Maske maseualmej nochipa moyoliljuijtokej tlauel kuali eliskia tlaj amo kema tiueuejtiaskiaj, nochi timikij. Tlen Job kiijtok kipano se 3,000 xiuitl tikitaj nelnelia mochijtok ipan ni tonali kej uejkajkia.

Nochi tijnekij amo kema timikisej. Biblia kiijtoua toTeotsij kichijki ma tijyolmatikaj nopa, uan ma tijnekikaj tijkuamachilisej kenijkatsa eliskia tlaj nochipa tiitstoskiaj (Ecl. 3:11). ¿Kinamikiskia toTeotsij katli techiknelia kichiuas ma tijyolmatikaj tlen amo kema ueliskia mochiuas? Tlaj tikijtoua amo, kuali titlanankilik. Biblia kiijtoua nopa mikilistli kejuak se tokualankaitaka uan kiijtoua toTeotsij “kitlamiltis” (1 Cor. 15:26).

Nopa mikilistli nelnelia se tokualankaitaka. Uan pampa amo tijnekij timikisej, kema ueliskia techpanos tlen amo kuali, nimantsi timochololtiaj. Uan kema tijpiaj se kokolistli, timopajtiaj. Tijchiuaj se ueyi kampeka amo tleno ma kichiua ma timikikaj.

¿Nelnelia uelis kitlamiltisej mikilistli tlen kipia tlauel miak xiuitl onkatok? Kena. Kema Jehová techchijki amo kinekiyaya ma tiitstokaj san se keski xiuitl. Amo kinekiyaya ma timikikaj. Kinekiyaya nochipa ma tiitstokaj, uan tlen ya mosentlalia kichiuas, temachtli kichiua (Is. 55:11).

¿Kenijkatsa kitlamiltis mikilistli? Maske uejkajkia uan ipan ni tonali maseualmej kinektokej kitlamiltisej, amo ueltokej. Ixtlamatinij kichijtokej pajtli uan vacunas tlen kichikajtok se keski kokolistli, uan kitemolijtokej kikuamachilisej kenijkatsa tekiti totlakayo. Maske ipan miak altepemej kena itstokej achi miak xiuitl, uan amo kej kipia se cien xiuitl, amo ueltokej kitlamiltiaj mikilistli. Yeka Biblia kiijtoua “nochi [...] mokuepasej tlaltejpoktli” (Ecl. 3:20).

Maske maseualmej amo uelis kitlamiltisej mikilistli, Jehová kichijtok tlen moneki. Kinauatik Jesucristo ma techmanaui uan ma techmakixti tlen nopa mikilistli.