Jehová itlajtoltemakauaj tikintlepanitaj tekichiuanij uan tlamantli tlen kiixnextia se altepetl. Uan amo tikintlaijiljuiaj katli kitlajpalouaj bandera, kiijtouaj juramento uan uikaj himno nacional.

 Maske tikintlepanitaj, Jehová itlajtoltemakauaj amo tijchiuaj ni tlamantli pampa amo tijnekij tikixpanosej tlen kiijtoua Biblia. Uan tikintlaskamatiliaj katli kitlepanitaj tlen tijneltokaj sanse kej tojuantij tikintlepanitaj.

Ipan ni tlamachtili tijnankilisej ni tlajtlanili:

•  ¿Tlake kiijtoua Biblia tlen ni tlamantli?

•  ¿Tlake tijchiuaj kema tekichiuanij techtetsopaj?

•  ¿Tikinpaleuiaj katli kinekij kipatlasej se keski tlamantli?

 Ma tikitakaj ome tlamantli ipan Biblia tlen ika timoyakanaj:

•   San toTeotsij kinamiki tijueyichiuasej. Biblia kiijtoua: “Xijueyimati san Toteko Dios uan san ya xijtekipano” (Lucas 4:8). Himno nacional uan juramento tlen kichiuiliaj bandera kiijtoua nochipa san ininaltepe kimanauisej uan kiueyichiuasej. Yeka totlalnamikilis amo techkaua ma tijchiuakaj ni tlamantli.

   Nojkia, Jehová itlajtoltemakauaj moiljuiaj kema kitlajpalouaj bandera eli kejuak kiueyichiuaj, uan Biblia kiijtoua nopa amo kuali (1 Corintios 10:14). Sekij maseualmej katli momachtiaj tlen uejkajkia panok, kiijtouaj bandera eli sanse kej teotsitsij tlen maseualmej kinueyichiuaj. Nopa historiador Carlton Hayes kiijtok: “Ipan se altepetl tlauel kiueyichiuaj ininbandera, eli kejuak se religión”. a Kema Daniel Mannix kamanaltiyaya tlen achtoui Cristo itokilijkauaj, kiijtok: “Cristo itokilijkauaj amo kinejkej [...] kitlamajmakasej tlanauatijketl tlen [Roma], tlen nama eliskia sanse ika kema kitlajpalouaj bandera”. b

  Maske Jehová itlajtoltemakauaj amo tijtlajpalouaj bandera yon sekinok tlamantli, nojkia amo tijtsatsayatsaj, tijtlatiaj yon tijchiuaj seyok tlamantli tlen kinextis amo tijtlepanitaj.

•   Iixpa Jehová nochi tielij sanse (Hechos 10:34, 35). Biblia kiijtoua toTeotsij “kinchijki nochi tlamantli tlakamej ipan nochi tlaltinij” (Hechos 17:26). Yeka Jehová itlajtoltemakauaj timoiljuiaj amo kinamiki tikinpatiitasej san se keskij maseualmej tlen se altepetl uan sekij amo. Tojuantij tikintlepanitaj nochi maseualmej, maske euaj ipan seyok altepetl o itstokej sejkanok (1 Pedro 2:17).

 Jehová itlajtoltemakauaj amo tikinijixnamikij tekichiuanij. Uan tijneltokaj toTeotsij kinkajtok tekichiuanij ma kinyakanakaj maseualmej (Romanos 13:1-7). Nojkia tijmatij moneki tijchiuasej tlen inijuantij technauatiaj (Lucas 20:25).

 Uan ¿tlake tijchiuasej tlaj se tlanauatili kiijtoua ma tijchiuakaj tlen Jehová amo kipaktia? Kemantika, uelis kintitlanilisej tekichiuanij se amatl kampa kiniljuisej ma kipatlakaj nopa tlanauatili. c Uan kema amo kinekij kipatlasej, nojua tikintlepanitaj, pero tijmatij “moneki tijneltokilisej Toteko Dios achtoui uan axtlakamej” (Hechos 5:29).

 Amo, amo timokalakiaj ipan nopa tlamantli. Amo tijtlajpalouaj bandera, amo tikijtouaj juramento yon amo tiuikaj himno nacional pampa tijneltokaj tlen Biblia kiijtoua, uan amo pampa tijnekij tikinijixnamikisej tekichiuanij.