Éxodo 32:1-35
32 Israelitas kiitakej ke Moisés uejkaujkaya uan amo temouaya den tepet. Yejua ika nochin kiajsitoj Aarón uan kiluijkej: “Xitechchijchiuili se tatadios* tein techyekantias, porin amo tikmatij toni kipanok Moisés, akin techkixtij de Egipto”.
2 Yejua ika Aarón kiniluij: “Xikinnakaskixtilikan ininpipiloluan de oro tein kipiaj namosiuauan, namookichpipiluan uan namosiuapipiluan uan xinechualkuilikan”.
3 Uan nochin monakaskixtilijkej ininpipiloluan uan kiuikilijkej Aarón.
4 Kikuik nejon oro, kitektiajki ika se tepos* uan kichijchiuak se tatadios* tein tamatia kemej se kuakuejkonet. Uan yejuan peuak kijtouaj: “Yejua nejin toDios, akin techkixtij de Egipto”.
5 Keman Aarón kiitak nejon, kichijchiuak se altar iixpan kuakuejkonet uan kijtoj: “Mosta tikchiuaskej se iluit para tikueyitaliskej Jehová”.
6 Yejua ika mostika, kualkan meujkej uan peuak kichichinouaj tapialmej para kitemaktiskej. No kitemaktijkej tapialmej para sentakuaskej iuan Dios.* Satepan, israelitas takuajkej uan tatayikej, uan moyolpaktijkej.
7 Uan Jehová kiluij Moisés: “Xitemo porin israelitas akin tikinkixtij de Egipto, kichiujtokej tein tel amo kuali.
8 ¡Tel niman kielkaujkej tein nikinnauatij! Mochijchiuilijkej se tatadios* tein tamati kemej se kuakuejkonet, moixpilojtokej iixpan uan kimaktilijtokej tapialmej, uan kijtojtokej: ‘Yejua nejin toDios, akin techkixtij de Egipto’”.
9 Uan Jehová no kiluij Moisés: “Nikitani ke israelitas tel amo takakij.
10 Yejua ika xinechkaua maj nikinixpolo porin nitelkualantok, uan nikchiuas maj de mokoneuan kisa se ueyi altepet”.
11 Uan Moisés kitataujtij Jehová: “NoDios Jehová, ¿keyej titelkualani uan hasta tikneki tikinixpolos mokoneuan israelitas? Tejua tikuik moueyichikaualis para tikinkixtis de Egipto.
12 Komo tikinixpoloua, akin nemij Egipto kijtoskej: ‘IninDios kinkixtij para kinchiuilis tein amo kuali. Kinekia kinmiktis itech tepemej uan kintamiixpolos’. Amo xikualantook, xikyeknemili tein tikchiuasneki uan amo xikinixpolo mokoneuan israelitas.
13 Xikinelnamiki motekitikauan Abrahán, Isaac uan Israel. Tejua tikinyekiluij motokaykopa: ‘Nikchiuas maj namokoneuan tel miakej kemej sitalimej tein yetokej iluikak uan nikinmakas nochi nejin tal tein nikijitak* para maj nochipa ininaxka’”.
14 Uan Jehová kiyeknemilij tein yaya kichiuati uan amo kinixpolojok israelitas.
15 Satepan, Moisés mokepak uan temok den tepet uan maaktiaya ome lajas kampa Dios tajkuilojka. Itech sejse laja tajkuiliujtoya nochin ojkan.
16 Dios kinchijchiuak nejon lajas uan kintektiajki para itech kijkuilos itanauatiluan.
17 Uan Josué peuak kikaki keniuj israelitas eliuis ajkotsajtsiaj, uan kiluij Moisés: “Mokaki majya moteuijtokej”.
18 Sayoj ke Moisés kinankilij:
“Amo mokaki ke cantarojtokej kemej ijkuak se tatani,nion mokaki ke tayokoltsajtsitokej kemej ijkuak se tapoloua,ta nikaki okse taman”.
