1 Corintios 11:1-34
11 Xikchiuakan kemej nejua, ijkon kemej nejua nikchiua kemej Cristo.
2 Namechtasojkamatilia porin nochipa nanechelnamikij uan nankichiuaj nochi tein namechmachtij.
3 Sayoj ke nikneki xikmatikan ke itaixyekankauj* takat yejua Cristo, ke itaixyekankauj siuat yejua takat uan ke itaixyekankauj Cristo yejua Dios.
4 Takat akin mokuapiki* keman kichiua netataujtil oso keman kiteixmatiltia tein Dios kiluia, kipinaujtia itaixyekankauj,
5 uan siuat akin amo mokuapiki keman kichiua netataujtil oso keman kiteixmatiltia tein Dios kiluia, kipinaujtia itaixyekankauj, porin kemej yeskia mokuaximaskia.*
6 Porin komo siuat amo mokuapiki, moneki kitekis nochi itson. Sayoj ke komo mopinaujmati kitekis nochi itson oso mokuaximas, moneki mokuapikis.
7 Takat maj amo mokuapiki, porin yejua tamati kemej Dios uan kiueyitalia, uan siuat kiueyitalia takat.
8 Porin Dios amo kichijchiuak takat ika inakayo siuat, ta kichijchiuak siuat ika inakayo takat.
9 Tein melauj, Dios amo kichijchiuak takat para in siuat, ta kichijchiuak siuat para in takat.
10 Yejua ika siuat moneki mokuapikis para ika kinextis ke mokaua maj kiixyekana itakauj, porin ángeles tachixtokej.
11 Sayoj ke itech inechikol toTekotsin, takamej amo nemiskiaj komo amo onkaskiaj siuamej, uan siuamej amo nemiskiaj komo amo onkaskiaj takamej.
12 Porin ijkon kemej siuat ualeuak itech takat, no ijkon takat yoli de se siuat. Sayoj ke nochi ualeua imako Dios.
13 Xikixejekokan namejuan: ¿kuali yetok maj siuat amo mokuapiki keman kichiua netataujtil?
14 ¿Amo nankimatij ke tepinaujtij maj se takat tsonueueyak,
15 sayoj ke komo se siuat tsonueueyak kikualnextia? Porin yejua kipia itson para ika mokuapikis.
16 Uan komo aksa* kinemilia ke amo kuali yetok nejin, maj kimati ke tejuan uan tokniuan akin pouij itech inechikoluan Dios amo tikchiuaj okse taman.
17 Sayoj ke ika nejin tein namechnauatijtok, amo namechtasojkamatilia, porin keman namosentiliaj amo namoyolchikauaj, ta namoixnamikij.
18 Yekinika, nikmatik ke keman namosentiliaj, nanxexeliujtokej, uan xa kemaj.
19 Porin nikyekmati ke namouan onkaskej akin kimoyauaskej* tamachtilis tein amo melauak, para maj no moyeknexti akonimej kiyolpaktiaj Dios.
20 Keman namejuan namosentiliaj, tein melauj amo para nantakuaskej itech iTakualis toTekotsin.
21 Porin keman nantakuatij, sejse ipa takuajkaya, uan ijkon se mayantok uan okse uintitok.
22 ¿Xe amo nankipiaj namochan kampa nantakuaskej uan nantatayiskej? ¿Oso nankiixtopeuaj inechikol Dios uan nankinpinaujtiaj akin amo teyi kipiaj? ¿Toni uelis namechiluis? ¿Ke kuali tein nankichiujtokej? Amo.
23 Porin ijkon kemej nechmachtij toTekotsin no ijkon namechmachtia: ke toTekotsin Jesús, itech youak keman yaya kitemaktitij, kikuik se pantsin,
24 kitasojkamatilij Dios, kitajtapanak uan kijtoj: “Nejin kiixnextia nonakayo, tein niktemaka para namechpaleuis. Xiksentokakan xikchiujtokan nejin uan ika xinechelnamikikan”.
25 Keman tamitakuajkej nejon tiotak, no kikuik copa uan kijtoj: “Nejin copa kiixnextia yankuik taman tein Dios motenkaua, tein peuas keman mimilauis noesyo. Xiksentokakan xikchiujtokan nejin uan ika xinechelnamikikan nochipa keman nantayiskej nejin”.
26 Porin nochipa keman nankikuaskej nejin pantsin uan nantayiskej vino itech nejin copa, nankiteixmatiltijtoskej ke toTekotsin momikilij hasta keman yejua ualas.
27 Yejua ika, akin kikuas pantsin uan tayis vino itech icopa toTekotsin maski amo kinamiki, motajtakolmaka porin amo kitakachiujtok* inakayo uan iesyo toTekotsin.
28 Maj achto kiyekita iyolo, para kiyekmatis ox tein kichiujtok kuali yetok uan sayoj ijkuak uelis kikuas pantsin uan tayis vino.
29 Porin akin takua uan tatayi uan amo kiita ke nejon kiixnextia inakayo toTekotsin, motanilijtok maj kitatsakuiltikan.
30 Yejua ika namiakej amo nanchikaujkej uan namokokouaj uan namiakej namomikilijkejya.*
31 Sayoj ke, komo tejuan tikyekitaskiaj keniuj yekmelauj titamatij, Dios amo kiixtaliskia ke amo kuali tein tikchiujtokej.
32 Sayoj ke keman Jehová* kiixtalia ke amo kuali tein tikchiujtokej, techtakaualtia para maj amo techtatsakuilti iniuan oksekin.
33 Yejua ika nokniuan, keman namosentiliskej para nankikuaskej nejon takual, ximochiakan hasta maj nochin ajsikan.
34 Komo aksa mayana, maj takua ichan, para maj Dios amo kiixtali ke moneki maj namechtatsakuilti keman namosentiliskej. Sayoj ke okseki taman tein poliui, nikyektalis keman ompa niajsis.
Tajtolmelaualismej
^ Itech griego, “itsontekon”.
^ Oso “mokuatakentia”, “mokuatsakua”.
^ Oso “mokuaxijximaskia”.
^ Oso “akin”, “akaj”.
^ Oso “kixiniskej”.
^ Oso “amo kipoujkaitstok”.
^ Itech griego, “nankochkejya”. Nesi ke kijtosneki ke kikaujkajya Dios.
