Biblia techiljuia ma titemakakaj tlen tijpiaj ika nochi toyolo uan pampa nelnelia tijnekij tijchiuasej tlen kuali. Kema kiampa tijchiuaj, amo san tijpaleuiaj nopa maseuali katli kiselia, nojkia techpaleuia tojuantij (Proverbios 11:25; Lucas 6:38). Jesús kiijtok: “Más pakilistli kiselia tlen temaka se tlenijki, uan axkeja tlen kiselia” (Hechos 20:35).

•  ¿Kema kinamiki titemakasej se tlenijki?

•  ¿Kema amo kinamiki titemakasej se tlenijki?

•  Textos kampa kiijtoua kenijkatsa techpaleuia tlaj titemakaj tlen tijpiaj

 Kema titemakaj se tlamantli ika nochi toyolo, tlauel techpaleuia. Biblia kiijtoua: “Sejse inmojuantij moneki temakas keja ipa moyoliljuijtok para temakas. Amo xitemakakaj ika kuesoli, niyon pampa seyok inmechfuerzajuia, pampa toTeko kiiknelia tlen temaka ika pakilistli” (2 Corintios 9:7).

 ToTeotsij kineki itekipanojkauaj ma titemakakaj tlen tijpiaj ika nochi toyolo (Santiago 1:27). Kema tikinpaleuiaj katli kinpoloua se tlamantli, sansejko titekitij iuaya toTeko. Ya kiita kejuak techtlauikilia uan kineki techtlaxtlauis pampa kiampa tijchiuaj (Proverbios 19:17). Biblia kiijtoua toTeotsij kintlaxtlauis katli temakaj tlen kipiaj ika nochi ininyolo (Lucas 14:12-​14).

 Kema tijchiuaj pampa tijnekij toselti timopaleuisej. Se neskayotl:

•   Pampa tijnekij sekinok ma techitakaj (Mateo 6:2).

•   Pampa tijnekij ma techmakakaj se tlenijki (Lucas 14:12-14).

•   Pampa tijnekij ma techmakixti toTeotsij (Salmo 49:6, 7).

 Kema tlen titemakaj tlapaleuia ma mochiua tlen toTeotsij amo kipaktia. Se neskayotl, amo kinamikiskia tijmakasej tomij se akajya katli ueliskia kichiuas apuestas, iuintis o kitekiuis drogas (1 Corintios 6:9, 10; 2 Corintios 7:1). Nojkia, amo kinamikiskia tijmakasej tomij katli amo kineki tekitis maske kena ueli (2 Tesalonicenses 3:10).

 Tlaj tlauel titemakaj uan yeka ayokmo uelij tijchiuaj tlen toTeotsij technauatijtok. Biblia kiijtoua se tlakatl moneki kinmakas ichampoyouaj tlen ika mopanoltisej (1 Timoteo 5:8). Yeka, tlauel amo kuali eliskia tlaj ayokmo kuali kinmokuitlauiskia ichampoyouaj pampa kinmaka sekinok tlen kipia. Jesús amo kuali kinitayaya katli amo kinekiyayaj kinpaleuisej inintatauaj katli ya ueuejtixtoyaj pampa kiijtouayayaj tlen kipixtoyaj eliyaya “tlaiyokatlalili para kimaktilisej toTeko” (Marcos 7:9-13).