Isiua kimatki tlen kichiuayaya. Nochipa kiiljuiyaya ma kitlapojpoljui. Kiiljuik ayokmo kiampa kichiuaskia, uan kiampa kichijki se keski tonali. Pero teipa pejki sampa kiita, uan panok kej achtouia panotoya.

 ¿Nojkia kiampa mitspano? Tlaj kena, moneki timoyoliljuis kenijkatsa kiyolmati mosiua kema tikita pornografía uan tlake mitspaleuis ayokmo kiampa xijchiua. a

Ipan ni tlamachtili tikitasej:

•  Tlen moneki tijmatis

•  Tlen uelis tijchiuas

•  Tlaj moueue kiita pornografía

 Nopa pornografía uelis kichiuas ayokmo kuali ma itstokaj katli mosenkajtokej. Nopa siuatl peuas kikualankaitas iueue uan ayokmo motemachis ipan ya. b

 Tlaj se tlakatl kiita pornografía, isiua uelis kej ni kiyolmatis:

•   Kimatis kikajkayaua. Se siuatl katli itoka Sarah, kiijtoua: “Nijmatiyaya noueue kejuak ajachika nechkajkayauayaya ika seyok siuatl”.

•   Kimatis amo ipati. Se siuatl kiijtoua iueue kiitayaya pornografía, yeka moiljuiyaya amo eliyaya yejyektsi uan pinauayaya.

•   Moiljuis amo titemachtli. Helen kiijtoua: “Amo nimotemachia ipan nochi tlen kichiua noueue”.

•   Tlauel moyolkuesos. Catherine kiijtoua: “Tlauel nimoyolkuesouayaya pampa noueue kiitayaya pornografía”.

 Ximoiljui ni: Biblia kiijtoua se tlakatl moneki kiiknelis isiua (Efesios 5:25). Tlaj mosiua kiyolmati kej ni siuamej, ¿timoiljuia tijnextia tikiknelia?

 Kema se akajya kitlachilia pornografía ouij kimati kikauas. Stacey kiijtoua: “Noueue ayokmo kichichinki cigarro, marihuana uan ayokmo moiuintik. Pero tlauel ouij kimati ayokmo kiitas pornografía”.

 Tlaj ta kiampa mitspano, tlen ijkuilijtok tlatsintla uelis mitspaleuis ayokmo kema xikita pornografía.

•   Xijkuamachili kenke tlauel amo kuali. Katli kiita pornografía, san kineki kichiuas tlen ya kiyolpakiltia. Uan nopa kichiua katli mosenkajtokej ayokmo ma yolpakikaj pampa ayokmo moikneliaj, ayokmo motemachiaj ipan inijuantij uan motlauelkauaj. Nojkia kinextiaj amo kitlepanitaj Jehová, katli kichijki ma mosenkauakaj se tlakatl uan se siuatl.

   Texto tlen mitspaleuis: “Nochi ma kitlepanitakaj se tlakatl uan se siuatl tlen monamiktijtokej” (Hebreos 13:4).

•   Amo xijtlajtlakolti mosiua. Amo xikijto: “Amo nikitaskia pornografía tlaj nosiua nochipa kinextiskia nechiknelia”. Amo kinamiki timoiljuis pampa mosiua kichiua tlen amo kuali, yeka tikita pornografía.

   Texto tlen mitspaleuis: “Tlamantli fiero tlen se tlakatl o se siuatl tlauel kineki kichiuas ipan itlalnamikilis, ya nopa kiyoltilana” (Santiago 1:14).

•   Xikiljui mosiua nochi tlen tijchiua. Se tlakatl katli itoka Kevin, kiijtoua: “Nochipa nikiljuia nosiua tlen nijchijki ipan se tonal. Kema nikita se tlamantli tlen nechyoltilanki, ¿nojua nijtlachilijtoya o sejkanok nitlachixki? Pampa nochipa timonojnotsaj, nosiua kiita amo tleno nijtlatilia”.

   Texto tlen mitspaleuis: “Tinemij xitlauak [...] uan keja nopa tijnekiskiaj tijchiuasej nochipa” (Hebreos 13:18).

•   Kuali xitlachixto. Maske ya panok miak xiuitl uan timoiljuis ayokmo tikitas nopa tlamantli, teipa sampa uelis tikitas. Kevin, katli tikonilnamijkej, kiijtoua: “Matlaktli xiuitl amo nikitak pornografía uan nimoiljuik ayokmo kema nikitaskia. Pero nopa tlamantli nojua nechyoltilanayaya, eli kejuak se tlapiali katli kichixtok para kikuas se akajya”.

   Texto tlen mitspaleuis: “Tlen inmoiljuiaj inmoketsaj uan intetikej ipan Toteko, xijpiakaj cuidado para amo xiuetsikaj ipan tlajtlakoli” (1 Corintios 10:12).

•   Kema mitsyoltilanas se tlamantli, ximochia. Amo uelis tijchiuas ayokmo ma mitsyoltilana se tlamantli, pero kena uelis tijtlapejpenis tlaj tijchiuas tlen mitsyoltilana o amo. Tlaj timoiljuis ipan seyok tlamantli tlen ueliskia tijchiuas, mitspaleuis ayokmo ximoiljui ipan tlen mitsyoltilana.

   Texto tlen mitspaleuis: “Kineki sejse inmojuantij ma kinauati sejse itlakayo. Kineki ximonejnemiltikaj keja tlatsejtselolmej iixpa Toteko para nochi tlakamej inmechtlepanitasej. Axkineki para inkikauilisej inmotlajtlakolchijkatlanekilis ma inmechnauatis” (1 Tesalonicenses 4:4, 5).

•   Amo xikita tlen ueliskia kichiuas sampa ma mitsyoltilana tlen amo kuali. Nopa amochtli Querer no es poder (kitlajtolkuepki Gloria Vitale), kiijtoua: “Kema mitsyoltilana tlen amo kuali eliskia kejuak tijtlatiskia se cerillo. San monekis se kentsi gasolina [...] para tlalemenis”.

   Texto tlen mitspaleuis: “Xinechyakana [...] para axnechtlanis niyon se tlaixpanoli” (Salmo 119:133).

•   Xijpia moyolo. Uelis monekis panos miak tonali o miak xiuitl uan kiampa mosiua sampa motemachis ipan ta. Miakej kena ueltokej kiampa kichiuaj.

   Texto tlen mitspaleuis: “Se tlen teiknelia kipia iyolo ininuaya sekinok” (1 Corintios 13:4).