Miakej maseualmej amo kimatij kenijkatsa miakej tekititokej ipan Warwick ika nochi ininyolo maske amo kintlaxtlauiaj. Se tlayakanketl tlen se empresa katli kitlalik ascensores kiijtok: “Nelia inkichiuaj se tlamantli tlen amo kema tikitstoyaj. Pampa ipan ni tonali, amo aka tekiti san tlapik”.

Kema ni tlakatl uan sekinok maseualmej kimatkej Jehová itlajtoltemakauaj kichijchiuaskiaj se tlauel ueyi kali Betel ipan Warwick (Nueva York) uan katli tekitiskiaj amo kintlaxtlauiskia, inijuantij moiljuijkej yaskiaj tekititij san Jehová itlajtoltemakauaj katli itstokej nechka tlen nopa altepetl uan yaskiaj san sábado uan domingo. Yeka amo kikuamachiliyayaj, kema kinitakej asitoj miakej Jehová itlajtoltemakauaj katli euayayaj tlen sekinok altepemej uan sekij kikajtejtoyaj ininteki uan kiampa ueliskia tekitisej se keski metstli o se keski xiuitl.

Kema nechka tlamiskia xiuitl 2015, se 23,000 Jehová itlajtoltemakauaj tekititoyaj ipan Warwick ika nochi ininyolo ininuaya katli itstokej ipan kali Betel tlen Estados Unidos. Nojkia, se 750 maseualmej katli amo eliyayaj Jehová itlajtoltemakauaj tlapaleuijkej ma mochiuaj nochi nopa tekitl. Kiampa kitlamichiuaskiaj kema kiijtojtoyaj kitlamiltisej. Miakej tlen ni maseualmej, tlauel kinpaktik tekitisej ininuaya Jehová itlajtoltemakauaj.

Se katli tlayakana ipan se empresa tlen kitlalia ventanas uan kaltechtli kiijkuilok: “Nochi katli ininuaya nitekiti uan tekititokej nikaj, kinpaktijtok kiitasej kenijkatsa katli nikaj tekitij kichiuaj ika pakilistli uan kinextiaj tlatlepanitaj. Yeka, miakej tlen tojuantij nojua tijneki nikaj titekitisej”.

Eyij tlakamej katli tekitij ipan se empresa uan tlapaleuijkej kikualchijchiuasej nopa uejueyi tlamantli tlen motekiuiskia kema kiketsaskiaj nopa kali kampa betelitas itstoskiaj, nojua kinekiyaya tekitisej ipan Warwick. Yeka kema nopa empresa tlen kitekipanouayayaj ayokmo kinmakak tekitl, kiskej uan tlajtlankej tekitl ipan seyok empresa tlen nojua tekitiyaya nopaya.

Kuajkuali tlamantli tlen kinextijkej Jehová itlajtoltemakauaj kinpaleuik se keskij tlatekipanouanij. Se tlakatl tlen tekitiyaya ipan se empresa tlen kitlaliyaya itsinpeualtil kali uan tekitik ipan Warwick miak metstli, isiua kiitak kipatlatoya miak tlamantli ipan inemilis uan kej kamanaltiyaya ipan ichaj. Isiua kiijtok ika pakilistli: “¡Eli kejuak seyok tlakatl!”.

Miakej siuamej tlapaleuijkej ika nochi ininyolo. Amo san kinejnemiltiyayaj autobuses, nojkia kipojpouayayaj cuartos uan tlachpanayayaj, tekitijyayaj ipan oficinas, nojkia kiniljuiyayaj sekinok kanke kinketsasej carros, kinemiltiayaj uejueyi máquinas tlen tlauel etik, kitlaliyayaj cables de fibra óptica, tuberías, kaltechtli tlen yeso, kichijkej tekitl tlen plomería uan kisakayayaj mezcla. Tlauel tekitiyayaj.

Se tlakatl katli amo kitekipanoua Jehová uan kitlaliyaya tejas, kinitak katli mosiuajtijtokej o monamiktijtokej momaitskitiauij kema temoyayaj ipan autobuses uan sekij kiampa asiyayaj kampa tekitij. Nopa tlauel kiyolpaktik. Nojkia kiitak kenijkatsa siuamej tlauel tekitiyayaj. Kiijtok: “Kema achtoui se kinitayaya nesiyaya kejuak san ualayayaj ininuaya ininueue uan amo tekitisej. Uan kema peuayayaj tekitij nikitak tlauel kuali tekitiyayaj. Nitekititok ipan nochi altepetl Nueva York uan amo kema nikitstoya nopa”.

Ipan xiuitl 2014-2015, nelia ouij mochijki nopa tekitl. Se kinekiskia san mokauas ichaj uan se tonali amo tekitis pampa tlauel tlaseseya. Se tlen Jehová itlajtoltemakauaj tlen itoka Jeremy, katli kitlachiliyaya kenijkatsa mochiua tekitl, kiijtok: “Kemantika, ipan tonali kema tlauel tlaseseyaya, katli kiyakanayaya se empresa tlen kitlaliyaya itsinpeualtil kali nechtlajtlaniyaya:

”Teipa kiijtok kiniljuik katli ininuaya tekiti, monekiyaya ualasej tekitikij pampa siuamej tlen Jehová itlajtoltemakauaj nojkia ualaskia”.

Mojmostla monekiyaya kinualikasej Warwick katli tekitiyayaj uan kinuikasej kampa mokauayayaj. Yeka monejki kintekimakasej kipano 35 maseualmej katli kinemiltiaj autobuses.

Se tonali se tlakatl katli kinemiltia se autobús moketski uan kintlachilik katli kinuikaskia uan kiniljuik: “Tlauel nechpaktia niinmechuikas, yeka, xijtlajkuiljuilikaj katli nijtekipanoua uan xijkiljuikaj ma nechkaua nojua nikaj nitekitis. Nijyekojtok miak tlen Biblia pampa inmojuantij innechmachtijtokej. Kema ayamo niinmechixmatiyaya amo nijmatiyaya kenijkatsa itoka toTeotsij, yon tlaj Tlaltipaktli mochiuas se xochimili. Nojkia ayokmo nimajmaui tlaj nimikis. Tlen nechpanotok nelia tlauel yejyektsi. Kema nimosiyajketsas innechitasej kampa inmojuantij inmosentiliaj”.

Damiana, se tlen Jehová itlajtoltemakauaj katli tekitik ipan Warwick, kiijtok: “Se tonali kema ya titlejkotoyaj ipan autobús, katli techuikayaya kinejki techiljuis se keski tlajtoli. Kiijtok kinuikatoya se 4,000 Jehová itlajtoltemakauaj ipan kali Betel tlen eltok ipan Nueva York. Uan nojkia kiijtok: ‘Maske nochi maseualmej mokualaniaj pampa amo san se inintlalnamikilis, inmojuantij inkichiuaj kampeka inmosentikapaleuisej uan inkisenkauaj se kuesoli. Tlauel yejyektsij tlen inkichiuaj’. Nojkia kiijtok tlauel kipaktiyaya kamanaltis touaya.

”Kema tlanki kamanalti, se tlen Jehová itlajtoltemakauaj kitlajtlanik: ‘¿Mitspaktia kema tiuikaj?’.

”Tlauel chikauak uetskak uan technankilik: ‘Kena, ¿tijuikaj uikatl 134?’” a