Ipan xiuitl 1950 kichijkej san tlajko tlen nopa Traducción del Nuevo Mundo. Kema kichijkej, pejkej kiijtouaj ni Biblia amo sanse kitlajtolkueptokej kej sekinok, uan sekij kiijtouaj amo xitlauak kitlajtolkuepkej. a Ma tikitakaj se keski tlamantli tlen kinextia nopa Traducción del Nuevo Mundo amo sanse kej sekinok Biblias.

•   Kiitstiajkej amatlajkuiloli tlen temachtli. Kema kitlajtolkuepkej nopa Traducción del Nuevo Mundo ika inglés, kitekiuijkej nopa amatlajkuiloli tlen tlauel uejkajtok kiijkuilojkej uan tlen melauak katli kiasitokej ipan ni tonali. Kej kiijkuilojkej Biblia, kinextia kitekiuijkej amatlajkuiloli tlen tlauel yankuik kiasitokej tlajtolkuepanij. Ipan xiuitl 1611 kema kitlajtolkuepkej nopa Biblia King James Version (Versión del Rey Jacobo), kitekiuijkej miak amatlajkuiloli tlen amo nochi xitlauak kiijkuilojtoyaj uan amo tlen tlauel uejkajtoya kiijkuilojtoyaj, uan kema kitlajtolkuepkej nopa Traducción del Nuevo Mundo amo kiampa kichijkej.

•   Kitlajtolkuepkej kej nesi ipan nopa amatlajkuiloli tlen kiijkuilojkej uejkajkia. Katli kitlajtolkuepkej nopa Traducción del Nuevo Mundo kichijkej kampeka kiijkuilosej toTeotsij itlalnamikilis kej kichijkej katli kiijkuilojkej Biblia (2 Timoteo 3:​16). Sekij katli kitlajtolkueptokej Biblia kiitakej tlauel moneki kiijkuilosej san tlen maseualmej moiljuiaj, uan amo tlen toTeotsij kiijtoua. Yeka, ipan miak Biblias kiixpolojtokej toTeotsij itoka, uan san kiijkuilojtokej Dios o toTeko.

•   Amo kipatlakej tlen tlauel ipati. Miakej katli kitlajtolkuepaj Biblia san kiixtomaj tlen ijkuilijtok. Yeka kemantika amo kiijkuilouaj nochi tlen tlauel ipati o kiijkuilouaj sekinok tlamantli tlen amo kiijtoua. Nopa Traducción del Nuevo Mundo kiijkuilojkej kej uala ipan amatlajkuiloli tlen uejkajkia moijkuilok, kitekiuijkej tlajtoli katli miakej kikuamachiliaj uan kiitakej amo ma mopatla yon se tlamachtili.

 Amochtli tlen amo uala ipan Biblia. Nopa Biblias katli kitekiuiaj ipan iglesia Católica uan ipan iglesia Ortodoxa kipia amochtli tlen amo melauak, nochi ni amochtli amo eliyayaj tlen nopa canon judío, kampa nesi nochi nopa amochtli katli kiiljuiaj Escrituras Hebreas. Yeka Biblia kiijtoua ‘toTeko kinkauilik judeaeuanij iTlajtol’ (Romanos 3:1, 2). Yeka, ipan nopa Traducción del Nuevo Mundo uan sekinok Biblias, kuali kichijkej katli tlajtolkuepkej kema amo kitlalilijkej nopa amochtli tlen amo melauak.

 Versículos tlen amo kipia Biblia. Sekij Biblias kipia versículos o sekinok tlajtoli tlen amo nesi ipan amatlajkuiloli tlen tlauel uejkajtok kiijkuilojkej, nopa kiijkuilojkej teipa. Ipan ni tonali miak Biblias kej nopa Traducción del Nuevo Mundo amo kipia nopa versículos, uan tlaj kipia, kiijkuilouaj ni amo nesi ipan amatlajkuiloli tlen uejkajkia kiijkuilojkej uan kiijkuilouaj amo tlauel temachtli. b

 Kej kitlajtolkuepkej. Kema kitlajtolkuepaj kej ijkuilijtok sejse tlajtoli, amo kitlajtolkuepaj xitlauak tlen nelia kiijtoua, kej tlen Jesús kiijtok ipan Mateo 5:3. Kemantika kitlajtolkuepaj kej “xipakikaj inmojuantij [...] inteikneltsitsij” (Itlajtol Toteco Náhuatl de la Huasteca Oriental, Biblia de Jerusalén, Nácar-Colunga, Reina Valera uan Torres Amat). Nopa tlajtoli “inteikneltsitsij”, kitlajtolkuepkej kej ijkuilijtok, yeka amo kuali mokuamachilia. Sekij moiljuiaj Jesús kiijtok moneki amo titlatominpiasej o timoueyimatisej. Ya kinekiyaya kiijtos yolpakij katli kinekij toTeotsij ma kinyakana. Yeka, ipan Traducción del Nuevo Mundo xitlauak kitlajtolkuepkej tlen Jesús kiijtok pampa kiijkuilojkej “katli kimatij moneki momachtisej toTeotsij iTlajtol”. c

•   Edgar J. Goodspeed katli kiixmatij kej se tlajtolkuepketl uan kuali kiixmati Biblia, ipan diciembre 8, xiuitl 1950, kiijkuilok se amatlajkuiloli kampa kiijtok ni tlen nopa Traducción del Nuevo Mundo de las Escrituras Griegas Cristianas: “Tlauel nechpaktia tlen inkichiuaj ipan inmotlanechikol uan kenijkatsa intlamachtiaj ipan nochi Tlaltipaktli. Nojkia tlauel nechpaktia kenijkatsa kuali inkitlajtolkuepkej, amo ouij se kikuamachilia uan temachtli. Nesi tlauel kuali inmomachtijtokej uan nimotemachia xitlauak inkitlajtolkuepkej nopa Biblia”.

