Nopa Centro para el Control y la Prevención de Enfermedades tlen Estados Unidos, kiijtoua kema kintlatsintokijkej telpokamej katli kipiaj 15-19 xiuitl, nechka tlajko tlen inijuantij kiijtojkej kichijkej sexo oral. a “Tlaj tikamanaltis iuaya se telpokatl tlen sexo oral, mitsiljuis miakej kiampa kichiuaj”, kiijtoua Sharlene Azam, katli kichijki nopa amochtli Oral Sex Is the New Goodnight Kiss (Sexo oral: kej monauatijteuaj ika tlayoua ipan ni tonali). Nojkia kiijtoua: “Telpokamej amo moiljuiaj tlaj eli sanse kej kema motekaj sansejko”.

•  ¿Ta tlake timoiljuia?

•  ¿Tlake kinpano katli kiampa kichiuaj?

•  ¿Kenke moneki tijmatisej?

 Xikijto tlaj kena o amo.

1.   ¿Uelis konekuis se ichpokatl tlaj kichiuas sexo oral?

   1.  A. Kena

   2.  E. Amo

2.   ¿Uelis timokokos tlaj tijchiuas sexo oral?

   1.  A. Kena

   2.  E. Amo

3.   ¿Katli kichiuaj sexo oral eli sanse kej tlen kichiuaj katli motekaj sansejko?

   1.  A. Kena

   2.  E. Amo

 Xikita tlaj titlanankilik sanse ika tlen kiijtoua tlatsintla.

1.   ¿Uelis konekuis se ichpokatl tlaj kichiuas sexo oral?

    Kej monankilia: Amo. Uan yeka miakej maseualmej moiljuiaj amo tleno kinpanos tlaj kichiuasej sexo oral.

2.   ¿Uelis timokokos tlaj tijchiuas sexo oral?

    Kej monankilia: Kena. Katli kichiuaj sexo oral uelis mokokosej, uan kipiasej hepatitis A o B, verrugas genitales, gonorrea, herpes, sida o sífilis.

3.   ¿Katli kichiuaj sexo oral eli sanse kej tlen kichiuaj katli motekaj sansejko?

    Kej monankilia: Kena. Nochi tlamantli tlen maseualmej mochiuiliaj kampa amo kinamiki, kej kema mipipitsouaj o mochichij, kema mochiuiliaj miak tlamantli ipan inintsinteno (sexo anal) o kema moijitskiaj kampa amo kinamiki, eli sanse kej tlen kichiuaj katli motekaj sansejko.

 Ma tikitakaj tlake kiijtoua Biblia tlen sexo oral.

 Biblia kiijtoua: “ToTeko kineki [...] para axaka tlen inmojuantij ma kichiua tlamantli ika se tlen axinamik” (1 Tesalonicenses 4:3).

 Nopa tlajtoli “kichiua tlamantli ika se tlen axinamik”, tlen motekiuik kema moijkuilok Biblia, kiijtosneki nochi tlamantli tlen amo kuali tlen mochiuiliaj maseualmej katli amo mosenkajtokej, kej kema motekaj sansejko, kema kichiuaj sexo oral, kema mochiuiliaj miak tlamantli ipan inintsinteno (sexo anal) o kema moijitskiaj kampa amo kinamiki. Katli kichiua nochi ni tlamantli tlauel tlaijiyouis uan ayokmo kuali mouikas iuaya toTeotsij (1 Pedro 3:12).

 Biblia kiijtoua: “Tlen kichiua tlen ueli ika tlen axinamik kitlanauia itlakayo” (1 Corintios 6:18).

 Katli kichiuaj sexo oral, uelis mokokosej o ayokmo kuali kitekipanosej toTeotsij. Uan nojkia uelis kichiuas se akajya amo kuali ma kiyolmati. Nopa amochtli Cómo hablar de sexo con los adolescentes para que te escuchen, kiijtoua: “Amo san katli moteka iuaya se akajya kimati san mauiltijkej iuaya, motlajtlakoltia uan kimati amo tleno ipati. Nojkia kiampa kiyolmatij katli mochiuiliaj tlen amo kinamiki iuaya se seyok. Katli kichiua ni tlamantli eli sanse kej tlaj motekaskia iuaya se akajya”.

 Biblia kiijtoua: “Na niDios niinmoTeko [Jehová] tlen niinmechmachtia para inkimatisej tlen kuali para inkichiuasej” (Isaías 48:17).

 ¿Timoiljuia mitspaleuia nopa tlanauatili tlen toTeotsij kitlalijtok kampa kiijtoua ajkia inijuantij uelis motekasej sansejko? ¿O timoiljuia amo mitskaua tijchiuas tlen ta tijneki? Ximoiljui ipan ni tlamantli: ipan se carretera kampa panoj miakej carrojmej, kitlalijtokej tlen kiijtoua moneki amo tlauel chikauak tijuikas mocarro uan kanke moneki timoketsas. ¿Timoiljuia tlen kitlalijtokej mitspaleuia o amo? ¿Tlake panoskia tlaj ta o sekinok maseualmej amo kichiuasej tlen kiijtoua nopaya?

 Nojkia kiampa pano ika toTeotsij itlanauatiljuaj, pampa tlaj amo tijchiuas tlen ya kiijtoua, titlaijiyouis (Gálatas 6:7). “Tlaj amo tijchiuas tlen tijneltoka yon tlen ika timoyakana, uan tijchiuas tlamantli tlen amo kuali, tijnextis amo timotlepanita”, kiijtoua nopa amochtli Sex Smart (Kuali ximoiljui tlaj timotekas iuaya se akajya). Uan tlaj tijchiuas tlen Jehová kipaktia, tijnextis timoyakana ika kuajkuali tlamantli uan amo mitsyolkokos motlalnamikilis (1 Pedro 3:16).