Kema tijtlapos Biblia san tikitas miak tlajkuiloli. Maske kiampa, ximoiljui Biblia eli kej kampa onka miak tlakualistli, maske amo nochi uelis tijkuas kena tiixuis.

 Tlaj tijneki ma mitspaleui tlen tijpoua ipan Biblia, moneki timosentlalis ipan tlen tijpoua. Ni tlamachtili mitspaleuis kiampa xijchiua.

Ipan ni tlamachtili tikitasej:

•  ¿Kenke moneki timosentlalis kema tijpouas Biblia?

•  ¿Kenijkatsa uelis mitspaleuis tlen tijpoua ipan Biblia?

•  Tlen telpokamej uan ichpokamej kiijtouaj

 Tlaj tijchiua kampeka kuali tijpouas Biblia tlauel mitspaleuis. Ximoiljui ipan ni neskayotl, tlaj se akajya kitlalia se bolsita de té ipan se taza tlen kipia totonikatl uan nima kikixtia, amo kimaka iajuiyaka, pero tlaj nopaya kikauas, nojua tlauel ajuiyak mokauas.

 Nojkia kiampa pano kema tijpoua Biblia. Amo san xijpojtiuetsi, moneki timoyoliljuis ipan tlen tijpoua. Kiampa asis ipan moyolo uan mokauas ipan motlalnamikilis. Kiampa kichiuayaya katli kiijkuilok Salmo 119, ya kiijtok: “Nimoyoliljuijtinemi se tonal” (Salmo 119:97).

 Nopa amo kiijtosneki moneki se tonal tijpojtos Biblia uan timoyoliljuijtos. Nopa salmista moyoliljuik ipan tlen kiijtouayaya toTeotsij iTlajtol. Nopa kipaleuik kuali ma kitlapejpeni tlen kichiuaskia (Salmo 119:98-100).

 “Se tonali, nonana nechiljuik: ‘Se semana kipia chikome tonali tlaj ta tijtekiuia miak tonali ipan tlen mitspaktia, amo timoiljuia ¿kinamiki tijkixtis tonali uan tijchiuas tlen Jehová kipaktia?’” (Melanie).

 Tlaj kuali tijmati tlen kiijtouaj toTeotsij itlanauatiljuaj, mitspaleuis kuali xijtlapejpeni tlen tijchiuas, kej kema tijnekis kuali tikintlapejpenis mouampoyouaj o kema mitsyoltilanas tlen amo kuali.

•   Xijmajto tlen tijchiuas. Se ichpokatl katli itoka Julia kiijtoua: “Kuali ximoiljui tlake tijpouas, kema tijpouas uan kanke tijpouas”.

•   Kuali xikita kanke uelis titlapouas. Se ichpokatl katli itoka Gianna kiijtoua: “Xikiniljui motatauaj kema titlapouas, kiampa inijuantij amo kichiuasej tlen kichiuas amo ximosentlali”.

   Tlaj kema titlapoua tijtekiuia se tablet o se celular, xijchiua amo ma tsilini. Nojkia uelis tijtekiuis Biblia ika amatl. Ixtlamatinij kiijtouaj tlaj tijpouas se tlamantli ika amatl mitspaleuis kuali xijkuamachili uan ouij tijmatis tijchiuas nopa kema titlapouas ipan se celular o tablet.

   “Ouij nijmati kema nitlapoua ipan no teléfono, pampa tsilini, tlami batería o amo nijpia internet. Uan kema nitlapoua ika amatl san moneki nijpias kuali tlauili” (Elena).

•   Achtoui ximomaijto. Xikiljui Jehová ma mitspaleui tijkuamachilis, tikilnamikis uan tijchiuas tlen tijpouas ipan nopa tonali (Santiago 1:5).

   Tlaj nelnelia tijneki Jehová ma mitspaleui, xijtemo sekinok tlamachtili tlen mouika ika tlen tijpoua. ¿Kenijkatsa uelis tijchiuas? Tlaj tijtekiuia nopa aplicacion JW Library o tijpoua Biblia ipan internet, uelis tijpacholis ipan se versiculo uan tijpantis sekinok tlamachtili tlen uelis mitspaleuis.

•   Ximotlatsintoki. “¿Tlake nechmachtia ni tlapoualistli tlen Jehová?”, “¿Nechmachtia se tlamantli tlen Jehová tlen nojkia uelis nijchiuas?” (Efesios 5:1). “¿Ni tlapoualistli nechmachtia se tlamantli tlen uelis nijchiuas ipan nonemilis?” (Salmo 119:105). “¿Kenijkatsa tlen nijpojtok nechpaleuis ma nikinyolchikaua sekinok?” (Romanos 1:11).

   Nojkia ximotlajtlani: “¿Kenijkatsa tlen nijpoua mouika ika tlen tlauel pankisa ipan Biblia?”. Nopa tlajtlanili eli tlauel ipati. ¿Kenke? Pampa nochi tlen ijkuilijtok ipan Biblia mouika ika nopa tlamachtili tlen tlauel pankisa tlen kenijkatsa toTeotsij kiueyitlalis itoka ika itlanauatijkayo, kinextis san ya kinamiki tlanauatis uan san ya kuali kichiua.