Nopa Naciones Unidas kineki maseualmej ma mosentikapaleuikaj, ma motlepanitakaj uan ma kimokuitlauikaj tlen onka ipan Tlaltipaktli. ¿Kenke kichiuaj nopa? Pampa kej kiijkuilok Maher Nasser ipan pilamochtsi Crónica ONU, “tlen pano ipan Tlaltipaktli, maseualmej katli kichiuaj tlen amo kuali, katli techikoitaj, katli kikauaj ininaltepe, katli temiktiaj, tlauilankayotl, kokolistli uan sekinok tlamantli tlen amo kuali kampa ueli onka uan nochi kinasi”.

Uan sekij kiijtojtokej tlauel moneki se tlanauatijkayotl tlen uelis tekichiuas ipan nochi Tlaltipaktli. Kiampa kiijtok Dante (1265-1321), katli eliyaya se ixtlamatketl, se tlajkuilojketl uan se político tlen euayaya Italia, uan nopa ixtlamatketl Albert Einstein (1879-1955) nojkia kiampa kiijtok. Dante kiijtok amo kema tiitstoskiaj ika tlaseuilistli pampa política kichiua maseualmej ma moxelokaj. Ya kiilnamijki tlen Jesús kiijtojtoya uan kiijtok tlaj se tlanauatijkayotl ‘motlajkoxeloua’, uajka “axuelis itstosej sansejko” (Lucas 11:17).

Teipa, kema ya kitoponijtoyaj nopa ome uejueyi bombas ipan Ompa Ueyi Tlauilankayotl, Albert Einstein kinijkuiljuilik nopa Asamblea General de las Naciones Unidas se tlamantli tlen nochi kiitaskiaj: “Nopa Naciones Unidas moneki nimantsi kiitasej tlake kichiuasej uan kiampa uelis onkas se tlanauatijkayotl tlen kichiuas ipan nochi Tlaltipaktli maseualmej ma itstokaj kuali”.

Tlaj onkaskia nopa tlanauatijkayotl, ¿uelis timotemachisej kichiuasej tlen xitlauak, kuali tlanauatisej uan techpaleuisej? ¿O nojkia kichiuaskiaj tlen amo kuali kej sekinok? Ni tlajtlanili kichiua ma tikilnamikikaj tlen kiijtok Iord Acton: “Kema se akajya kipia se kentsi tlanauatili, kichiua tlen amo kuali, uan kema se akajya kipia miak tlanauatili, nelia kichiua miak tlamantli tlen tlauel amo kuali”.

Tlaj maseualmej nelia kinekij itstosej ika tlaseuilistli, moneki nochi kuali mouikasej. ¿Kenijkatsa uelis tijchiuasej nopa? ¿Nelia uelis kiampa tiitstosej? Biblia kiijtoua kena uelis. ¿Kenijkatsa uelis mochiuas nopa? ToTeotsij kitlalis se tlanauatijkayotl, pampa maseualmej amo kema yajatisej kuali tlanauatisej. Nopa tlanauatijkayotl kinextis san toTeotsij kinamiki kinauatis nochi tlen ya kichijchijtok. Biblia kiijtoua itoka “toTeotsij iTlanauatijkayo” (Lucas 4:43).

Jesús tlajtlanki nopa tlanauatijkayotl kema momaijtok: “Xiuala, xitlanauatiki nikaj. Ma kichiuakaj mopakilis nochi ipan ni Tlaltipaktli” (Mateo 6:9, 10). Kena, toTeotsij iTlanauatijkayo kichiuas ipan Tlaltipaktli ma mochiua ipakilis toTeotsij uan ayokmo mochiuas maseualmej ininpakilis, katli moueyimatij uan san kinekij kipiasej tlanauatili.

ToTeotsij iTlanauatijkayo nojkia kiiljuiaj tlanauatijkayotl tlen iluikak (Mateo 5:3). ¿Kenke kiampa kiiljuiaj? Pampa maske tekichiuas ipan Tlaltipaktli, nopa Tlanauatijkayotl eltos ipan iluikak uan amo nikaj ipan Tlaltipaktli. Uajka, kema tekichijtos ayokmo monekis tijtekiuisej tomij. ¡Nelia tlauel kuali kiyolmatisej nochi maseualmej!

Kej kinextia nopa tlajtoli tlanauatijkayotl, ipan toTeotsij iTlanauatijkayo nojkia itstos se tlanauatijketl. ToTeotsij kitekimakatok Jesucristo kej tlanauatijketl. Biblia kiijtoua tlen Jesús:

• “Yajaya kipias nochi tekiuejkayotl para tlanauatis. [...] Itlanauatilis moskaltijtias hasta asis kampa ueli. Uan kampa yajaya tlanauatis onkas tlaseuilistli tlen axkema tlamis” (Isaías 9:6, 7).

•   “Uan Yajaya tlen Itstok Nochipa kimakak yajaya tlen mokuepki tlakatl tekiuejkayotl para tlanauatis uan miak tlatlepanitakayotl uan chikaualistli. Uan nochi tlakamej ipan nochi tlaltinij, uan tlakamej tlen kimatiyayaj nochi tlajtoli ipan Tlaltipaktli itstoyaj ipan itlanauatilis uan kiueyichijkej” (Daniel 7:14).

• “Ama nochi Tlaltipaktli mochijtok iaxka toTeko Dios uan iaxka Cristo para ma kinauatis. Uan yajaya tlanauatis para nochipa uan axkema tlamis” (Apocalipsis [Revelación] 11:15).

ToTeotsij iTlanauatijkayo kichiuas ma moaxiti nochi tlen Jesús kiijtok kema momaijtok, uan nama kena mochiuas toTeotsij ipakilis ipan Tlaltipaktli. Uan nelia onkas miak tlamantli ipan Tlaltipaktli, pampa maseualmej kimatisej kenijkatsa kimokuitlauisej.

ToTeotsij iTlanauatijkayo nojkia kinmachtis maseualmej kenijkatsa monejnemiltisej. Monekis kitlepanitasej itlanauatiljuaj. Ayokmo aka tlateuis yon amo moxelosej maseualmej. Isaías 11:9 kiijtoua: “Axonkas niyon se tlamantli tlen mauilili o tlen tetlanauia [...], pampa keja atl kitemitia nopa ueyi atl, nopa tlali temitos ika tlakamej tlen kiixmatij toTeko”.

Nochi maseualmej katli itstosej ipan Tlaltipaktli kipiasej tlaseuilistli uan itstosej sansejko, se tlamantli tlen nopa Naciones Unidas amo ueltok kichiua. Salmo 37:11 kiijtoua: “Tlauel pakisej, pampa yajaya [toTeotsij] kinteochiuas hasta mokauas”. Kej panotias tonali, ayokmo tijtekiuisej tlajtoli kej tlen amo kuali, tlasosoloua, teikneltsitsij yon tlauilankayotl. ¿Kema panos nopa? ¿Kenijkatsa toTeotsij iTlanauatijkayo peuas tekichiuas ipan Tlaltipaktli? ¿Kenijkatsa kichiuas? ¿Kenijkatsa uelis mitspaleuis nopa Tlanauatijkayotl? Ma tikitakaj ni ipan nopa seyok tlamachtili.