•   Allen Wikgren katli tlamachtia ipan Universidad de Chicago, kiijtok nopa Biblia Traducción del Nuevo Mundo kitlajtolkueptokej ika tlajtoli kej ipan ni tonali tikamanaltij uan kema tijpouas amo moneki tikitas sekinok Biblias. Nojkia kiijtok kuali “kimatkej kenijkatsa kitlajtolkuepasej se keski textos tlen Biblia” (The Interpreter’s Bible, volumen 1, iamayo 99).

•   Alexander Thomson katli tlauel kuali kiixmati Biblia kiijkuilok tlen nopa Traducción del Nuevo Mundo de las Escrituras Griegas Cristianas: “Nima nesi ni Biblia kitlajtolkuepkej katli tlauel momachtijtokej, uan kichijkej kampeka xitlauak kitlajtolkuepasej ika inglés tlen ijkuilijtok ika tlajtoli griego” (The Differentiator, abril 1952, iamayo 52).

•   Maske nopa teólogo Charles Francis Potter kiijtok amo aka kej nopa kitlajtolkueptoya se keski textos, kiijtok ni: “Katli kitlajtolkuepkej nopa Biblia uan amo tijmatij inintoka, kuali kimatkej kenijkatsa kitlajtolkuepasej kej kinamiki uan kej nesiyaya ipan nopa amatl tlen kiijkuilojkej uejkajkia ika tlajtoli griego uan hebreo” (The Faiths Men Live By, iamayo 300).

•   Maske Robert M. McCoy kiijtok nopa Traducción del Nuevo Mundo amo sanse kej sekinok, kiijtok nojkia kipixtok tlen kuali. Uan nojkia kiijtok ni: “Kej kitlajtolkuepkej nopa Nuevo Testamento [katli kichijkej Jehová itlajtoltemakauaj] kinextia kichijkej katli tlauel ixtlamatij uan kuali kimatij kenijkatsa kitlajtolkuepasej tlamachtili tlen uala ipan Biblia katli sekinok kiouijmatij” (Andover Newton Quarterly, enero 1963, iamayo 31).

•   Maske nopa tlamachtijketl Samuel MacLean Gilmour amo kipaktik kej kitlajtolkuepkej se keski textos ipan Traducción del Nuevo Mundo, kiijtok katli tlajtolkuepkej “tlauel kuali kimatij nopa tlajtoli griego” (Andover Newton Quarterly, septiembre 1966, iamayo 26).

•   Ika nopa Traducción del Nuevo Mundo katli nojkia nesi ipan se Biblia interlineal tlen nopa Escrituras Griegas Cristianas (Kingdom Interlinear Translation of the Greek Scriptures), nopa tlamachtijketl Thomas N. Winter, kiijkuilok: “Katli kitlajtolkuepkej ni Biblia kitekiuijkej tlajtoli tlen ipan ni tonali motekiuia, kichijkej kej kinamiki uan xitlauak kitlajtolkuepkej” (The Classical Journal, abril uan mayo 1974, iamayo 376).

•   Ipan 1989, nopa tlamachtijketl Benjamin Kedar, katli momachtia hebreo ipan altepetl Israel, kiijtok: “Kema nikita tlake tlajtoli motekiuia ipan Biblia ika hebreo uan kej kitlajtolkueptokej, nochipa nijtlachilia nopa Biblia Traducción del Nuevo Mundo ika inglés. Kema nijtlachilia, nochipa nikita kema kitlajtolkuepkej nopa Biblia nelnelia kinekiyayaj xitlauak kikuamachilisej tlen kiijkuilojkej uejkajkia”.

•   Jason David BeDuhn, katli tlamachtia Estudios Religiosos, kuali kitlachilik kej kitlajtolkueptokej chiknaui Biblias ika inglés tlen tlauel kiixmatij uan kiijkuilok: “Nikita nopa Traducción del Nuevo Mundo kena xitlauak kitlajtolkueptokej, amo kej nopa sekinok Biblias katli nijtlachilik”. Uan maske miakej maseualmej uan katli kuali kiixmatij Biblia kiijtouaj katli kitlajtolkuepkej ni Biblia kiijkuilojkej ika tlen inijuantij kineltokaj, BeDuhn kiijtok: “Nesi amo sanse kej sekinok Biblias, pampa xitlauak kitlajtolkuepkej, kej kinamiki uan kuali kitlajtolkuepkej sejse tlajtoli kej uejkajkia kiijkuilojkej nopa Nuevo Testamento” (Truth in Translation, iamayo 163 uan 165).

•   Xabier Pikaza, katli kuali kiixmati Biblia uan tlamachtia Teología, kiijkuilok ni tlen nopa Traducción del Nuevo Mundo ika español: “Miakej katli ixtlamatij, católicos uan protestantes kiijtouaj ipan ni Biblia mokuapolojtokej uan kitlajtolkueptokej san kej inijuantij kinekij. Maske kiampa kiijtouaj, kema tijpouas nochi ni Biblia, tikitas temachtli toTeotsij iTlajtol, tlen uelis kinpaleuis maseualmej ma itstokaj ipan nopa yankuik Tlaltipaktli, o kampa tekichiuas nopa Mesías” (Nuevo Comentario Bíblico San Jerónimo, iamayo 778).