Éxodo 16:1-36
16 Satepan kiskej de Elim uan nochin israelitas ajsitoj itech taluakyan kampa motanotsa Sin, tatajko de Elim uan Sinaí. Ajsikej itech metsti ziv,* tonal 15, se metsti satepan ke kiskej de Egipto.
2 Itech taluakyan nochin israelitas peujkej kinijijtouaj Moisés uan Aarón.
3 Yejuan kiniluiayaj: “¡Okachi kuali maj Jehová techmiktiani ne Egipto! Ompa tikuayaj nakat uan pantsin hasta tiixuiaj. Sayoj ke namejuan nantechualkuikej nikan kampa tauaktok para maj tinochin timayanmikikan”.
4 Uan Jehová kiluij Moisés: “Nikchiuati maj panxini tein nankikuaskej, uan nochin moneki kisaskej mojmostaj uan kiololoskej tein kikuaskej. Ijkon nikitas ox kichiuaj tein nikinnauatia.
5 Sayoj ke itech chikuasentika tonal, maj kiololotij tein kikuaskej ome tonal uan maj kichijchiuakan”.
6 Yejua ika Moisés uan Aarón kiniluijkej nochin israelitas: “Tiotakpa nankiyekmatiskej ke Jehová namechkixtij de Egipto.
7 Uan kualkampa nankiitaskej iueyi chikaualis Jehová, porin Jehová kikakini keniuj nankijijtouaj. ¿Keyej nantechijijtojtokej, ta tejuan amo teyi tichiuanimej?”.
8 Moisés no kijtoj: “Keman Jehová namechmakas nakat tiotakpa, uan keman namechmakas pantsin kualkampa hasta nanixuiskej, nankiitaskej ke Jehová kikakini keniuj nankijijtouaj. Tejuan amo teyi tichiuanimej. Amo tejuan nantechijijtojtokej, ta tein melauj nankijijtojtokej Jehová”.
9 Uan Moisés kiluij Aarón: “Xikinilui nochin israelitas: ‘Ximosentilikij nikan, porin Jehová kikakini keniuj nankijijtouaj’”.
10 Niman keman Aarón tamitajtoj, israelitas moixkepkej uan tachiakej kampa yetoya taluakyan, uan iueyi chikaualis Jehová monextij itech se mixti.
11 Jehová no kiluij Moisés:
12 “Nikakini tein israelitas kijtojtinemij. Xikinilui: ‘Keman tapoyaujtosya nankikuaskej nakat, uan kualkampa nankikuaskej pantsin hasta nanixuiskej. Uan nankiyekmatiskej ke nejua niJehová namoDios’”.
13 Yejua ika nejon tiotak ejkokej tel miak totomej* uan temitoj kampa yetoyaj ininkaltsitsin* israelitas, uan kualkampa ajuachtaj katka tatenoj de kampa nemiaj.
14 Keman ajuach pankisak kemej mixti, tein mokauak talpan katka kemej xinachtsitsin tein ixtentoya kemej sekti.
15 Kemej israelitas amo kimatiaj toni katka, keman kiitakej peuak motajtaniaj: “¿Toni ne?”. Moisés kiniluij: “Nejin yejua tein Jehová namechmakatok para nankikuaskej.
16 Yejua nejin tein Jehová tanauatij: ‘Nanochin xikololokan tein uelis nankikuaskej. Xikuikan se tamachiuj tein monotsa omer* para sejse akin nemi namochan’”.
17 Uan yejua nejon tein kichiujkej israelitas. Sekin kiololojkej miak uan sekin amo miak.
18 Keman kitamachiuayaj ika omer, akin kisentilij miak, amo kipiak okachi ke tein kipolouaya, uan akin kisentilij tepitsin, amo teyi kipoloj. Sejse kiololouaya tein kikuaskia.
