“Nijneki niinmechiljuis tlauel kuali tlen inkichiuaj, pampa nochipa inkiachtouitlaliaj toTeotsij iTlanauatijkayo. Tijpatiitaj uan tijtlaskamatij nochi tlen kuali tlamantli tlen inkinchiuilijkej sekinok Jehová itlajtoltemakauaj uan sekinok maseualmej”.

Ya ni kiijkuilok Kasim Reed, katli tekichiua ipan Atlanta (Georgia, Estados Unidos), ipan se amatlajkuiloli kampa kuali kinseliyaya Jehová itlajtoltemakauaj katli asitoj ipan nopa altepetl pampa mochiuaskia eyi uejueyi tlanechikolistli.

Katli tekichiuaj ipan Atlanta kichijkej se amatlajkuiloli kampa kinextiyayaj kuali kinseliyayaj Jehová itlajtoltemakauaj katli yajtoyaj ipan nopa uejueyi tlanechikolistli. Nopaya kiijkuilojkej: “Itstokej nechka 8 millones tlen Jehová itlajtoltemakauaj ipan nochi Tlaltipaktli, katli kampa ueli euaj uan amo sanse inintlajtol, uan nochi kinekij [...], kiueyichiuasej Jehová, katli techmakatok Biblia uan kichijchijtok nochi tlen onka”.

Ipan julio uan agosto 2014, mochijki nopa eyi tlanechikolistli ipan Atlanta, ome ipan tlajtoli inglés, uan se ipan español. Jehová itlajtoltemakauaj tlen se 28 altepemej yajkej ipan nopa tlanechikolistli. Nopa tlanechikolistli ipan inglés kitlajtolkueptiajkej ipan tlajtoli ruso uan japonés. Ipan nopa eyi tlanechikolistli mosentilijkej 95.689.

Ipan xiuitl 2014, Jehová itlajtoltemakauaj kichijkej 24 uejueyi tlanechikolistli ipan 9 altepemej, 16 tlen ni tlanechikolistli mochijki ipan sekinok altepemej tlen Estados Unidos.