¿Kichijchijki toTeotsij nochi tlen onka o iselti mochijchijki? Kampa peua ni tlamachtili tikitaj amo sanse kinankiliaj ni tlajtlanili ixtlamatinij uan tlen Biblia tlamachtia. Se keskij maseualmej kineltokaj tlen tlamachtiaj ixtlamatinij uan sekij tlen Biblia tlamachtia. Yeka, miakej maseualmej tlauel kimanauiaj tlen moijtoua ipan se keski amochtli o tlen kiijtouaj ipan televisión, uan miakej amo kimatij tlake kineltokasej.

Uelis katli mitsmachtiaj mitsiljuijkej nochi tlen onka uan nemilistli iselti mochijchijki, uan amo kichijchijki se akajya. Maske kiampa mitsiljuijkej, ¿mitsnextilijkej kenke kiampa kiijtouaj? Uan maske uelis tikinkaktok katli tlamachtiaj ipan religiones kiijtouaj itstok se akajya Katli tlachijchijki, ¿mitsnextilijkej kenke kiampa tlamachtiaj? ¿O san mitsiljuijkej moneki tijneltokas toTeotsij pampa kiampa kiijtouaj?

Uelis miakpa timotlatsintokijtok ni tlamantli uan timoiljuia amo kema uelis tijmatis tlaj nelia itstok se akajya Katli tlachijchijki. Uan uelis nojkia timotlatsintokia tlaj tlauel ipati tijmatis ni tlamantli.

Ipan ni pilamochtsi tikitas se keski tlamantli tlen kinpaleuijtok se keskij maseualmej ma kineltokakaj nelnelia itstok Katli tlachijchijki. Nojkia, kiixtomas kenke tlauel ipati tijmatisej kenijkatsa pejki nemilistli.