Ipan tonali sábado 14 metstli marzo xiuitl 2015, nopa clase 138 ipan Galaad tlankej momachtiaj ipan Centro Educativo de la Watchtower, tlen eltok ne Patterson (Nueva York). Kipano 14,000 maseualmej katli nopaya itstoya uan sekij san kitlachilijkej ipan video. Ni pejki ika naui yajyankuik uikatl, tlen teipa kitekiuijkej kema uikakej. a

Geoffrey Jackson, se Katli kinyakana Jehová itlajtoltemakauaj, kiyakanki nopa tlanechikoli. Uan kema pejki kamanalti, kiniljuik tlen tlantoyaj momachtiaj, ika nopa tlamachtili tlen kiselijtoyaj ma kinpaleuikaj sekinok uan amo ma moaxkatikaj (2 Timoteo 2:2).

Toikni Jackson kinnextilik tlen kichijki Moisés. Ipan se keski tonali, israeleuanij kitekiuiyayaj ichaj ni tlajtolpanextijketl kema tlaueyichiuayayaj. Uan kema tlankej kichijchiuaj nopa tabernáculo, ayokmo kitekiuijkej. Moisés amo kikauiliyayaj ma kalaki kampa eltoya nopa Santísimo, san ueliyaya kalakis nopa sumo sacerdote. Maske kej nopa eliyaya, Biblia amo kiijtoua tlaj ya kualanki pampa nochi mopatlak. Ya tlauel kipaleuik Aarón ipan iteki kej sumo sacerdote. (Éxodo 33:7-11; 40:34,35). ¿Tlake techmachtia tlen Moisés kichijki? Toikni Jackson kiijtok: “Xijpatiitakaj inmoteki, san amo ximoaxkatikaj”.

“¿Inmomajmatisej kema inkikakisej mojmolinia se xiuitl katli uaktok?” Kiampa motokaxtik itlamachtil toikni Kenneth Flodin, se katli kinpaleuia Katli kinyakana Jehová itlajtoltemakauaj ipan Comité de Enseñanza. Ya kiniljuik katli momachtijkej teipa uelis kiixnamikisej uejueyi tlamantli, kej tlaouijkayotl o se tekitl tlen ouij. Uajka kitekiui se tlajtoli tlen eltok ipan Levítico 26:36 uan kiniljuik ma kiitakaj tlaouijkayotl kej se xiuitl katli uaktok o se tlasoli, uan amo kej se tlayejyekoli tlen amo uelis kiixnamikisej. Teipa, kinixtomilik tlen kichijki apóstol Pablo, katli kiijiyouik miak tlaouijkayotl pampa motemachiyaya ipan Jehová (2 Corintios 1:8, 10).

“¿Tlake inkitemouaj?” Mark Sanderson, se Katli kinyakana Jehová itlajtoltemakauaj, ya elki tlen teipa kintlajtolmakak. Kinixtomilik nopa tlajtoli tlen eltok ipan Proverbios 13:12: “Kema se tlakatl mojmostla kichia para kiselis se tlenijki uan axajsi imako, nelia kiyolkokoua”. Miakej moyolkokojtokej pampa amo kisentilijtokej nopa miak tomij tlen kinekiskiaj kipiasej uan amo miakej kinixmatij.

Kema Jesús itstoya, sekij moiljuijkej Juan teAtsompoliuiltijketl kichiuaskia se keski tlamantli ika tlen pankisaskia kej sekinok maseualmej (Lucas 7:24-28). Sekij uelis kichiayayaj kiitasej se filósofo katli kinmachtiskia tlen ueli tlamantli. Tlaj kiampa moiljuiyayaj, moyolkokojkej pampa Juan tlamachtiyaya tlen melauak. Sekij moiljuiyayaj mokentiskia yoyomitl tlen pajpatiyo, ya moyoyontiyaya kej maseualmej tlen teikneltsitsij. Uan katli kichixtoyaj kiitasej se tlajtolpanextijketl amo moyolkokojkej, pampa Juan amo elki se tlen ueli tlajtolpanextijketl, ya kikualchijchijki nochi kema asiskia Jesús (Juan 1:29).

