¿Timoiljuia ipan ni tonali maseualmej más kiouijmatij kimatisej tlen melauak? Kiampa kinpano pampa ayokmo kuali kiitaj tlaj se tlamantli eli melauak o kej panotok, san kichiuaj tlen kiyolmatij o moiljuiaj para kuali. Uan miakej maseualmej ipan nochi Tlaltipaktli moiljuiaj amo aka kimati tlen melauak.

 Uejkajkia nojkia kiampa moiljuiyayaj. Kipia se dos mil xiuitl nopa tlanauatijketl tlen Roma, Poncio Pilato, kitlatsintokik Jesús: “¿Tlake eli tlen melauak?” (Juan 18:38). Maske Pilato moiljuiyaya Jesús amo kinankiliskia ni tlajtlanili tlauel ipati. Biblia kena kinankilia nopa tlajtlanili uan uelis mitspaleuis tijmatis tlen kena eli melauak uan tlen amo, maske miakej maseualmej amo kimatij.

¿Nelnelia uelis tijmatisej tlen melauak?

 Kena, kema ipan Biblia motekiuia nopa tlajtoli “tlen melauak” kiijtosneki kema se tlamantli nelnelia panotok o kema mochiua tlen kuali. Biblia techmachtia san ipan Jehová a Dios uelis tijpantisej tlen melauak uan nojkia kiijtoua eli nopa Dios “katli eli melauak” (Salmo 31:5, TNM). Biblia techmachtia tlen melauak ika Dios, uan kiixnextia kej se tlauili pampa kuali techyakana ipan ni tonali kampa miakej maseualmej amo kimatij tlen melauak (Salmo 43:3; Juan 17:17).

¿Kenijkatsa uelis tijmatisej tlen melauak?

 Dios amo kineki ma tijselikaj tlen melauak tlen uala ipan Biblia, yon ma tijneltokakaj se tlamantli san pampa kuali tijyolmatij. Ya kineki kuali ma timomachtikaj uan kuali ma tijtekiuikaj totlalnamikilis (Romanos 12:1). Nojkia kineki kuali ma tikixmatikaj uan ma tikiknelikaj ika nochi totlalnamikilis, uan kineki kuali ma tikitakaj tlaj tlen timomachtiaj ipan Biblia nelnelia melauak (Mateo 22:37, 38; Hechos 17:11).

¿Ajkia kiyolitik istlakatili?

 Biblia kiijtoua istlakatili pejki ika Dios ikualankaitaka, Satanás o Diablo. Uan nojkia kiijtoua “nochi istlakatili peua ipan ya” (Juan 8:44). Satanás kiistlakauik Dios ika tlen kiniljuik Adán uan Eva (Génesis 3:1-6, 13, 17-19; 5:5). Uan ipan ni tonali nojua kiijtojtiualajtok istlakatili tlen Dios uan amo kineki ma kimatikaj tlen melauak (Apocalipsis 12:9).

¿Kenke ipan ni tonali miakej istlakatij?

 Biblia kiijtoua tiitstokej ipan “itlamia tonali” uan Satanás nojua kinkajkayaua uan kinyakana maseualmej. Maseualmej istlakatij para kinkajkayauasej sekinok pampa kinekij san inijuantij kuali itstosej (2 Timoteo 3:1, 13). Nojkia ipan miak religiones momajtokej istlakatij. Biblia ipa kiijtojtoya “kintemosej tlamachtianij tlen kinmachtisej tlen inijuantij kinekij. Uan ayok kitlakakilisej tlen melauak” (2 Timoteo 4:3, 4).

¿Kenke tlauel ipati tlen melauak?

 Maseualmej moneki nochipa kiijtosej tlen melauak uan kiampa sekinok uelis motemachisej ipan inijuantij. Tlaj amo motemachisej amo uelis mouampojchiuasej uan axaka kuali itstos. Biblia kiijtoua Dios kineki ma tijneltokakaj tlen melauak. Nopaya kiijtoua: “Katli kiueyichiuaj moneki kikauasej ichikaualis ma kinpaleui uan nojkia moneki kineltokasej tlen melauak” (Juan 4:24). Tlaj tijpouas ipan Tlen Tematiltia nopa “Tlamachtili tlen kichiua amo kuali ma tikitakaj toTeotsij”, mitspaleuis tijmatis tlake tlamachtili amo melauak uan kiampa ayokmo tijneltokas.

¿Kenke Dios kineki ma tijmatikaj tlen melauak?

 Dios kineki nochipa xiitsto, yeka moneki timomachtis tlen melauak (1 Timoteo 2:4). Tlaj timomachtis Dios itlanauatiljuaj uan tijchiuas ipan monemilis, kuali timouampojchiuas iuaya (Salmo 15:1, 2). Dios kititlanki Jesús ipan Tlaltipaktli para kinpaleuis maseualmej ma kimatikaj tlen melauak. Ya kineki ma tijneltokakaj tlen Jesús tlamachtik (Mateo 17:5; Juan 18:37).

Dios kitlamiltis istlakatili

 Dios kinkualankaita katli kinkajkayauaj sekinok. Ya techiljuia kintsontlamiltis katli istlakatij (Salmo 5:6). Kema kichiuas tlen mosentlalijtok, katli “kiijtoua nochi tlen senkistok melauak uejkauas” para nochipa (Proverbios 12:19).