¿Kipixki ipejya tlen eltok ipan iluikaktli uan ipan Tlaltipaktli?

Génesis 1:1 kiijtoua: “Kema pejki nochi tlen onka, toTeko Dios kichijki iluikaktli uan Tlaltipaktli”.

Ipan 1950, miakej científicos nojua kineltokayayaj ipa eltoya tlen onka ipan iluikaktli uan ipan Tlaltipaktli. Nama, kiitstokej sekinok tlamantli tlen kinpaleuijtok kineltokasej kena tlachijchijki se akajya.

¿Kenijkatsa eliyaya achtouia Tlaltipaktli?

Génesis 1:2, 9, kiijtoua: “Tlaltipaktli axkejatsa nesiyaya, san kaktoya, niyon axtlakualtlalili” uan onkayaya miak atl.

Ika tlen Biblia kiijtoua, científicos nojkia kiampa kiitstokej. Se neskayotl, nopa biólogo Patrick Shih, kiijtok kema pejki Tlaltipaktli amo onkayaya ajakatl tlen kiijiyotilanaskiaj, amo onkayaya kuauitl yon katli yoltokej. Nopa pilamochtsi Astronomy, kiijtoua: “Científicos kiitstokej Tlaltipaktli san kipixtoya miak atl uan uelis amo onkayaya tlali”.

 ¿Kenijkatsa mopatlatiajki tlen kiyaualtsakua Tlaltipaktli?

Génesis 1:3-5 kiijtoua maske tlauili kiminayaya tlen kiyaualtsaktok Tlaltipaktli, tlatsintla amo nesiyaya kanke ualayaya nopa tlauili. Monejki panos tonali uan kiampa nestiajkej Tonati uan metstli (Génesis 1:14-18).

Nopa Centro Smithsonian de Investigaciones Ambientales kiijtoua achtouia ipan Tlaltipaktli amo tlauel ueliyaya pano tlauili, pampa tlen kiyaualtsaktok amo kikauayaya ma pano. Nojkia kiijtoua: “Nopa metano tlen onkayaya ajakatipa, mochiuayaya kej ayauitl tlen kitsakuayaya Tlaltipaktli”. Teipa “nopa ayauitl motlalanki uan iluikaktli mochijki azul”.

¿Kenijkatsa yolkej katli itstokej ipan Tlaltipaktli?

Génesis 1:20-27, kiijtoua achtoui yolkej michimej, totomej, tlapialmej katli nemij ipan tlali, uan teipa maseualmej. ¿Uan tlake kiijtouaj científicos? Inijuantij kiijtouaj achtoui neskej michimej, teipa tlapialmej katli chichij. Uan kema panok tonali, neskej maseualmej.

Se keskij maseualmej kiijtouaj amo sanse tlen Biblia kiijtoua ika tlen kipantijtokej científicos. Kemantika kiampa kiijtouaj pampa amo kikuamachilijtokej tlen Biblia tlamachtia.

Biblia amo kiijtoua tlen onka ipan iluikaktli uan ipan Tlaltipaktli san kipia 6,000 xiuitl. Nopaya kiijtoua nochi tlen onka elki tlen achtoui kichijchijkej (Génesis 1:1). Biblia amo kiijtoua kema nelia panok ni tlamantli.

Biblia amo kiijtoua Tlaltipaktli kichijchijkej ipan chikuasej tonali tlen kipia 24 horas. Kema Biblia kitekiuia tlajtoli tonali, kineki kiijtos tlen panok ipan se keski xiuitl. Se neskayotl, kema kichijchijkej nochi tlen onka ipan Tlaltipaktli uan nemilislti, mochijki ipan nopa chikuasej tonali tlen kiijtoua Génesis capítulo 1, panok miak xiuitl uan yeka Biblia kitokaxtia kej “tonali kema toTeotsij Jehová a kichijchijki iluikaktli uan Tlaltipaktli” (Génesis 2:4, TNM). Yeka, sejse tlen nopa chikuasej tonali, uelis uejkajki tlauel miak xiuitl.

Biblia amo kiijtoua tlaj kej panotias tonali nochi katli yoltokej mopatlatiasej. Ipan Génesis kiijtoua kinchijchijkej “nochi tlamantli tlapialmej” (Génesis 1:24, 25). Nopa tlajtoli “nochi tlamantli tlapialmej” kiijtosneki nochi katli amo sanse elij, uan ni tlajtoli amo kitekiuiaj científicos. Nojkia elij miak pamitl tlapialmej katli amo sanse. Yeka, uelis kej panotias tonali nesij kejuak mopatlatiauij nopa tlapialmej.

 Ta, ¿tlake timoiljuia?

Biblia kiijtoua kenijkatsa pejki nochi tlen onka ipan iluikaktli uan ipan Tlaltipaktli, uan nojkia kenijkatsa pejki nemilistli. Ximoiljui ni: tlaj Biblia amo ouij kej kiixtoma uan kiijtoua tlen xitlauak, ¿timoiljuia uelis mitspaleuis tijmatis ajkia kichijchijki tlen onka? Nopa Encyclopædia Britannica, kiijtoua: “Maske tonemilis nesi kejuak san neski. [...] Amo kiijixnamiki tlen kiijtouaj científicos ipan ni tonali”. b