Jesús kinmakixtik maseualmej katli kuali kitekipanouaj toTeotsij kema temaktilik inemilis (Mateo 20:28). Yeka, Biblia kiijtoua Jesús eli “inintemakixtijka nochi tlen itstokej ipan ni Tlaltipaktli” (1 Juan 4:14). Nojkia kiijtoua “axaka seyok tlen uelis techmakixtis tlen totlajtlakoljuaj, pampa toTeko Dios axkitlalijtok seyok tlen kipia tekiuejkayotl ipan ni Tlaltipaktli para techmakixtis” (Hechos 4:12).

 Jesús mijki uan kiampa kinmakixtiskia nochi katli tlaneltokaskiaj ipan ya (Hebreos 2:9; Juan 3:16). Teipa, toTeotsij kiyolkuik uan Jesús tlakuepilik iluikak kej se iluikaejketl (Hechos 3:15). Uan nama Jesús “ueli kinmakixtis para nochipa nochi tlakamej tlen kinechkauiaj toTeko ipampa tlen yajaya kichijki, pampa yajaya itstos para nochipa uan ajachika momaijtoua ika toTeko toTata ininpampa” (Hebreos 7:25).

¿Kenke moneki Jesús ma eli totlapaleuijka o totlatempaleuijka?

 Nochi titlajtlakolejkej (Romanos 3:23). Nopa tlajtlakoli kichiua ma timikikaj uan techuejkatlalia tlen toTeotsij (Romanos 6:23). Jesús eli “inintlapaleuijka” nochi katli tlaneltokaj ipan imikilis (1 Juan 2:1). Jesús motemaktilik pampa kinejki techmakixtis. Yeka ueli kiiljuia toTeotsij ma techtlakakili kema timomaijtouaj uan ma techtlapojpoljui (Mateo 1:21; Romanos 8:34). ToTeotsij kichiua tlen Jesús kiiljuia pampa kitlajtlania tlen ya kipaktia. Jesús ualajki ipan Tlaltipaktli pampa iTata “kititlanki para temakixtis” (Juan 3:17).

¿Uelis timomanauisej san pampa titlaneltokaj ipan Jesús?

 Amo. Maske tlauel ipati titlaneltokasej ipan Jesús nojkia moneki tijchiuasej sekinok tlamantli (Hechos 16:30, 31). Biblia kiijtoua: “Inkimatij intla se tlakatl axkipia itonal ipan itlakayo, uajka ya miktok. Uan se tlakatl tlen kiijtoua kineltoka toTeko, pero axkichiua tlamantli tlen kuali, ya miktok itlaneltokilis” (Santiago 2:26). Tlaj tijnekij timomanauisej moneki:

•   Timomachtisej tlen Jesús uan iTata, Jehová (Juan 17:3).

•   Tijnextisej titlaneltokaj ipan Jehová uan Jesús (Juan 12:44; 14:1).

•   Tijchiuasej tlen technauatiaj, kiampa tijnextisej titlaneltokaj (Lucas 6:46; 1 Juan 2:17). Jesús kiijtok amo momakixtisej nochi katli kiiljuisej “toueyiTeko”, san momanauisej katli kichiuaj tlen iTata kineki (Mateo 7:21).

•   Tijnextisej titlaneltokaj maske tikixnamikisej tlaouijkayotl. Jesús kiijtok: “Ajkeya kiijiyouis nochi tlen panotiualas hasta itlamia tonali, nijmakixtis” (Mateo 24:13).