Amo, taltikpak amo keman ixpoliuis, amo keman tatas nion kiixpataskej. Biblia tamachtia ke Dios kichijchiuak taltikpak para maj nochipaya ompa se nemi.

•   “Akin yolmelaujkej ininaxkatis taltikpak uan ompa nemiskej nochipaya” (Salmo 37:29).

•   “Yejua kitalij taltikpak kampa yetos; amo keman kiajchiuaskej” (Salmo 104:5).

•   “Taltikpak nochipaya yetos” (Eclesiastés 1:4).

•   “Akin kichijchiuak taltikpak uan kitalij kampa yetos, akin amo nenkaj kichijchiuak, ta kichijchiuak para maj ompa nemikan” (Isaías 45:18).

 Dios amo kikauas maj taltikpakneminij kiixpolokan taltikpak ika neteuilismej, porin semi kipitsotiliaj oso ika okse taman, ta Biblia kijtoua ke kinixpolos “akin kiixpolojtokej taltikpak” (Apocalipsis 11:18). ¿Keniuj kichiuas?

 Dios kinixpatas tekiuajyomej, tein amo kiyekpianij taltikpak, ika se Taixyekanalis tein moajsi iluikak tein nochi kuali kichiuas (Daniel 2:44; Mateo 6:9, 10). Akin tekiuajtis itech nejin taixyekanalis yeski Jesucristo, iKonetsin Dios (Isaías 9:6, 7). Keman Jesús yetoya nikan taltikpak kitamatilij ejekat uan ueyiat (Marcos 4:35-41). Kemej Tekiuaj itech itaixyekanalis Dios, Jesús kichiuas maj amo onkaok tetsaujmej nikan taltikpak. Kiyektalis taltikpak para maj mochiua kemej katka xochital Edén (Mateo 19:28; Lucas 23:43).

 Amo. Ijkon kijtouaj sekin porin amo kiyekajsikamatij 2 Pedro 3:7, tein kijtoua: “Iluikak uan taltikpak tein axkan yetokej, ixyetokej para ixpoliuiskej ika tit”. Maj tikitakan ome taman tein techpaleuis maj tikajsikamatikan nejin tajkuilol:

1.   Itech Biblia, tajtolmej iluikak, taltikpak uan tit uelis kijtosnekis miak taman. Kemej neskayot, Génesis 11:1 kijtoua: “Nochi taltikpak kisentokaya tajtouaya sayoj se tajtol”. Nikan, tajtol “taltikpak” kijtosneki taltikpakneminij.

2.   Achto de 2 Pedro 3:7 momelaua tein kijtosneki “iluikak”, “taltikpak” uan “tit”. Versículo 5 uan 6 ika tajtouaj Tetsaujkakiouit tein mochiuak itech itonaluan Noé. Tein onkaya itech nejon tonalmej ixpoliuik, sayoj ke taltikpak amo ixpoliuik. Tetsaujkakiouit kinixpoloj akin kichiuayaj tein tel amo kuali, tein kijtosneki, nejon “taltikpak” (Génesis 6:​11). No kiixpoloj “iluikak”, tein kijtosneki, akin taixyekanayaj itech nejon tonalmej. Taltikpak amo ixpoliuik, ta ixpoliujkej akin amo yolkualmej katkaj. Noé uan ichankauan makiskej uan oksepa miakiakej nikan taltikpak satepan ke mochiuak Tetsaujkakiouit (Génesis 8:15-18).

 Ijkon kemej panok keman mochiuak Tetsaujkakiouit, “tit” oso ixpoliuilis tein ika tajtoua 2 Pedro 3:7, kinixpolos akin amo yolkualmej, amo kiixpolos taltikpak. Dios motenkaua ke kiixtalis “se yankuik iluikak uan se yankuik taltikpak [...], uan ompa nochipa mochiuas tein kuali yetok” (2 Pedro 3:13). Nejon “yankuik taltikpak”, oso taltikpakneminij akin makisaskej, kipiaskej se “yankuik iluikak”, oso se yankuik tekiuajyot, tein kijtosneki iTaixyekanalis Dios. Nejin taixyekanalis kichiuas maj taltikpak mochiua se xochital kampa onkas yolseuilis (Apocalipsis 21:1-4).