Ika ni tlamachtili, toikni Sanderson kiniljuik katli tlantoyaj momachtiaj ma kipiakaj se kuali tlalnamikilistli. Amo ma kichiakaj sekinok ma kinuejkapantlalikaj, kiniljuik monekiyaya kinpaleuisej toikniuaj ika nopa tlamachtili tlen kiyekojkej ipan Galaad, uan ma kinpaleuikaj kipiasej kuali inintlaneltokilis uan ma kiniknelikaj. Toikni Sanderson kiijtok: “Amo ximoueyimatikaj kema inkinpaleuisej inmoikniuaj, xijchiuakaj kampeka inkichiuasej tlen Jehová kineki, kiampa kuali inkiyolmatisej”.

“¿Inkintlamakasej katli mayanaj?” Kiampa motokachtij itlamachtil James Cauthon, se tlamachtijketl tlen Departamento de Escuelas Teocráticas. Toikni Cauthon kiixtonki kenijkatsa nochi tijnekij ma techiknelikaj uan ma techpatiitakaj. Jesús nojkia monekiyaya kinextilisej kiikneliyayaj, yeka Jehová kinojnotski ika tlaiknelili ipan nopa tonali kema moatsonpoliuiltik (Mateo 3:16, 17).

Jehová kichijtok ma tiuelikaj tikinyoltlananasej uan tikinyolchikauasej sekinok uan kineki kiampa ma tijchiuakaj (Proverbios 3:27). Toikni Cauthon kiijtok: “Xijchiuakaj kampeka inkiitasej kuajkuali tlamantli tlen kipiaj sekinok uan xikiniljuikaj nopa kuali tlamantli tlen kipiaj”. Tlaj ika nochi inmoyolo inkiniljuiaj kuali tlen kichiuaj, toikniuaj kimatisej nochi tlen kichiuaj amo san tlapik.

“Xitemakakaj nochi”. Mark Noumair, se katli tlapaleuia kampa Comité de Enseñanza, kiixtonki nopa seyok tlamachtili. Kiniljuik tlen kichijki apóstol Pablo katli tlatekipanok ika nochi iyolo, uan kiampa kinyololinik ma kichiuakaj miak kampeka uan amo san se kentsi. Tlaj kichiuaj kej nopa apóstol, motemaktiliaj ika nochi ininyolo uan tlaj kinpaleuiaj sekinok uajka tlauel yolpakisej (Filipenses 2:17, 18).

Pablo nochipa kiijiyouik kema kiijixnamijki tlaouijkayotl. Ya nochipa kichijki se ueyi kampeka, yeka kema nechka mikiskia uelki kiijtok: “Nijtlantok nochi noteki keja se motlalojketl tlen motlalojtok hasta kampa ontlami” (2 Timoteo 4:6, 7). Toikni Noumair kinyololinik katli tlantoyaj momachtiaj ma kichiuakaj kej Pablo, kuali ma kichiuakaj toTeotsij iteki kampa yaskiaj tlatekipanotij.

Tlen kinpanok momachtianij. Michael Burnett, se katli tlamachtik ipan Galaad, ya kiixtonki nopa seyok tlamachtili, kampa se keskij momachtianij kiixnextijkej tlen kinpanok ipan tlajtolmoyaualistli kema itstoyaj ne Patterson.

Sampa, nopa momachtianij kuali tlajtolmoyajkej pampa itstoyaj kampa kinamiki uan pampa mosentlalijtoyaj tlamachtisej tlen Biblia ipan maseualmej inintlajtol. Se tlen momachtiyaya ipan Galaad, kimatki kampa yaskia tlajtolmoyauati itstoyaj miakej maseualmej katli kamanaltiyayaj español. Yeka, achtoui momachtik se keski tlajtoli ika español ika nopa aplicación JW Language. Ipan nopa tonali, kikamauik se tlakatl katli kipantik ojtipa. Nama, nopa tlakatl uan naui tlen ichampoyouaj momachtiaj Biblia.

Kiijtojkej tlen kipanotoya. Teipa, William Turner, se katli kinpaleuia Katli kinyakanaj Jehová itlajtoltemakauaj ipan Comité de Servicio, kintlatsintokilik naui toikniuaj. Kintlajtlanik tlake kinpanotoya kema ayamo yajtoyaj Galaad uan kema ya kinmachtijtoya.

