Nitlakatki ipan Calgary, Alberta (Canadá). Kema ni eliyaya niokichpil notatauaj moamaxolejkej, teipa nonana uan na timochantitoj ininuaya itatauaj. Inijuantij tlauel techikneliyayaj uan tlauel niyolpakiyaya. Nikilnamiki kema nieliyaya niokichpil niitstoya ika tlaseuilistli.

 Kema nijpixtoya chikome xiuitl mopatlak nonemilis. Notatauaj sampa mosenkajkej uan timochantitoj San Luis, Misuri (Estados Unidos). Nima nikitak notata tlauel mosisiniyaya. Se neskayotl, kema niajki ipan nopa yankuik escuela se keskij konemej nechmakilijkej uan amo nimomanauik uan kema niasito nochaj notata kimatki. Ya tlauel kualanki uan nojua tlauel nechmakilik. Yeka nojkia pejki nimoteuia ininuaya sekinok okichpilmej.

 Notata tlauel mosisiniyaya yeka peuayayaj motlaijiljuiaj uan momakiliaj. Kema nijpixtoya 11 xiuitl pejki nijtekiuia drogas uan nitlaiyaya. Nopa kichijki nojua tlauel ma nimosisini uan nochipa nimoteuiyaya ininuaya katli nimopantiyaya ipan ojtli. Kema tlanki nimomachtia secundaria, tlauel nimosisiniyaya.

 Kema nijpixtoya 18 xiuitl, nimoamatlalik ipan Infantería de Marina de Estados Unidos. Na ipa nimosisiniyaya uan nopona nechmachtijkej ma nitemikti. Kema panotoya makuili xiuitl nikiski, pampa nijnekiyaya nimomachtis Psicología uan nitekitis ipan FBI. Pejki nimomachtia ipan Estados Unidos uan teipa ipan Canadá.

 Kema nimomachtiyaya ipan universidad tlauel nimoyolkokok pampa maseualmej amo motekipachouayayaj ipan sekinok. Nimoiljuiyaya amo tleno ipati uan amo aka ueliskia kisenkauas nochi kuesoli. Yeka, nimoiljuik nochipa kiampa tiitstoskiaj.

 Amo nijmatiyaya tlake nijchiuas ipan nonemilis, yeka pejki nitlai, nijtekiuia drogas, san nimoiljuiyaya nitlatominpias uan niauilnemis. Nojkia san nimoiljuiyaya ipan tlake iljuitl niaskia uan iuaya ajkia nimotekaskia. Ipan Infantería de Marina nechmachtijkej kuali nitlateuis yeka nimoiljuiyaya amo aka uelis nechtlanis, nochipa nimoteuiyaya ininuaya sekinok. Uan kema nikitayaya se akajya kichiuiliyayaj tlen amo kuali nijmanauiyaya pampa nimoiljuiyaya nijchiuayaya tlen kuali. Nopa amo nelia noselti nimokajkayauayaya tlauel nimosisiniyaya.

 Se tonali nouampox uan na timotlatijtoyaj kampa amo ueliskiaj techitasej pampa tlauel tijtekiuijtoyaj drogas uan tijkualtlaliyayaj mariuana para tijnamakasej, nouampox nechtlatsintokik tlaj nitlaneltoka ipan Dios. Nikiljuik: “Tlaj Dios tlauel kintlaijiyouiltia maseualmej ¡amo nijneki nikixmatis!”. Ika ualmostla, se katli iuaya nitekitiskia eliyaya se Jehová itlajtoltemajka uan nechtlatsintokik: “¿Timoiljuia Dios kipia tlajtlakoli pampa maseualmej tlaijiyouiaj?”. Nimosentlachilik, pampa sampa nechchiuilijkej nopa tlajtlanili uan nijnejki nijmatis. Ipan nopa chikuasej metstli tlauel timokamanaljuijkej tlen Biblia tlamachtia, uan ya nechnankilik ika Biblia se keski tlajtlanili tlen achtouia nijnekiyaya nijmatis.

 Nopa ichpokatl katli iuaya niitstoya amo kinekiyaya kimatis tlen nimomachtiyaya. Se domingo nikiljuik nikintlanejtoya Jehová itlajtoltemakauaj ma ualakaj tochaj para ma techmachtikaj ika Biblia. Ualmostla kema niasiko tlen noteki nopa ichpokatl ayokmo itstoya. Niajki nijtemoto, pejki nimochokilia uan nikiljuik Dios ma nechpaleui. Ipan nopa tonali nimomaijtok uan pejki nijtekiuia Dios itoka Jehová (Salmo 83:18).

