Kema mochiuas nopa ueyi tlaijiyouilistli, maseualmej tlauel momajmatisej pampa amo kema kiampa panotoya. Tlajtolpanextili tlen eltok ipan Biblia kiijtoua ni mochiuas ipan “itlamia tonali” (2 Timoteo 3:1; Daniel 12:4). Marcos 13:19 kiijtoua: “Ipan nopa tonali onkas se tlaijiyouilistli. Desde kema pejki nochi tlen onka, nochi tlen Dios kichijchijki hasta nama, amo onkatok se tlaijiyouilistli kej nopa, uan ayokmo kema sampa onkas” (Daniel 12:1; Mateo 24:21, 22).

¿Tlake panos kema mochijtos nopa ueyi tlaijiyouilistli?

•   Kintsontlamiltisej religiones tlen amo melauak. San ipan se tlalochtli, kintsontlamiltisej religiones tlen amo melauak (Apocalipsis 17:1, 5; 18:9, 10, 21). Nopa Naciones Unidas kiniljuisej tekichiuanij ma kintsontlamiltikaj religiones tlen amo melauak, kiampa kichiuasej tlen Dios mosentlalijtok (Apocalipsis 17:3, 15-18). a

•   Kinekisej kitsontlamiltisej religión tlen melauak. Se keskij altepemej katli mosentikapaleuiaj kinekisej kintsontlamiltisej katli itstosej ipan religión tlen melauak. Kema Ezequiel kiitak kejuak se temiktli, kintokaxtik ni tekichiuanij Gog tlen tlali Magog. Maske kiampa kinekisej kichiuasej, Dios amo kinkauas ma kintsontlamiltikaj itekipanojkauaj (Ezequiel 38:1, 2, 9-12, 18-23).

•   Kintlajtolsenkauasej katli itstosej ipan Tlaltipaktli. Jesús kintlajtolsenkauas uan “kinxelos nopa maseualmej, sanse kej se tlapialmokuitlauijketl kinxeloua pilborregojtsitsij tlen chivojmej” (Mateo 25:31-33). Kiitas tlaj nopa maseualmej kinpaleuiaj iikniuaj o katli tlanauatisej iuaya ipan iluikak, uan kiampa kiitas tlaj kinamiki itstosej (Mateo 25:34-46).

•   Kinsentilisej katli tlanauatisej iuaya Jesús ipan iluikak. Nochi katli amo kitlauelkajkej Dios uan kintlapejpenijtokej tlanauatisej iuaya Jesús, mikisej uan moyolkuisej iluikak pampa nopaya itstosej (Mateo 24:31; 1 Corintios 15:50-53; 1 Tesalonicenses 4:15-17).

•   Mochiuas Armagedón. Biblia kej ni kitokaxtia Armagedón: “Ueyi tlateuijkayotl ika toTeko Tlen Kipia Nochi Chikaualistli” uan “tonal tlen TOTEKO” (Apocalipsis 16:14, 16; Isaías 13:9; 2 Pedro 3:12). Katli Jesús kinitas amo kinamiki itstosej, kintsontlamiltisej kema mochiuas ni ueyi tlauilankayotl (Sofonías 1:18; 2 Tesalonicenses 1:6-10). Nojkia kintsontlamiltisej nochi tekichiuanij, katli Biblia kinixnextia kej se fiero tlapiali katli kipia chikome itsonteko (Apocalipsis 19:19-21).

¿Tlake panos kema ya tlantos ueyi tlaijiyouilistli?

•   Kintsakuasej Satanás uan amo kuali ajakamej. Se ángel katli kipia miak chikaualistli, kintsakuas Satanás uan amo kuali ajakamej ipan se “ostotl tlen tlauel uejkatla hasta axkipia itsintla” (Apocalipsis 20:​1-3). Nopaya itstosej kejuak miktokej pampa ayokmo tleno uelis kichiuasej. Kema itstosej ipan nopa ostotl, kejuak tsaktosej, yeka Satanás ayokmo tleno uelis kichiuas (Apocalipsis 20:7).

•   Peuas nopa Mil Xiuitl. Ipan nopa tonali iTlanauatijkayo Dios peuas tlanauatis uan kinteochiuas maseualmej (Apocalipsis 5:9, 10; 20:4, 6). Ipan Tlaltipaktli ya momanauijtosej miakej maseualmej tlen nopa ueyi tlaijiyouilistli uan kiitasej kenijkatsa peuas tlanauatis iTlanauatijkayo Dios (Apocalipsis 7:9, 14; Salmo 37:9-11).