19 Uan Moisés kiniluij: “Maj amo akaj kikaua nion tepitsin para mostika”.
20 Sayoj ke amo kichiujkej tein Moisés kiniluij. Keman sekin kikaujkej tepitsin hasta mostika, okuilouak uan peuak tsojyaya. Yejua ika Moisés kualanik iniuan.
21 Kuajkualkampa, sejse kiololouaya tein yaya kikuati. Keman peuaya tonaya, tein mokauaya patia.
22 Itech chikuasentika tonal kiololojkej tein kikuaskiaj ome tonal. Sejse kiololoj ome tamachiuj tein monotsa omer. Yejua ika taixyekananij israelitas kinauatikoj Moisés.
23 Uan yejua kiniluij: “Yejua nejin tein Jehová kijtoj. Mosta amo xikchiuakan nion se tekit, porin tonal sábado xeliujtok para Jehová. Yejua ika xikyokxitikan uan xikmolontikan* tein monekis. Tein mokauas, uelis nankikuiskej hasta mostika”.
24 Yejua ika, kikuikej tein mokauak hasta mostika, ijkon kemej Moisés tanauatijka, uan amo okuilouak nion tsojyayak.
25 Uan Moisés kiniluij: “Xikuakan axkan, porin axkan sábado xeliujtok para Jehová. Komo axkan nankitemotij amo nankiajsiskej.
26 Nankiololoskej chikuasen tonal, sayoj ke itech tonal sábado, amo teyi onkas”.
27 Maski ijkon, itech tonal sábado, sekin kitemotoj, sayoj ke amo teyi kiajsikej.
28 Yejua ika Jehová kiluij Moisés: “¿Hasta kemanian nankichiuaskejya tein namechiluia uan tein namechnauatia?
29 Xikelnamikikan ke Jehová namechmakatok tonal sábado para ximoseuikan. Yejua ika itech chikuasentika tonal namechmaka tein nankikuaskej ome tonal. Uan itech chikometika tonal nochin moneki mokauaskej kampa yetokej; maj amo akin kisa de ompa”.
30 Yejua ika israelitas moseuijkej itech tonal sábado.
31 Nejon takual, israelitas kitokaytijkej maná.* Istak katka kemej iteyo cilantro uan uelik katka kemej pantsin ika nekti.*
32 Uan Moisés kijtoj: “Yejua nejin tein Jehová tanauatij: ‘Xikuikan se omer de maná uan xikxelokan, para maj nochin akin yoltiaskej kiitakan takual tein ika namechtamakak itech taluakyan keman namechkixtij de Egipto’”.
33 Yejua ika Moisés kiluij Aarón: “Xikui se kontsin, xiktemili se omer de maná uan xiktali iixpan Jehová para maj kiitakan nochin akin yoltiaskej”.
34 Uan ijkon kemej Jehová kinauatij Moisés, Aarón kitalij iixpan tatiochiualkaxon* para maj ompa yeto.
35 Israelitas kikuajkej maná 40 xiujmej, hasta keman ajsikej itech se xolal kampa nemiaj oksekin. Kikuajkej maná hasta keman ajsikej kampa peua tal tein poui Canaán.
36 Majtakti tamachiuj tein monotsa omer yejua se tamachiuj tein monotsa efá.*
Tajtolmelaualismej
^ Itech hebreo, “ojpatika metsti”. Axkan nejin metsti uetsi itajkotian abril hasta itajkotian mayo. Xikonita ziv.
^ Nejin monotsa codorniz. Totomaktsin, moskaltia kemej 18 centímetros uan ueli se kikua.
^ Nejin kaltsitsin chijchiujtoyaj ika tasal (tilmaj).
^ Oso “tapalkat kampa aki ome litro”. Xikonita B14.
^ Oso “xikposonikan”.
^ Nejin tajtol xa mokixtij itech tajtol hebreo tein kijtosneki ‘¿toni ne?’.
^ Oso “miel”.
^ Xikonita tatiochiualkaxon.
^ Xikonita B14.
