Ika tlen kichijtokej maseualmej, uelis kinpanos tlen amo kuali. ¿Kinkauas toTeotsij nojua ma tlanauatijtokaj ipan Tlaltipaktli? Amo. Ya nechka kichiuas tlen moneki uan kintsontlamiltis tekichiuanij, ayokmo techiuilisej tlen amo xitlauak uan ayokmo tleno techpolos. ToTeotsij kineki ma tijmatikaj kema kitlamiltis nochi. ¿Kenijkatsa techiljuia?

Ximoiljui ni: Tlaj tiaskia uejka tipaxaloti, uelis achtoui tijtlachiliskia se mapa o sekinok tlajkuiloli ipan tlake ojtli tiaskia. Teipa, kema tia ojtipa tikita tlajkuiloli kampa kiijtoua kej tikitak ipan mapa. Yeka timotemachia nechka tiasiti. ToTeotsij techmakatok Biblia o kejuak se mapa, nopaya kiijtoua tlen panoskia ipan Tlaltipaktli kema nechka tlamiskia nochi. Kej pano tonali, tikitaj tlen kampa ueli pano ya nopa kiijtojtoya Biblia panoskia. Yeka timotemachiaj monechkauijtiuala itlamia nochi tlen onka.

Biblia kiijtoua kema nechka tlamiskia nochi, kampa ueli panoskia miak tlamantli tlen amo kema panotoya. Ma tikitakaj se keski tlamantli.

1. UEJUEYI KUESOLI IPAN NOCHI TLALTIPAKTLI Tlen ijkuilijtok ipan Mateo 24 kiijtoua panoskia se “tlaneskayotl” ika miak tlamantli. Ni kinextiskia “nechkatitos para tlamis ni tonali”, uan teipa asiskia “itlamia nochi tlen onka” (versículos 3 uan 14). Onkaskia uejueyi tlauilankayotl, mayantli, kampa ueli mojmoliniskia tlali, san tlemach kichiuaskiaj, amo teikneliskiaj uan ipan religiones tlakajkayauaskiaj (versículos 6-26). Maske se keski tlamantli ipa panotok, nochi panoskia sansejko uan nojkia moaxitiskia nopa sekinok eyi tlajtolpanextili.

2. AYOKMO MOYAKANASKIAJ IKA TLEN KUALI Biblia kiijtoua ipan “itlamia tonali” amo kualmej ayokmo moyakanaskiaj ika tlen kuali, “san moiknelisej ininseltitsitsij uan tlauel kinekisej miak tomij. Tlauel motlepanitasej uan moueyimatisej. Kitlaijiljuisej toTeko uan axkintlepanitasej ininnanauaj uan inintatauaj. Axmotlaskamatisej ipampa tlen kiselijtokej uan axtleno kiitasej para tlatsejtseloltik. Axteiknelisej. Axtetlasojtlasej. San teijilnamikisej. Tlakamej ayok uelis monauatisej uan yeka kichiuasej san tlen kinekisej. Tekokosej ika pakilistli, uan kikokolisej nochi tlen kuali. [...] Kinkajkayauasej hasta ininuampoyouaj uan mosisinisej [...]. Kitemosej san tlen ika uelis mopakilismakasej, pero axkitemosej toTeko” (2 Tim. 3:1-4). Maske ni ipa panotok, san ipan “itlamia tonali” tlauel nesiskia, yeka eliskia “nelia fiero”. ¿Timoiljuia kichijtokej ni ipan ni tonali?

3. TLASOJSOLOJTOKEJ IPAN TLALTIPAKTLI Biblia kiijtoua toTeotsij ‘kintsontlamiltis tlen tlaxoleuaj ipan Tlaltipaktli’ (Apoc. 11:18). ¿Kenijkatsa ‘kixoleuaskiaj’ Tlaltipaktli? Kej kema itstoya Noé. Biblia kiijtoua: “Kampa ueli onkak tlen fiero iixtla toTeko Dios uan nochi tlakamej san mosisiniyayaj. Uan toTeko Dios kiitak para nelfiero eltoya”. Yeka toTeotsij kiiljuik Noé: “Nikinpoliuiltis nochi tlakamej” (Gén. 6:11-13). Ipan Tlaltipaktli tlauel onkatok tlasisinijkayotl uan kichijtokej tlen amo kema tikitstoyaj. Nopa tepostli tlen kichijtokej ueliskia kintsontlamiltis maseualmej uan Tlaltipaktli. Nojkia tlasojsolojtokej ika sekinok tlamantli. Ika yolik kitlamiltijtiauij tlen kichiua ma tiitstokaj, kej ajakatl, atl, tlapialmej o sekinok tlamantli.

