Ipan ni tlamachtili tikitasej:

•  ¿Tlake moneki kichiuas se tetaj?

•  ¿Kenke se tetaj eli iyojtsi?

•  Tetajmej uan ininsiuapiljuaj

•  Tlajtoli tlen uelis kinpaleuis tetajmej

• Kema ayamo tlakati mokone. Tlaj nama kuali tiitstok iuaya monamik, nopa kinextis teipa tielis se kuali tetaj. Nopa amochtli Do Fathers Matter? (¿Ipati tlen kichiua se tetaj?) kiijtoua:

  “Tlaj se tlakatl kipaleuia isiua katli tlanemiltia ma kikoua tlen kipoloua, kiuika kampa tepajtijketl, kiita kej nesi ipilkone ipan ultrasonido uan kikaki kenijkatsa totomoka ipilyolo, nopa kichiuas ma momachili itstok inechka isiua uan ipilkone”.

  “Kema nosiua tlanemiltiyaya, amo nijnekiyaya ma momachili iselti. Yeka tlauel nijpaleuik uan sansejko titlakualtlalijkej kampa kochiskia topilkone, tijnekiyayaj tijpixtosej nochi kema tlakatiskia. Tlauel techpaktik tlen tijchijkej” (James).

  Texto tlen mitspaleuis: “Amo san ximoiljuikaj tlen tlamantli tlen inmechpaleuis. Nojkia ximoiljuikaj tlen kinpaleuis sekinok” (Filipenses 2:4).

• Kema tlakatis mokone. Ximauilti uan xijkuanaua mokone, kiampa tlauel inmoiknelisej. Nojkia, xijpaleui mosiua kema inkimokuitlauisej. Tlaj kiampa tijchiuas tijnextis tlauel tijpatiita mokone.

  “Tlaj kuali timouikas iuaya mokone, tijnextis tlauel tikiknelia. Iuaya ximauilti tlalchi, amo xipinaua uan xijchiua kej ya. Xikilnamiki, tlaj ta titeiknelia, mokone nojkia kiampa kichiuas” (Richard).

  Texto tlen mitspaleuis: “Tokoneuaj itstokej se regalo tlen TOTEKO. Kena, tlen tlakatij tlen totlakayo eltok keja se tlatlankayotl” (Salmo 127:3).

• Kema mokone moskaltijtia. Miakej kiijtouaj, konemej katli kuali mouikaj ininuaya inintatauaj, kuali momachtiaj, amo tlauel motekipachouaj, amo kitekiuiaj drogas uan kuali monejnemiltiaj. Yeka, xijchiua kampeka kuali timouikas iuaya mokone.

  “Nokone nechiljuik kema ayokmo itstoskia tochaj, tlauel kitemoskia tlen tikamanaltiyayaj kema tionpaxalouayayaj uan kema titlakuayayaj. Kemantika nikamanaltiyaya iuaya nokone ika tlamantli tlen tlauel ipati kema amo nijchiayaya. Kiampa panoyaya pampa nochipa tiitstoyaj sansejko” (Dennis).

  Texto tlen mitspaleuis: “Ximomokuitlauikaj keja inmonejnemiltiaj. Amo xinemikaj keja inijuantij tlen uiuitikej. Xinemikaj keja tlalnamikinij pampa inkiixmatij tlen melauak. Amo ximotonalpolokaj” (Efesios 5:15, 16).

Miakej maseualmej moiljuiaj san tetajmej moneki kinmakasej ininchampoyouaj tlen kinpoloua uan kinmokuitlauisej. Nojkia, pampa siuamej kimachiliaj tlen sekinok kiyolmatij, moneki se tenaj kinpaleuis kuali ma kiyolmatikaj ichampoyouaj (Deuteronomio 1:31; Isaías 49:15). Sekij tetajmej amo kiampa kichiuaj. Kemantika se tetaj kichiua tekitl tlen kichiua se tenana o se tenana kichiua se tekitl tlen kichiuaskia se tetaj. Maske kiampa kichiuaj, ixtlamatinij kiijtouaj san sejse tlen inijuantij uelij kinpaleuiaj ininchampoyouaj kuali ma itstokaj uan amo seyok. a

Tlen kipanok Judith Wallerstein kiampa kinextia, ya kinpaleuia tetajmej uan ininchampoyouaj. Ya kiijtoua tlake panok kema isiuapil, katli kipixtoya 12 xiuitl, kikuitikiski se carro. Isiuapil kinekiyaya itata ma yaui iuaya ipan ambulancia, pampa itata kipaleuiyaya amo ma majmaui. Uan kema ya itstoya ipan hospital, kinejki inana se tonal ma itsto iuaya uan ma kiyolchikaua. b

“Se tetaj kinpaleuia ichampoyouaj amo ma majmauikaj uan ma motemachikaj nochipa kinmokuitlauis, uan se tenaj uelis ouij kimatis kiampa kichiuas. Se tenaj kinextia tlauel kiniknelia ikoneuaj, uan kema kuali kintlakakilia kichiua kuali ma kiyolmatikaj. Tetaj uan tenaj sansejko mopaleuiaj” (Daniel).

Texto tlen mitspaleuis: “Tinotelpoka, xijtlakakili tlen motata uan monana mitsmachtiaj, uan amo xijuejkamajkaua inintlajtol” (Proverbios 1:8).

Siuapilmej kiitaj kenijkatsa elij inintatauaj, kiampa kimatij kenijkatsa kinamiki sekinok tlakamej ma kintlepanitakaj. Ma tikitakaj tlake uelis tijmachtis moichpoka.

• Kema kiitas kenijkatsa tieli ika mosiua. Tlaj tikiknelia uan tijtlepanita mosiua, moichpoka kimatis tlake kuajkuali tlamantli moneki kinextis katli iuaya monamiktis (1 Pedro 3:7).

• Kema kiitas kenijkatsa tieli ika ya. Tlaj kiitas tijtlepanita, ya nojkia motlepanitas uan kimatis sekinok tlakamej nojkia moneki kiampa kitlepanitasej.

  Uan tlaj san tikiljuijtos amo kuali tlen kichiua, ya moiljuis amo tleno ipati. Yeka uelis peuas kichiuas se keski tlamantli pampa kinekis kuali ma kiitakaj sekinok tlakamej katli amo kuali ininyolo.

  “Kema se ichpokatl kimati itata kipaleuia uan kiiknelia, amo kikajkayauas se tlakatl katli amo eliskia kuali iueue” (Wayne).