¿Mitspaleuis tlaj tijmatis itstok Katli tlachijchijki?
¿Kenke tlauel ipati tijmatisej? Pampa tlaj ika nochi tlen onka kichiua xijneltoka itstok se toTeotsij katli kipia miak chikaualistli, uelis nojkia tijnekis tijmatis tlaj Biblia eli iaxka. Uan, tlaj timotemachis ipan tlen kiijtoua, tijselis ni tlateochiualistli:
Nochipa tiyolpakis
BIBLIA KIIJTOUA: ToTeotsij “kichijki ma uetsi atl uan ma onka pixkistli tlen kuali. Uan temakayaya nochi tlen monekiyaya para ma tlakuakaj uan para ma yolpakikaj” (Hechos 14:17).
¿TLAKE KIIJTOSNEKI? Nochi tlen onka eli se nemaktli tlen toTeotsij techmakatok. Nojua tlauel tiyolpakis kema tikitas ipan Biblia ya tlachijchijki pampa mitsiknelia.
Tijpantis tlen mitspaleuis
BIBLIA KIIJTOUA: “Kema toTeko kimakas se tlakatl tlalnamikilistli, [...] kimatis tlen melauak, uan tlen nelia kuali para kichiuas. Kena, tijmatis kejatsa uelis tijtlapejpenis nopa ojtli tlen más kuali” (Proverbios 2:9).
¿TLAKE KIIJTOSNEKI? ToTeotsij mitschijchijki, yeka kuali kimati tlake tlamantli uelis kichiuas xiyolpaki. Tlaj timomachtis Biblia, tijpantis tlen mitspaleuis ipan monemilis.
Tijmatis tlen timotlatsintokia
BIBLIA KIIJTOUA: “Uajka kena, [...] tikixmatis [toTeotsij]” (Proverbios 2:5).
¿TLAKE KIIJTOSNEKI? Tlaj tijneltokas itstok toTeotsij mitspaleuis tijmatis se keski tlamantli tlen tlauel ipati: ¿Kenke tiitstokej? ¿Kenke titlaijiyouiaj? ¿Tlake pano kema se akajya miki? Ipan Biblia tikitas kenijkatsa kinankilia ni tlajtlanili.
Timotemachis teipa kuali tiitstos
BIBLIA KIIJTOUA: “Na nijmati kuali nopa tlamantli tlen nijsenkajtok para inmojuantij [...]. Nijsenkajtok tlen kuali uan axtlen fiero, para nochi kisas kuali para inmojuantij teipa uan para inkiselisej tlen inkichiaj” (Jeremías 29:11).
¿TLAKE KIIJTOSNEKI? ToTeotsij kitenkajtok kitlamiltis tlen amo kuali, tlen techtlaijiyouiltia uan mikilistli. Tlaj timotemachia ipan tlen kitenkajtok, mitspaleuis xikijiyoui nochi tlen tikixnamikis.
