¿Kenke Jesús imikilis kinmakixtia miakej?

Ma kakisti ipan

Tlen Biblia kiijtoua

Jehová kititlanki iKone Jesús ma temaktiliki inemilis, kiampa kinmakixtiskia maseualmej tlen tlajtlakoli uan mikilistli. Biblia kiijtoua Jesús ieso elki nopa tlaxtlauili tlen monejki temakas (Efesios 1:7; 1 Pedro 1:18, 19). Yeka Jesús kiijtok: “Nimotemaktilis uan nimikis para nitlaxtlauas tlen moneki para nikintojtomas miakej tlakamej” (Mateo 20:28).

¿Kenke moneki ma techmakixtikaj?

Adán elki nopa achtoui tlakatl tlen toTeotsij kichijchijki uan ya amo eliyaya tlajtlakole. Uan maske ueltoskia itstos nochipa, amo tlaneltokak, yeka mijki (Génesis 3:17-19). Adán techpanoltilik tlajtlakoli (Romanos 5:12). Yeka, Biblia kiijtoua Adán techtemaktilik ipan tlajtlakoli uan mikilistli (Romanos 7:14). Amo aka ueliskia techkixtilis tlajtlakoli pampa nochi titlajtlakolejkej (Salmo 49:7, 8).

ToTeotsij kintlasojtlak iteipaixuiuaj Adán pampa tlauel tlaijiyouijtoyaj (Juan 3:16). ToTeotsij eli xitlauak yeka amo ueliskia kintlapojpoljuis san kejueli (Salmo 89:14; Romanos 3:23-26). Ya tlauel kiniknelia maseualmej, yeka temaktilik iKone uan kiampa amo san kintlapojpoljuiskia, nojkia teipa kitlamiltiskia tlajtlakoli (Romanos 5:6-8). Tlen Jehová kitekiuik elki nopa tlamakixtili.

¿Kenijkatsa techpaleuia tlamakixtili?

Ipan Biblia nopa tlajtoli tlamakixtili kiijtosneki ni eyi tlamantli:

Kema moixtlaua se tlamantli (Números 3:46, 47).
Kema se akajya tlaxtlaua pampa kineki kimanauis se maseuali o sampa kipias se tlamantli (Éxodo 21:30).
Monekiyaya moixtlauas sanse ipati ika tlen polijki. a

Ma tikitakaj kenijkatsa mouika ni tlamantli ika Jesús imikilis.

Kema moixtlaua se tlamantli. Biblia kiijtoua toTeotsij “tlaxtlajki patiyo” uan kiampa kinkojki itekipanojkauaj (1 Corintios 6:20; 7:23). Ika Jesús imikilis Jehová kinkojki “nochi xinachtli tlakamej, uan tlen tikamatij nochi tlamantli tlajtoli [...] uan tlen tieuaj ipan nochi tlaltinij” (Apocalipsis 5:8, 9).
Techmanauia. Jesús imikilis techtojtoma tlen tlajtlakoli (1 Corintios 1:30; Colosenses 1:14; Hebreos 9:15).
Sanse ipati. Nopa nemilistli tlen Jesús temakak eliyaya sanse kej tlen Adán kipolok (1 Corintios 15:21, 22, 45, 46). Biblia kiijtoua: “Pampa Adán axkichijki tlen toTeko Dios kiiljuik, nochi tlakamej mokuepkej tlajtlakolchiuanij, pero Jesucristo kena, kitlamichijki nochi tlen kiiljuik toTeko Dios, uan yeka ama miak titlakamej uelis timochiuasej tixitlauakej iixpa” (Romanos 5:19). Ni kinextia kenke imikilis se tlakatl uelis techmakixtis tlen tlajtlakoli. Uajka, Jesús “motemakak uan mijki ipampa nochi tlakamej” uan katli kipatiitaj Jesús imikilis kinpaleuis ma momakixtikaj (1 Timoteo 2:5, 6).

a Ipan Biblia motlajtolkuepki nopa tlajtoli “tlamakixtili” tlen kiijtosneki ipati se tlamantli tlen mokouayaya o kema se akajya temakayaya tlen patiyo pampa kinekiyaya kipias se tlamantli. Se neskayotl, ika hebreo nopa tlajtoli kafár kiijtosneki kiixtsakua (Génesis 6:14). Motekiuia kema techtlapojpoljuiaj totlajtlakoljuaj (Salmo 65:3). Nopa tlajtoli kófer nojkia kiijtosneki kema se akajya kiixtlaua se tlamantli tlen kinamiki uan kiampa momakixtis o kimakixtis se akajya (Éxodo 21:30). Ika griego nopa tlajtoli lýtron, motlajtolkuepa kej tlamakixtili uan nojkia kiijtosneki “tlaxtlauas tlen moneki uan kiampa temakixtis” (Mateo 20:28, The New Testament in Modern Speech, de R. F. Weymouth). Kema griegos tlajkuilouayayaj, kitekiuiyayaj ni tlajtoli kema monekiyaya moixtlauas se tlamantli uan kiampa kimakixtiskiaj se tlateuijketl o se tlatekipanojketl.