Miakej maseualmej uan katli kiijtouaj tlaneltokaj ipan Jesús, kiijtouaj tlen Biblia tlamachtia ayokmo tlauel kinpaleuia katli mosenkajtokej o kema se tlakatl uan se siuatl motekaj sansejko. Se keskij iglesias kinekij kichiuasej kej sekinok uan yeka ayokmo tlamachtiaj tlen achtouia tlamachtiyayaj. Nama, tlen amo kuali kiitaj kej kuali. Uajka, ¿ayokmo techpaleuia toTeotsij itlanauatiljuaj? Kena. Ma tikitakaj kenijkatsa.

 Nochi maseualmej moneki ma kinyakana toTeotsij, kiampa kimatisej tlen kuali uan tlen amo kuali. Ya kiampa techchijchijki. Biblia kiijtoua: “Se tlakatl axiaxka iyolis, niyon axyajaya tlen kinauatis tlen panos ipan iojui” (Jeremías 10:23). Maske Jehová a techkaua ma tijtlapejpenikaj tlen tijnekij tijchiuasej, ya amo techmakatok tlanauatili uan kiampa tikijtosej tlake kuali uan tlake amo kuali. ToTeotsij kineki ma timotemachikaj ipan ya (Proverbios 3:5).

 ToTeotsij itlanauatiljuaj ipan Biblia eltok. Ma tikitakaj ome tlamantli tlen kinextia kenke tlauel ipati.

•   ToTeotsij techchijchijki (Salmo 100:3). Ya kuali kimati tlake techpaleuis ma tiyolpakikaj, kuali ma tiitstokaj uan kuali ma tijyolmatikaj (Gálatas 6:7). Nojkia, kimati tlake techpanos tlaj amo tijchiuaj tlen techiljuia. Jehová kineki kuali ma tiitstokaj. Yeka, Biblia kiijtoua: “Na niDios niinmoTeko tlen niinmechmachtia para inkimatisej tlen kuali para inkichiuasej. Uan niinmechyakanas ipan nopa ojtli tlen kinamiki inkitokilisej” (Isaías 48:17).

•   Toyolo uelis techkajkayauas. Miakej maseualmej kiijtouaj uelis tijmatisej tlen kuali uan tlen amo kuali, tlaj tijchiuasej tlen toyolo kineki. Maske kiampa moiljuiaj, Biblia kiijtoua “ininyolo tlakamej más tlakajkayauaj uan mosisiniaj que nochi tlamantli” (Jeremías 17:9). Tlaj amo tijchiuaj tlen toTeotsij technauatia, uelis tijchiuasej tlamantli tlen amo kinamiki uan teipa tlauel titlaijiyouisej (Proverbios 28:26; Eclesiastés 10:2).

 Kena. ¿Kenke? Pampa Biblia kiijtoua tlen melauak tlen toTeotsij uan techmachtia kenijkatsa kinamiki timonejnemiltisej (1 Corintios 6:9-11; Gálatas 5:19-23). ToTeotsij kineki maseualmej ma kimatikaj tlen melauak (1 Timoteo 2:3, 4). Yeka, katli tlayakanaj ipan se religión, moneki tlamachtisej tlen nelia tlamachtia Biblia (Tito 1:7-9).

 Miakej maseualmej amo kinekij moyakanasej ika toTeotsij itlanauatiljuaj, yeka mosentiliaj ipan se religión kampa kiniljuiaj san tlen kinpaktia kikakisej (2 Timoteo 4:3). Maske kiampa kichiuaj, Biblia kiijtoua: “Teikneltikej nopa tlakamej tlen kiiljuiaj kuali tlen axkuali, uan tlen axkuali kiiljuiaj kuali” (Isaías 5:20). ToTeotsij kintlatsakuiltis katli tlayakanaj ipan se religión pampa amo tlamachtiaj kej ya kineki.

 Amo. Nochi katli kichiuaj tlen toTeotsij kipaktia, kichiuaj kej Jesús kichijki uan kichiuaj tlen tlamachtik. Jesús tlamachtik ma timoiknelikaj, ma timotlepanitakaj uan amo ma titechikoitakaj (Mateo 5:43, 44; 7:1).

 Cristo itokilijkauaj monekiyaya kichiuasej ipan ininnemilis tlen toTeotsij tlanauatia. Maske kiampa kichiuaskiaj, monekiyaya kiilnamikisej sekinok ueliskiaj kitlapejpenisej tlen kichiuasej (Mateo 10:14). Jesús amo kiniljuik ma kitekiuikaj política o seyok tlamantli uan kiampa kinchiualtiskiaj sekinok ma kitlepanitakaj toTeotsij itlanauatiljuaj (Juan 17:14, 16; 18:36).

 Kema tijchiuaj kampeka tijchiuasej ipan tonemilis toTeotsij itlanauatiljuaj, techpaleuia ipan ni tonali uan nojkia teipa (Salmo 19:8, 11). Ma tikitakaj kenijkatsa:

•   Techpaleuia ma tiyolpakikaj (Proverbios 29:6).

•   Kuali timouampojchiuaj ika toTeotsij (Proverbios 3:32).

•   ToTeotsij techpaleuis kema tikixnamikisej tlaouijkayotl (Proverbios 11:8).

•   Uelis tijpiasej nemilistli tlen axkema tlamis (Salmo 37:29).