj imikilis san ika se keski tlamantli uan ma kitekiuikaj se kentsi pantsi uan vino. Tlaj sejse xiuitl kichiuaskiaj ni, kinextiskiaj tlauel kitlaskamatiliaj toTeotsij uan iKone pampa kinextijkej techikneliaj. (Xijpoua Lucas 22:19 uan 20.)

Kema Jesús kiniljuik itokilijkauaj ma kiilnamikikaj imikilis kichijki ininuaya se tlajtolsenkaualistli (Mat. 26:26-28). Kiampa inijuantij uan sekinok maseualmej ueliskia elisej tlanauatianij uan sacerdotes iuaya Jesús ne iluikak. Uan maske tlauel miakej kiilnamikisej imikilis, amo miakej kikuasej nopa pantsi uan kiisej nopa vino. (Xijpoua Apocalipsis [Revelación] 5:10.)

Kipia nechka 2,000 xiuitl, Jehová pejki kintlapejpenia katli elisej tlanauatianij iuaya iKone (Luc. 12:32). Inijuantij amo miakej, uan katli itstosej nochipa ipan Tlaltipaktli kena tlauel miakej. (Xijpoua Apocalipsis 7:4, 9 uan 17.)