Biblia kiijtoua toTeotsij amo kineki ma timomekatikaj (1 Tesalonicenses 4:3). Nopaya kiijtoua kema se akajya momekatia eli kema se siuatl moteka iuaya seyok siuatl o se tlakatl iuaya seyok tlakatl uan kema se tlakatl uan se siuatl motekaj maske amo mosenkajtokej.

•  ¿Kenke toTeotsij tlauel kipatiita ma mosenkauakaj se tlakatl uan se siuatl?

•  ¿Kinamiki itstosej sansejko kema ayamo mosenkauaj pampa kinekij kiitasej tlaj kuali itstosej?

•  ¿Tlake uelis kinpaleuis ma yolpakikaj katli mosenkajtokej?

•   ToTeotsij kichijki ma mosenkauakaj. Kiampa kichijki kema kinsansejkotilik nopa achtoui tlakatl uan nopa achtoui siuatl (Génesis 2:22-24). ToTeotsij amo kinekiyaya nopa siuatl uan nopa tlakatl ma itstokaj sansejko tlaj amo mosenkajtoyaj.

•   ToTeotsij kimati tlake techpaleuis. ToTeotsij kichijki ma mosenkauakaj se tlakatl iuaya se siuatl pampa kinekiyaya nochipa sansejko ma itstokaj. Ya kiampa kinejki kichiuas pampa nopa kinpaleuiskia ma kinmokuitlauikaj uan kuali ma itstokaj ininchampoyouaj. Ximoiljui ni: tlaj tijnekij tijkualtlalisej se tlamantli pampa tijnekij tijtekiuisej, achtoui moneki tijpouasej nopa amatl kampa kiijtoua kenijkatsa tijchiuasej. Uan tlaj tijnekij tiitstosej ika pakilistli ininuaya tochampoyouaj, moneki tijchiuasej tlen Biblia kiijtoua. Tlaj nochipa kiampa tijchiuasej, kuali tiitstosej (Isaías 48:17, 18).

•   Tlaj se tlakatl uan se siuatl motekaj sansejko maske amo mosenkajtokej uelis kinpanos tlen amo kuali. Uelis kipiasej se ininkone maske amo kinekiyayaj, momauasej ika se ueyi kokolistli uan amo kuali kiyolmatisej. a

•   ToTeotsij kinmakak maseualmej se ueyi tlateochiualistli: ma kinpiakaj ininkoneuaj kema motekaj sansejko. Nopa eli se ueyi tlateochiualistli tlen toTeotsij kinmakatok. Ya tlauel kipatiita nemilistli. Yeka, kineki ma motekakaj sansejko san katli mosenkajtokej, kiampa kinextisej kitlepanitaj nopa tlateochiualistli uan tlen toTeotsij tlanauatia (Hebreos 13:4).

 Katli kinekij itstosej ika pakilistli kema moamasenkauasej amo kinamiki achtoui “itstosej sansejko” uan kiampa kiitasej tlaj kuali mouikasej o amo. Tlauel kinpaleuis nochipa ma itstokaj sansejko tlaj inijuantij mosentikapaleuiaj kema kiixnamikij kuesoli. b Nopa uelis kichiuasej tlaj moamasenkauaj (Mateo 19:6).

 Maske katli moamasenkauaj kipiaj kuesoli, kena uelis itstosej ika pakilistli tlaj kichiuaj tlen Biblia tetlajtolmaka. Ma tikitakaj se keski textos:

•   Achtoui xikita tlake kipaleuis monamik uan amo ximoiljui san ipan ta (1 Corintios 7:3-5; Filipenses 2:3, 4).

•   Xijchiuakaj kampeka nojua tlauel inmoiknelisej uan inmotlepanitasej mojmostla (Efesios 5:25, 33).

•   Kuali ximoiljuikaj tlake inkiijtosej kema inmokamanaljuisej (Proverbios 12:18).

•   Xijpiakaj inmoyolo uan nima ximotlapojpoljuikaj (Colosenses 3:13, 14).