19 Niman keman Moisés motokij kampa yetoyaj israelitas uan kiitak kuakuejkonet uan keniuj mijtotijtoyaj, fiero kualanik, kintamotak ompa tepetsintan ome lajas tein maaktiaya uan kintamitapanak.
20 Uan kikuik kuakuejkonet tein kichijchiujkaj, kitatij* uan kitamikuechoj. Satepan, nejon kitamotak itech at uan kiniluij israelitas maj tayikan nejon at.
21 Uan Moisés kiluij Aarón: “¿Keyej tikchiuak maj israelitas ueyi tajtakokan?”.
22 Aarón kinankilij: “Amo xikualani tejuatsin. Tikmattokya ke nejin israelitas ipa kichiuaj tein amo kuali.
23 Yejuan nechiluijkej: ‘Xitechchijchiuili se tatadios* tein techyekantias, porin amo tikmatij toni kipanok Moisés, akin techkixtij de Egipto’.
24 Yejua ika nikiniluij: ‘Komo nankipiaj teisa de oro, ximokixtilikan uan xinechualkuilikanʼ. Uan niktikotamotak oro uan kisak nejin kuakuejkonet”.
25 Uan Moisés kiitak ke nochin fiero kichiujtoyaj porin Aarón kinkauak. Yejua ika akin kintauelitayaj kinkejkelouayaj.
26 Uan Moisés moketsato tatenoj de kampa kinkejketskaj ininkaltsitsin* uan kiniluij: “¡Akin kitakamatis Jehová maj nechajsiki!”. Uan nochin akin kinixmatij kemej levitas kiajsitoj.
27 Uan kiniluij: “Yejua nejin tein kijtoua toDios Jehová: ‘Nanochin xikuikan namomachete tein ojkan tenej,* xipanotiakan itech nochi kaltsitsin uan xikinmiktijtiakan namokniuan, namovecinos uan namotasojikniuan’”.
28 Levitas kichiujkej tein Moisés kiniluij uan nejon tonal kinmiktijkej kemej eyi mil takamej.
29 Uan Moisés kiniluij: “Ximoxelokan axkan para nankitekitiliskej Jehová, porin nanochin nankitakamatkej uan nankinmiktijkej namokoneuan uan namokniuan. Yejua ika, yejua namechtatiochiuiti axkan”.
30 Mostika, Moisés kiniluij nochin: “Namejuan nankichiujkej se ueyi tajtakol. Yejua ika nipankisati itech tepet niktataujtiti Jehová uan ijkon xa namechtapojpoluis”.
31 Uan Moisés oksepa pankisak uan kiluij Jehová: “¡Israelitas kichiujkej se tel ueyi tajtakol! ¡Mochijchiuilijkej se tatadios* de oro!
32 Sayoj ke komo tikneki, xikintapojpolui. Komo amo, nimitstataujtia xikixpolo notokay itech amatajkuilol kampa tikijkuiloj”.
33 Sayoj ke Jehová kinankilij Moisés: “Nikixpolos de noamatajkuilol akin kichiua tein amo kuali uan ijkon nechixnamiki.
34 Axkan xiouj uan xikinuika kampa nimitsiluij. Xikita, noángel mitsyekantias, uan itech tonal keman nikitas tein kichiujkej, nikintatsakuiltis porin tajtakolchiujkej”.
35 Uan Jehová peuak kintatsakuiltia israelitas porin kinauatijkaj Aarón maj kinchijchiuili se kuakuejkonet.
Tajtolmelaualismej
^ Oso “tiotsin”.
^ Oso “cincel”.
^ Oso “tiotsin”.
^ Oso “tiotsin”.
^ Oso “nikixpejpenak”.
^ Oso “kichichinoj”.
^ Oso “tiotsin”.
^ Nejin kaltsitsin chijchiujtoyaj ika tasal (tilmaj).
^ Oso “namoespada”.
^ Oso “tiotsin”.
