Ipan julio 7, 2023, toikni Juan Ángel Hernández, se tlen Katli kiyakanaj Betel tlen Centroamérica, tematiltik ya eltok nopa achtoui naui libros tlen Biblia tlen Yankuik Tlaltipaktli (Mateo-Apocalipsis) ika nauatl (Huasteca). Toikni tematiltik ya eltok nopa naui libros ipan achtoui tonali tlen nopa ueyi tlanechikolistli “Xijpiakaj inmoyolo” ika nauatl (Huasteca), tlen mochijki ipan Hidalgo, México. Nopa tonali nojkia mosentilijkej ipan ueyi tlanechikolistli ipan Estado de México uan Nuevo León uan inijuantij nojkia kiitakej ika internet nopa tlamachtili tlen mopanoltik kema kiski nopa Biblia. Mosentilijkej 2 mil 401 maseualmej ipan nopa eyi altepemej. Kema tlanki nopa tlamachtili, nimantsi uelkej kikixtiaj ipan inincelulares uan ika audio.

Maske onka sekinok biblias tlen kitlajtolkueptokej ika nauatl (Huasteca), amo nesi itoka Jehová. Nojkia, kipia tlajtoli tlen maseualmej ouij kikuamachiliaj. Se katli kitlajtolkuepki nopa yankuik Biblia kiijtok: “Kema nijpouayaya sekinok biblias, eliyaya kejuak nikitayaya se espejo tlen ixmiktok. Pero ika ni yankuik Biblia, nopa espejo kuali nesi. Katli kipouasej ayokmo motsontlapanasej pampa nima kikuamachilisej tlen ijkuilijtok, nama uelis moyoliljuisej kenijkatsa kinpaleuia iTlajtol Dios. ¡Nelnelia eli se ueyi regalo tlen Jehová techmakatok!”.

Temachtli tijmatij ni yankuik libros tlen Mateo, Marcos, Lucas uan Juan, kinpaleuis miakej katli nauatij ‘ma kiixmatikaj Jehová, nopa iyojtsi Dios katli melauak, uan katli ya kititlanki, Jesucristo’ (Juan 17:3).