Amo, tojuantij amo tikinchiualtiaj maseualmej ma kipatlakaj ininreligión, pampa ipan pilamochtsi Tlen Tematiltia kiijtok: “Tlauel amo kuali eliskia tlaj tikinchiualtisej maseualmej ma kipatlakaj ininreligión”. a Amo tijchiuaj nopa pampa:

•   Jesús amo kema kinchiualtik maseualmej ma kichiuakaj tlen kinmachtiyaya. Ya kimatiyaya amo miakej kitlakakiliskiaj (Mateo 7:​13, 14). Se tonali, kema se keskij itokilijkauaj kitlauelkajkej pampa amo kineltokakej tlen kinmachtik, amo kinchiualtik ma mokauakaj, ya kinkajki ma yakaj (Juan 6:​60-​62, 66-​68).

•   Jesús kinmachtik itokilijkauaj amo kinamikiyaya kinchiualtisej maseualmej ma kipatlakaj inintlaneltokilis. Ya kinmachtik monekiyaya kichiuasej kampeka kintemosej katli kinekiskiaj kintlakakilisej (Mateo 10:​7, 11-​14).

•   Amo kuali kema se akajya kipatla ireligión pampa kichiualtiaj. ToTeotsij kineki maseualmej ma kiueyichiuakaj ika nochi ininyolo uan amo pampa se akajya kinchiualtia (Deuteronomio 6:​4, 5; Mateo 22:37, 38).

 ToTeotsij iTlajtol tijmoyauaj “hasta kampa más uejuejka pilaltepetsitsij ipan ni Tlaltipaktli” uan tijchiuaj “kampa ueli uan kajkalpa”, kej Biblia kiijtoua (Hechos 1:8; 10:42; 20:20). Kej kinpanok nopa achtoui Cristo itokilijkauaj, kemantika maseualmej kiijtouaj tikinchiualtiaj maseualmej ma kalakikaj ipan toreligión (Hechos 18:12, 13). Nochi tlen kiijtouaj amo nelia, pampa tojuantij tijtlepanitaj tlen maseualmej kineltokaj uan tijnekij ma kimatikaj tlen Biblia kiijtoua uan kiampa ma kitlapejpenikaj ipan tlake religión itstosej.

 Amo tikinchiualtiaj sekinok ma kineltokakaj tlen tijneltokaj, amo tijtekiuiaj religión pampa tijnekij ma mokalakikaj ipan política yon amo titepaleuiaj ika tomij o ika seyok tlamantli pampa tijnekij ma mochiuakaj Jehová itlajtoltemakauaj. Tojuantij amo tijchiuaj kej sekij katli kiijtouaj kitokiliaj Cristo uan amo kichiuaj tlen ya tlamachtik. b

 Biblia kiijtoua kena, pampa techpouilia kenijkatsa miakej maseualmej kitlapejpenijkej kiueyichiuasej toTeotsij katli melauak uan amo kitokilijkej inintatauaj ireligión. Ya nopa kichijki Abraham, Rut, se keskij katli euayayaj Atenas uan apóstol Pablo (Josué 24:2; Rut 1:​14-​16; Hechos 17:22, 30-​34; Gálatas 1:​14, 23). Biblia nojkia kiijtoua se akajya uelis kitlapejpenis ayokmo kinekis itstos ipan religión tlen melauak, maske nopa tlauel amo kuali (1 Juan 2:​19).

 Nopa ONU kiijtok nopa Declaración Universal de Derechos Humanos eli “katli kichijki nochi tlanauatili tlen nochi kinamiki kichiuasej”, uan kiijtoua nochi uelis “kipatlasej ininreligión o tlen kineltokaj”. Uan nojkia kiijtoua se akajya uelis momachtis tlen ya kinekis, kiselis uan kimoyauas tlen momachtijtok o tlen sekinok kiijtouaj. Ni kiijtosneki uelis kimoyauas tlen momachtijtok ipan se religión. c Maske tiuelij tijchiuaj ni, nojkia moneki tijmajtosej sekinok nojkia uelis kimanauisej tlen kineltokaj uan amo kineltokasej tlen tojuantij tijneltokaj.

 Amo. Pampa Biblia techiljuia ma tikintlepanitakaj nochi maseualmej, maske seyok ininreligión (1 Pedro 2:​17). Jehová itlajtoltemakauaj kintlepanitaj inintatauaj maske kineltokaj seyok tlamantli, pampa ya nopa kiijtoua Biblia ma kichiuakaj (Efesios 6:​2, 3).

 Amo nochi kinpaktia tlen Biblia tlamachtia. Se siuatl katli moskaltik Zambia kiijtok: “Kampa na nieua, kema se akajya kipatlayaya ireligión eliskia [...] kejuak kiixpanoskia ialtepe uan ichampoyouaj”. Maske kiampa kipanok, kema nojua ichpokatl pejki momachtia ininuaya Jehová itlajtoltemakauaj uan kipatlak ireligión. Ya kiijtoua: “Notatauaj miakpa nechiljuijkej amo kinpaktiyaya tlen nijchiuayaya uan nojkia kiijtojkej tlauel nikinyolkokojtoya. Tlauel ouij nijmatki, pampa na nijnekiyaya kuali ma nechitakaj. [...] Na nimosentlalik nijtekipanos toTeotsij uan amo nijchiuas tlen momajtokej kichiuaj ipan religiones, nopa amo kiijtosneki nikintlauelkajtok nochampoyouaj”. d