Éxodo 36:1-38
36 ”Bezalel, Oholiab uan nochin takamej akin kuali tamachijchiuaj, kichijchiuaskej nochi tein monekis para in kaltsin kampa taueyichiuaskej, ijkon kemej Jehová tanauatij. Jehová kichiuak maj kimatikan keniuj okachi kuali tamachijchiuaskej”.
2 Uan Moisés kinnotsak Bezalel, Oholiab uan nochin takamej akin Jehová kichiuak maj okachi kuali tamachijchiuakan. Yejuan kinekkej tekitiskej ika nochi ininyolo.
3 Uan Moisés kinmakak nejon takamej nochi tein israelitas kitemakakaj para in kaltsin kampa taueyichiuaskej. Sayoj ke mostaj kualkan israelitas kisentokayaj kitemakayaj miak taman.
4 Keman peujkajya tachijchiuaj para in kaltsin, nochin akin kuali tamachijchiuayaj peuak ajsij kampa yetoya Moisés.
5 Uan kiluijkej: “Nochin kiualkuitokej tel miak, okachi ke tein moneki para tekit tein Jehová tanauatij maj mochiua”.
6 Yejua ika Moisés tanauatij maj teiluitij nejin: “Amo teyi xikualkuikanok para mochijchiuas kaltsin”. Ijkon kintsakuilijkej israelitas uan amo teyi kiuikakejok.
7 Yetoyaya nochi tein monekia para maj mochiua tekit. Tein melauj, onkaya okachi ke tein monekia.
8 Uan nochin kuali tamachijchiuanij kichijchiujkej kaltsin ika majtakti tasal.* Kichijchiujkej ika linojtamalin tein tel kuali, hilo azul, morado uan chichiltik. Itech nejon tasal, Bezalel* kimaijtsomak seki querubines.
9 Sejse tasal kipiaya 12 metros uan ome cuarta* de ueyak uan chikueyi cuarta* de patauak. Nochin kipiayaj sayoj se tamachiuj.
10 Uan kinijtsomak makuil tasal para maj mosenkuito uan no ijkon kinijtsomak okseki makuil tasal.
11 Satepan, ika hilo azul kijtsomilij seki tamalin itempan se ueyi tasal, uan no ijkon kichiuak itempan okse para ompa ueliskia kinsalos.
12 Katkaj 50 tamalin itempan se ueyi tasal uan 50 itempan okse, kampa kinsaloskia. Ijkon, nochi tamalin tein kijtsomilij sejse ueyi tasal moixnamiktoskiaj.
13 Satepan, kichijchiuak 50 ganchitos ika oro uan ika kintajtakuiltij ome uejueyi tasal. Ijkon, ueyi tasal para kaltsin mosenkuitoya.
14 No kichijchiuak 11 tasalmej ika chivojtsonti para no kipantalilis kaltsin.
15 Sejse tasal kipiaya 13 metros uan 35 centímetros* de ueyak uan chikueyi cuarta* de patauak. Nochin kipiayaj sayoj se tamachiuj.
16 Kinijtsomak makuil tasal para maj mosenkuito, uan no kinijtsomak okseki chikuasen tasal.
17 Satepan kijtsomilij 50 tamalin itempan sejse ueyi tasal, kampa mosalouayaj nejon ome uejueyi tasal.
18 Kichijchiuak 50 ganchitos ika cobre uan kintakuiltij itech ome uejueyi tasal uan kinsentilij. Ijkon, ueyi tasal para kaltsin mosenkuitoya.
19 Ika ipankuetaxyo ichkaueuet* tein chichiltikya no kichijchiuak tein kipantaliliskia kaltsin, uan ika ipankuetaxyo foca kichijchiuak okse para kitamipantsakuas.
20 Uan kichijchiuak seki taman tein tamatia kemej ventanas tein ueueyak para kaltsin. Katkaj de acaciajkouit. Nejon ventanas kinkejketsaskiaj.
21 Sejse kipiaya naui metro uan ome cuarta* de ueyak uan eyi cuarta* de patauak.
22 Kipiayaj ome ininmetsuan* tein mokuitoyaj. Ijkon kichijchiuak nochin ventanas tein kipiaskia kaltsin.
23 Kichijchiuak 20 ventanas tein yaskiaj sekopa. Keman kalakiskiaj mokauaskiaj ininopochmakopa.
24 No kichijchiuak ika plata 40 metstapechmej tein yaskiaj tatsintan de 20 ventanas: itsintan sejse ventana kipiaskia ome metstapechmej kampa kinmetskajkalakiskia.
25 Uan kichijchiuak 20 ventanas tein yaskiaj oksekopa. Keman kalakiskiaj mokauaskiaj ininyekmakopa.
26 No kichijchiuak ika plata 40 metstapechmej: itsintan sejse ventana kipiaya ome metstapechmej.
27 Para taikankopa den kaltsin, tein mokauaskia kampa ika pankalaki tonaltsin, kichijchiuak chikuasen ventanas.
28 Uan no, kichijchiuak omeok tein yetoskiaj itech sejse esquina taikankopa den kaltsin kemej kalikximej.
29 Nejin kalikximej tein yetoskiaj itech sejse esquina ixome katkaj desde tatsintan hasta ajko. Mokuanamikiskiaj kampa yetoskia yekinika ruedita.
30 Katkaj chikueyi ventanas tein kipiayaj 16 metstapechmej de plata: itsintan sejse ventana kipiaya ome metstapechmej.
31 Ika acaciajkouit no kichijchiuak makuil koujmej tein kinixtapaltaliskia, para maj ventanas tein kipiaskia kaltsin sekopa amo moxelokan.
32 Kichijchiuak makuil koujmej para maj amo moxelokan ventanas tein yetoskiaj oksekopa, uan makuil para tein yetoskiaj taikankopa den kaltsin.
33 Kouit tein kiixtapaltaliskia tatajko, peuaskia se esquina uan tamiskia hasta itech okse esquina.
34 In ventanas kintamitalilij oro uan kinchijchiuilij seki rueditas kampa kinkajkalakiskiaj koujmej. Nejon koujmej no kintamitalilij oro.
35 Kichijchiuak se cortina ika hilo azul, morado, chichiltik uan ika linojtamalin tein tel kuali. Itech nejon cortina kimaijtsomak seki querubines.
36 Uan kichijchiuak naui kalikximej de acaciajkouit uan kintamitalilij oro. No kichijchiuak ganchos de oro uan naui metstapechmej de plata kampa ijkatoskiaj kalikximej.
37 Para ikalakyan kaltsin kichijchiuilij se cortina ika hilo azul, morado, chichiltik uan ika linojtamalin tein tel kuali.
38 Uan no kichijchiuak makuil kalikximej uan iganchos. Kitamitalilij oro ikuapan kalikximej uan irueditas, sayoj ke makuil ininmetstapechuan katkaj de cobre.
Tajtolmelaualismej
^ Oso “tilmaj”.
^ Itech hebreo, “yejua”.
^ Itech hebreo, “28 molikmej”. Xikonita B14.
^ Itech hebreo, “naui molik”.
^ Itech hebreo, “30 molikmej”.
^ Itech hebreo, “naui molik”.
^ Oso “borrego”.
^ Itech hebreo, “majtakti molik”.
^ Itech hebreo, “se molik uan tajko”.
^ Oso “tablones”.