Toikniuaj kiijtojkej tlamantli tlen kinpaleuijtoya. Se tlen inijuantij kiijtok kiyekojtoya miak tlamantli ipan Lucas 10. Nopa 70 itokilijkauaj katli Jesús kinnauatijtoya ma tlajtolmoyauatij tlakuepilijkej ika miak pakilistli pampa kuali kiski nopa tekitl tlen kichijtoyaj. Maske Jesús nojkia yolpajki, kinmachtik amo ma yolpakikaj san pampa kuali kintlakakilijkej, kiniljuik ma yolpakikaj pampa kichijkej kampeka kiyolpakiltisej toTeotsij. Ni techilnamikilia tlen nelnelia techmaka pakilistli eli pampa tijchiuaj tlen Jehová kipaktia uan amo tlaj techpanos tlen ouij o amo ouij.

Toikni Turner kiijtok ipan inijuantij moaxitiyaya tlen kiijtoua Filipenses 1:6 uan kiniljuik temachtli Jehová kipeualtijtoya se kuali tekitl ika inijuantij uan nochipa kiampa kichiuas.

“Xijtlachilijtokaj Jehová”. Samuel Herd, se katli kinyakana Jehová itlajtoltemakauaj, kiixtonki nopa tlamachtili tlen pankiski. Ipan ni tlamachtili kiixtonki kenijkatsa tijtlachilijtosej toTeotsij maske amo tikitaj.

Uelis tijchiuasej kema tikitaj tlamantli tlen kichijchijtok, ika ni uelis timomachtisej miak tlen ya. Nojkia, Jehová kitlauilijtok totlalnamikilis (Efesios 1:18). Tlaj ajachika timomachtiaj Biblia, tijyekojtiasej miak tlamantli. Uan kema tlauel tikixmatisej, tlauel timonechkauisej iuaya.

Moneki kuali timomachtisej nopa Evangelios, pampa tlen kiijtoua uan tlen kichijki Jesús techpaleuia kuali ma timoiljuikaj kenijkatsa eli toTeotsij. Jesús kuali kinextik kenijkatsa eli Jehová, yeka kiijtok: “Yajaya tlen nechitstok, ya kiitstok notata” (Juan 14:9).

Toikni Herd kiniljuik katli nopaya itstoyaj amo san ma kitlachilikaj Jehová ika tlen kichijki Jesús, nojkia ma kichiuakaj kej Jesús. Kiampa kej Jesús kichijki kampeka kintlamakas sekinok, tojuantij nojkia ma tijchiuakaj kampeka tikinmachtisej sekinok ika nopa tlamachtili tlen tijselijkej.

Tlaj tijtlachilijtokej Jehová, nojkia uelis timotemachisej kej nopa salmista kema kiijkuilok: “Nochipa nimoiljuia tlen ta, toTeko, uan pampa tiitstok nonechka, axtleno nopantis” (Salmo 16:8).

Kema tlanki tlanechikoli. Kema tlanki tlamachtili kinmakakej diplomas, se momachtijketl kipojki se kuajkualtsi amatlajkuiloli tlen ika tetlaskamatilik. Uajka toikni Jackson kiniljuik nopa momachtianij amo ma moiljuikaj nochi tlen kinmachtiskiaj toikniuaj eliskia yankuik o tlauel ouij, pampa miak tlamantli toikniuaj ya kimatij. Toikni Jackson nojkia kiniljuik tlauel ipati amo ma moueyimatikaj. Ma kipatiitakaj Biblia uan amatlajkuiloli uan amo san ma kamanaltikaj tlen inijuantij niyon tlen kinmachtijtoyaj ipan Galaad. Nojkia, amo ma kinyolkokokaj katli amo uelij yaui momachtitij ipan Galaad moneki ma kinpaleuikaj kitlasojtlasej tlen kuali tlamantli tlen kipiaj. Kema tlanki nopa tlanechikoli, nochi tlen nopaya itstoyaj tlauel yolpaktoyaj uan tlauel kinekiyayaj kinpaleuisej toikniuaj.