¿Timajmaui kema timoiljuia tijmaktilis monemilis Jehová uan timoatsonpoliuiltis? Tlaj kiampa tijyolmati, ni tlamachtili mitspaleuis ayokmo ximajmaui.

Ipan ni tlamachtili tikitasej ni:

•  ¿Uan tlaj nijchiuas se ueyi tlajtlakoli kema ya nimoatsonpoliuiltijtos?

•  ¿Tlake uelis nijchiuas tlaj nimajmaui nijchiuas sekinok tekitl kema ya nimoatsonpoliuiltijtos?

•  ¿Uan tlaj nimoiljuia amo kinamiki nijtekipanos Jehová?

•  Tlen telpokamej uan ichpokamej kiijtouaj

 ¿Kenke mitstekipachoua? Uelis tikixmati se akajya katli kikixtijkej tlen tlanechikoli pampa kichijki tlen amo kuali uan timoiljuia nojkia uelis kiampa mitspanos (1 Corintios 5:11-13).

 “Kema nimoiljuiyaya nimoatsonpoliuiltis, tlauel nimajmauiyaya pampa nimoiljuiyaya teipa ueliskia nijchiuas tlen amo kuali. Nimoiljuiyaya tlauel nikinpinaualtiskia notatauaj” (Rebekah).

 Texto tlen mitspaleuis: “Nochi tlajtlakolchijkatlakamej ma kikauakaj nopa fiero ojtli […], uan ma mokuepakaj noka na niDios niinmoTeko. Uan na temachtli nikintlasojtlas uan nikintlapojpoljuis” (Isaías 55:7).

 Ximoiljui ni: Kema se akajya kichiua se ueyi tlajtlakoli uan amo moyolkuepa, ayokmo eli se toikni. Maske kiampa, Jehová kintlapojpoljuia katli amo moueyimatij, katli moyolkuepaj uan katli kikauaj ma kintlalnamikti (Salmo 103:13, 14; 2 Corintios 7:11).

 Maske nochi titlajtlakolejkej, ta uelis tikijiyouis uan kiampa amo tijchiuas tlen mitsyoltilana pampa toTeotsij mitspaleuis (1 Corintios 10:13). ¿Ajkia moneki kitlapejpenis tlen tijchiuas? ¿Ta o sekinok maseualmej?

 “Nimajmauiyaya nimoatsonpoliuiltis pampa nimoiljuiyaya teipa ueliskia nitlajtlakolchiuas. Teipa nikitak tlauel amo kuali tlaj amo nimoatsonpoliuiltiskia. Amo kinamiki nimotekipachos ika tlen panos teipa pampa nopa uelis nechtsakuilis uan amo nijchiuas tlen nimosentlalijtok” (Karen).

 Uelis tikijtosej: Tlaj ta amo tijneki titlajtlakolchiuas, uajka amo tijchiuas. Kiampa kichijtokej miakej Jehová itekipanojkauaj. Uajka, san ta uelis tijtlapejpenis tlen tijchiuas (Filipenses 2:12).

 ¿Tijneki tijmatis sekinok tlamantli? Xijpoua nopa tlamachtili “¿Qué puedo hacer para resistir las tentaciones?”.

 ¿Kenke mitstekipachoua? Uelis tikinixmati se keskij telpokamej katli amo itstokej ininuaya ininchampoyouaj yon ininuampoyouaj pampa yajtokej uejka tlatekipanotoj, uan timotekipachoua pampa timoiljuia sekinok nojkia kiampa kinekisej xijchiua.

 “Kema timoatsonpoliuiltis, uelis tijtekipanos Jehová ipan sekinok tlamantli. Sekij telpokamej mochiaj pampa moiljuiaj ayamo uelis kichiuasej nopa tekitl, uan sekij amo uelij kiampa tlatekipanouaj pampa ouij kej itstokej” (Marie).

 Texto tlen mitspaleuis: “Moneki sejse tojuantij ma timotekitlachilikaj para tikitasej intla iixpa toTeko kuali timonejnemiltiaj o axtle. Uan intla kuali tonemilis, uajka ma tipakikaj, pero axaka ma paki san pampa kichijtok tlen achi kuali kej se iikni” (Gálatas 6:4).

 Ximoiljui ni: Amo xikita tlen sekinok kichiuaj ika tlen ta tijchiua, uan ximosentlali tijchiuas tlen kiijtoua Marcos 12:30: “Xikikneli toTeko Dios ika nochi moyolo”.

 Nopaya kiijtoua xikikneli toTeko Dios ika nochi moyolo uan amo ika sekinok ininyolo. Tlaj nelia tikiknelia Jehová, tijchiuas nochi tlen ta tiueli uan kiampa tijtekipanos ika miak pakilistli.

 “Maske tlauel ipati kema se akajya moatsonpoliuiltia, amo eli se tlamamali. Tlaj kuali tikintlapejpenia mouampoyouaj, inijuantij tlauel mitspaleuisej. Ika yolik uelis mitsmakasej sekinok tekitl ipan tlanechikoli, uan nopa kichiuas tlauel xiyolpaki. Uan tlaj timoiljuijtok timoatsonpoliuiltis teipa, nopa amo mitspaleuis” (Julia).

 Uelis tikijtosej: Tlaj nochipa tijtlaskamatilis Jehová pampa tlauel mitsiknelia, kichiuas nojua xijtekipano ika nochi moyolo (1 Juan 4:19).

 ¿Tijneki tijmatis sekinok tlamantli? Xijpoua nopa tlamachtili “¿Soy una persona responsable?”.

 ¿Kenke mitstekipachoua? Jehová kinauatia nochi tlen onka uan san ya tlauel ueyi. Yeka uelis timoiljuia: “Ya amo kimati tlaj niitstok”.

 “Notatauaj uejkajkia kitekipanouaj Jehová uan kuali mouampojchijtokej iuaya, yeka na nimoiljuiyaya kuali nimouampojchijtoya iuaya toTeotsij pampa kiampa kichiuayayaj inijuantij. Nimoiljuiyaya Jehová san inijuantij kinyoltilanki uan na amo” (Natalie).

 Texto tlen mitspaleuis: “Axaka ueli nechtokilis ika iselti. San noTata tlen nechtitlanki uelis kiyoltilanas se tlakatl para ma nechtokili” (Juan 6:44).

 Ximoiljui ni: Tlaj timoiljuijtok timoatsonpoliuiltis, uelis Jehová mitsyoltilana pampa kineki xijnechkaui uan kuali ximouampojchiua iuaya. Uajka, ¿tlake tijchiuas?

 Xikilnamiki, san Jehová kiijtoua tlake moneki kichiuasej katli kinekij elisej iuampoyouaj uan amo ta yon sekinok maseualmej. Yeka Biblia kiijtoua tlaj tijnechkauis toTeotsij, ya nojkia mitsnechkauis (Santiago 4:8).

 “Jehová kinextia mitsiknelia pampa kikajki xikixmati uan kineki ximouampojchiua iuaya. Yeka, kema timoiljuis amo kinamiki tijtekipanos Jehová, xikilnamiki ya amo kiampa moiljuia uan amo kema mokuapoloua” (Selina).

 Uelis tikijtosej: Tlaj ya tijchiua tlen Biblia kiijtoua moneki kichiuasej katli kinekij moatsonpoliuiltisej, uajka uelis tijueyichiuas Jehová. Uan kinamiki san ya xijueyichiua (Apocalipsis 4:11).

 ¿Tijneki tijmatis sekinok tlamantli? Xijpoua nopa tlamachtili “¿Kenke tlauel moneki timomaijtosej?”.