 Panok ome tonali pejki nimomachtia Biblia ininuaya Jehová itlajtoltemakauaj. Kema titlankej timomachtiaj, pejki nijpoua nopa amochtli tlen ika tlamachtiyaya, tlen itoka Usted puede vivir para siempre en el paraíso en la Tierra. Ipan nopa youali nitlami pojki. a Tlen nijyekok tlen Jehová uan iKone Jesucristo asik ipan noyolo. Nijmatki Jehová kipia iyolo uan kiyolkokoua kema titlaijiyouiaj (Isaías 63:9). Kema nijmatki Jehová nechiknelia uan Jesús motemaktilik nopampa asik ipan noyolo (1 Juan 4:10). Nojkia nikitak Jehová kipixki iyolo ika na pampa “kineki nochi ma timoyolpatlakaj uan tijkauasej totlajtlakoljuaj. Axkineki niyon se ma poliui para nochipa” (2 Pedro 3:9). Jehová kinekiyaya ma nimonechkaui iuaya (Juan 6:44).

 Ipan nopa semana pejki nimonechikoua ininuaya Jehová itlajtoltemakauaj. Maseualmej nechmakasiyayaj pampa nijpixtoya ueueyak notsonkal uan nijtekiuiyaya pipiloli, pero Jehová itlajtoltemakauaj kuali nechselijkej kej se tlen ichampoyouaj katli uejkajkia amo kiitstoyaj. Kinextijkej tlaiknelili. Maske kema niitstoya ininuaya noabuelos kuali nijyolmatiyaya, niitstos ininuaya toikniuaj nojua más kuali nijyolmatki.

 Amo panok miak tonali nochi tlen nijyekojtiajki tlen Biblia tlamachtia kipatlak nonemilis. Yeka nimoxinki, ayokmo niauilnenki, yon nitlaik uan nijkajki drogas (1 Corintios 6:9, 10; 11:14). Nijnekiyaya nijyolpakiltis Jehová. Nijchijtoya miak tlamantli tlen amo kuali uan kema nijyekok nopa amo kipaktia Jehová amo nimotechtik, tlauel nechyolkokok uan nimoiljuik: “Ayokmo kema nijchiuas ni tlamantli”. Uajka pejki nijpatla kej nimoiljuiyaya uan tlen nijchiuayaya. Nima nikitak tlaj nijchiuas tlen Jehová kipaktia tlauel nechpaleuis. Yeka ipan Julio 29, xiuitl 1989, kema panok chikuasej metstli nimoatsonpoliuiltik uan nimochijki se tlen Jehová itlajtoltemakauaj.

 Biblia nechpaleuijtok ma nijpatla kej nimonejnemiltiyaya. Achtouia kema se akajya nechiljuiyaya se tlamantli tlen amo kuali nima nikualaniyaya. Nama nijchiua kampeka kuali nimouikas “ininuaya nochi maseualmej” (Romanos 12:18). Noselti amo niueltoskia, Jehová nechpaleuik ika itlajtol uan ichikaualis ma nijpatla nonemilis (Gálatas 5:22, 23; Hebreos 4:12).

 Nama ayokmo nijtekiuia drogas, yon nimosisinia uan ayokmo niauilnemi más kuali nijchiua kampeka nijyolpakiltis Jehová uan nijtekipanos ika nochi noyolo. Nojkia nikinpaleuia sekinok ma kiixmatikaj Jehová. Kema ya panotoya se keski xiuitl ika nimoatsonpoliuiltik, nitlatekipanoto ipan seyok altepetl kampa amo itstokej miakej tlajtolmoyauanij kiampa nijmoyauas nopa kuajkuali tlamachtili. Tlauel niyolpaki pampa kej panotiajtok xiuitl ueltok nikinmachtia miakej maseualmej uan nikitstok kenijkatsa kipatlatokej kej monejnemiltia. Seyok tlamantli tlen kichiua ma niyolpaki eli pampa nonana nojkia mochijki se Jehová itlajtoltemajka uan kiampa kichijki pampa kiitak kenijkatsa nijpatlak kej nimonejnemiltiyaya uan ayokmo nimosisiniyaya.

 Xiuitl 1999, ipan El Salvador nimomachtik ipan se escuela, tlen nama kiixmatij Kampa kinmachtiaj katli senkistok tlatekipanouaj. Nopaya nechmachtijkej nojua kuali ma nitlajtolmoyaua, kuali ma nitlamachti ipan tlanechikoli uan ma nikinmokuitlaui toikniuaj. Ipan nopa xiuitl nimosenkajki iuaya nopilsiua Eugenia. Nama sansejko senkistok titlatekipanouaj ipan Guatemala.

 Ayokmo nimoyolkokoua, nama kuali niitstok uan tlauel niyolpaki. Tlauel nechpaleuijtok nijchiuas tlen Biblia kiijtoua pampa nama ayokmo nimosisinia yon niauilnemi. Uan pampa nijyekok tlen melauak nama nijpia tlaseuilistli uan nijnextia niteiknelia.