Kema katli momachtiaj ipan se escuela yajkej paxalouaj, se keskij telpokamej kinteljuijkej pampa kichiualtijkej seyok telpokatl ma moteka ininuaya. Nochi momachtiyayaj ipan se escuela tlen Canadá tlen tlauel kiixmatiyayaj. Teipa, se tlakatl katli itoka Leonard Stern kiijkuilok ni ipan periódico Ottawa Citizen: “Maske telpokamej tlalnamikij, momachtiaj o tlatominpiaj, nopa amo kiijtosneki amo kichiuasej tlen amo kuali”.

Stern nojua kiijtok: “Maske tetajmej kinamikiskia kinmachtisej ininkoneuaj tlake kuali uan tlake amo kuali, inijuantij san kinekij kuali ma momachtikaj uan ma kipiakaj tekitl kampa kuali kintlaxtlauisej. San ya nopa kintekipachoua”.

Maske moneki timomachtisej ipan se escuela, tlen nopaya tijyekouaj amo kema uelis kipaleuis se maseuali amo ma kichiua tlen kiyoltilana o tlen amo kuali katli kineki kichiuas. Uajka, ¿tlake uelis techpaleuis kuali ma timonejnemiltikaj?

Biblia eli kej se teskatl. Kema tijpouaj, tikitaj tlake tlamantli amo tiuelij tijchiuaj uan tlake tlamantli tlen amo kuali techyoltilana (Santiago 1:23-25). Nojkia, Biblia techpaleuia ma tijpatlakaj tonemilis uan ma tijnextikaj kuajkuali tlamantli, kej kuali toyolo, kuali titenojnotsasej, timonauatisej, tijpiasej toyolo uan tlaiknelili. Nochi ni kuajkuali tlamantli kichiua ma onka tlaseuilistli uan kuali ma timouikakaj ininuaya sekinok. Biblia kiijtoua “tlaiknelijkayotl techilpia sansejko para ma tijpiakaj sanse toyolo” (Colosenses 3:14). ¿Kenke tlauel ipati tlaiknelijkayotl? Ma tikitakaj tlake kiijtoua Biblia.

• “Se tlen teiknelia kipia iyolo ininuaya sekinok uan kinchiuilia tlen kuali. Yajaya axkineki tlen sekinok kipiaj. Axmoueyimati, niyon axmomachilia achi kuali kej sekinok. [...] Moyoliljuia achtoui kema tlanankilia. Axkamati san kej ueli. Axitskuinti uan axyolkentsi. Niyon axkichiuilia cuenta kema seyok kichiuilia tlen axkuali. [...] Axkema paki ika tlen axkuali, san paki ika tlen melauak. [...] Kiijiyouia nochi [...] uan mokaua temachtli yonke tlen ueli kipanotiuala. Teiknelijkayotl nochipa eltos uan axkema tlamis” (1 Corintios 13:4-8).

• “Intla se kiiknelia seyok, axkichiuilis tlen axkuali” (Romanos 13:10).

• “Tlen achi más ipati, moneki ximoiknelikaj miak se ika seyok, pampa se tlen kiiknelia ne seyok kitlapojpoljuia yonke nopa seyok kiixpano miak uelta” (1 Pedro 4:8).

Kema tiitstokej ininuaya tochampoyouaj, amo timajmauij yon timotekipachouaj. ¿Kenke kiampa tijyolmatij? Pampa tijmatij inijuantij kinekij kuali ma tiitstokaj uan amo kema kinekiskiaj techchiuilisej yon se tlamantli tlen amo kuali.

Pampa titeikneliaj, nojkia tijnekij tijpatlasej tlen timomajtokej tijchiuaj uan tijchiuasej san tlen kinpaleuis sekinok. Ma timoiljuikaj ipan se tlakatl tlen tijtokaxtisej George. Ya tlauel kinekiyaya itstos iuaya iixui, katli namanok tlakatki. George tlauel tlachichinayaya, uan imontika kiiljuik amo ueliskia kinechkauis iixui tlaj tlachichinaskia. ¿Tlake kichijki? Maske 50 xiuitl kiampa kichijtoya, ya ayokmo tlachichinki pampa kinekiyaya itstos iuaya iixui. Ni kinextia kenijkatsa tlaiknelijkayotl tlauel tepaleuia.

 Maseualmej uelis kiyekosej teiknelisej, uan tetajmej nelia uelis kuali kinnextilisej ininkoneuaj ma teiknelikaj. Inijuantij kintlamakaj, kinmokuitlauiaj uan kinpaleuiaj kema mokokouaj o kema kinpano tlen amo kuali. Tetajmej katli kuali kichiuaj ininteki, kamanaltij ininuaya ininkoneuaj uan kuali kiniskaltiaj. Nojkia kintlalnamiktiaj uan kinpaleuiaj ma kimatikaj tlake kuali uan tlake amo kuali. Uan nojkia kinmachtiaj ika tlen inijuantij kichiuaj.

Miakej tetajmej amo kuali kichiuaj ininteki. Uajka, ¿kiijtosneki ininkoneuaj amo kema uelis kuali monejnemiltisej? Amo. Maske miakej katli nama ya uejueyij amo kuali kiniskaltijkej, inijuantij kipatlatokej ininnemilis uan nama nelia tlauel teikneliaj uan kuali monejnemiltiaj. Uan maske sekij nesiyaya amo kema kipatlaskiaj ininnemilis, nama kuali monejnemiltiaj, kej tikitasej ipan nopa seyok tlamachtili.