Ximoiljui ni. Ipan nopa cien xiuitl tlen panok maseualmej amo ueltoskiaj kintsontlamiltiskiaj nochi. Uan nama kena, pampa kimiakilijtokej tepostli uan tlauel kisokiuijtokej nochi  tlen onka. Nesi maseualmej amo kiitaj tlake tlen amo kuali ueliskia panos uan amo kimatij kenijkatsa kitsakuilisej tlen kichiuaskia ma pano nopa miak yajyankuik tlamantli tlen mochijtia. Maseualmej amo kitsontlamiltisej Tlaltipaktli pampa toTeotsij amo kinkauas uan yaya kintsontlamiltis.

4. TLAJTOLMOYAUASEJ IPAN NOCHI TLALTIPAKTLI Mateo nojkia kiijtoua: “Tlakamej tlakamauitij ni kuali tlamachtili tlen kejatsa eltos kema toTeko tlanauatia. Uan kiuikasej hasta kampa ueli techaj ipan nochi tlaltinij ipan ni Tlaltipaktli para nochi tlakamej ma kimatikaj. Uan teipa ualas itlamia nochi tlen onka” (Mat. 24:14). Ni amo kichiuaskiaj kej ipan miak religiones kichijtokej, pampa tlauel kimoyauaskiaj nopa tlamachtili tlen “kejatsa eltos kema toTeko tlanauati[s]”. ¿Ipan tlake religión tlauel kimoyajtokej ni tlamachtili “ipan nochi [...] Tlaltipaktli”, uan amo san ipan se altepetl?

Ipan jw.org kampa Jehová itlajtoltemakauaj titlamachtiaj timosentlaliaj tijmoyauasej nopa “kuali tlamachtili”. Nopaya onka amatlajkuiloli tlen kiixtoma nopa tlamachtili ipan se 700 tlajtoli. Amo onka seyok religión kampa kichiuaj se ueyi kampeka kimoyauasej nopa tlamachtili. Kema ayamo motekiuiyaya Internet Jehová itlajtoltemakauaj ipa kimoyauayayaj nopa tlamachtili tlen toTeotsij iTlanauatijkayo. Ipan 1939, ipan sejse pilamochtsi La Atalaya pejki kiijtoua: “Anunciando el Reino de Jehová”. Ipan se amochtli tlen religiones kiijtok kej Jehová itlajtoltemakauaj “tlajtolmoyajtokej amo aka kej nopa kichijtok yon kampa ueli tlajtolmoyajtokej”. Tlen tijmoyauaj tlauel ipati, pampa titeiljuiaj toTeotsij iTlanauatijkayo nechka kintsontlamiltis nochi tlen amo kualmej.

¿Tikitstok kenijkatsa moaxitijtok nochi ni tlajtolpanextili? Kipia cien xiuitl, ipan ni pilamochtsi moixtontok tlen namanok panotok, uan katli kipouaj kiitstokej ika ni moaxitia tlen panoskia ipan “itlamia nochi”. Maske miakej kiitaj ni, kiijtouaj sekij kitekiuiaj nopa san kej inijuantij kinekij uan kiijtouaj amo panotok tlen tlauel amo kuali. Kiijtouaj nama tijmatij tlake kuesoli panotok kampa ueli pampa onka miak  tlamantli tlen ika tematiltiaj tlen pano, uan tlaj amo onkaskia amo kema tijmajtoskiaj. Maske kiampa kiijtouaj, kiitaj kenijkatsa tlen panotok amo kema panotoya.

Ni kuali nesi ika tlen kiijtojkej se keskij ixtlamatinij uan tlapaleuiaj ma mochiua nopa pilamochtsi The Bulletin of the Atomic Scientists Science. Inijuantij kiniljuijkej katli tekitij ipan Consejo de Seguridad de las Naciones Unidas tlen tlauel amo kuali ueliskia panos. Kiijtojkej: “Kema kuali tijtlachilijkej tlen tlauel amo kuali ueliskia panos, tikitakej nochi tlen yankuik mochijtok nelia ueliskia kitsontlamiltis nochi”. Ni kinpaleuia miakej, kej katli kichiuaj uan kipouaj ni pilamochtsi, ma kineltokakaj nechka asis itlamia nochi tlen onka. Maske panos nopa, amo kinamiki timajmauisej pampa uelis timomanauisej.