Kena, Diablo nelnelia itstok uan eli se iluikaejketl katli moueyimatki uan kiijixnamijki toTeotsij. Uan Biblia kiijtoua ‘kinauatia [...] ni Tlaltipaktli’ (Juan 14:30; Efesios 6:11, 12). Biblia kitokaxtia ika se keski tokajyotl tlen kinextia kenijkatsa eli. Ma tikitakaj se keski:

•   Satanás, tlen kiijtosneki Tlaijixnamijketl (Job 1:6).

•   Diablo, tlen kiijtosneki Teistlakauijketl (Apocalipsis 12:9).

•   Kouatl, ipan Biblia ni tlajtoli nojkia kiijtosneki kema se akajya tekajkayaua (2 Corintios 11:3).

•   Axkualtlakatl (Mateo 4:3).

•   Istlakatiketl (Juan 8:44).

Amo kiixnextia tlen amo kuali yon tlen eltok ipan ininyolo maseualmej

 Miakej moiljuiaj Diablo kiixnextia tlen amo kuali o se tlamantli tlen amo kuali tlen eltok ipan ininyolo maseualmej uan ipan toTeotsij. Nojkia, ipan Biblia kiijtoua se tonali toTeotsij mokamanaljuik iuaya Diablo. Tlaj toTeotsij eli senkistok xitlauak uan tlatsejtseloltik, ¿kenijkatsa uelis nojkia kichiuas tlen amo kuali? (Deuteronomio 32:4; Job 2:1-6). Diablo kiyejyekok Jesús, katli amo kipia tlajtlakoli, pampa kinekiyaya ma tlajtlakolchiua (Mateo 4:8-10; 1 Juan 3:5). Biblia tlamachtia Satanás nelnelia itstok uan amo san kiixnextia tlen amo kuali.

 Miakej maseualmej kiijtouaj Diablo amo nelia itstok. ¿Nelia tlen kiijtouaj? Amo, pampa Biblia kiijtoua Satanás tlauel tekajkayaua uan kineki ma tijchiuakaj tlen ya kineki (2 Tesalonicenses 2:9, 10). Uan kichijtok miakej maseualmej ma kineltokakaj amo nelia itstok (2 Corintios 4:4).

 Tlen amo melauak: Lucifer eli seyok tokajyotl tlen ika kitokaxtiaj Diablo.

 Tlen melauak: Ipan se keski Biblias nopa tlajtoli ika hebreo tlen motlajtolkuepa kej “Lucifer”, kiijtosneki ‘tlen tlauia’ (Isaías 14:12). Ni tlajtoli moijtoua ipan se tlajtolpanextili uan nopaya kiijtoua kenijkatsa toTeotsij kintsontlamiltiskia katli tlanauatiyayaj ipan Babilonia pampa moueyimatiyayaj (Isaías 14:4, 13-20). Kema kintsontlamiltijkej tlanauatianij tlen Babilonia, pejkej kinpinajtiaj uan yeka kiniljuiyayaj ‘tlen tlauia’.

 Tlen amo melauak: Diablo kitekipanoua toTeotsij.

 Tlen melauak: Diablo eli toTeotsij ikualankaitaka uan amo itekipanojka. Nojkia eli ininkualankaitaka toTeotsij itekipanojkauaj, yeka kintlatsakuiltia uan kinistlakauia (1 Pedro 5:8; Apocalipsis 12:10).