1 Corintios 4:1-21
4 Nochin moneki techitaskej kemej tekitinij akin techixyekana Cristo uan kemej tayekankatakeualmej akin kinkauilijkej tein Dios amo kitematiltijtoya.*
2 Sayoj ke, tayekankatakeual moneki kiyekchiuas itekiuj.
3 Amo semi nechtekipachoua maj namejuan oso tamelauanij kiixejekokan ox tein nikchiua kuali yetok oso amo kuali yetok. Tein melauj nion nejua nikixejekoua nejon.
4 Porin nikmattok ke amo nikchiujtok nion teyi tein amo kuali. Sayoj ke amo nikijtosneki ke niyolmelauak, porin sayoj Jehová* kiixejekoua ox tein nikchiua kuali yetok oso amo kuali yetok.
5 Yejua ika, amo teyi xikixejekokan achto ke ejkos tonal, ta ximochiakan hasta keman ualas toTekotsin. Yejua kichiuas maj monexti tein yetok tayouayan uan kichiuas maj momati tein nochin kiyolnemiliaj. Ijkuak, Dios kiueyitalis sejse kemej kinamiki.
6 Nokniuan, nikuik notokay uan no ika nitajtoj Apolos para namechnextilis toni ika nitajtojtok uan ijkon namechpaleuis xikmatikan nejin: “Sayoj xikchiuakan tein ijkuiliujtok”. Ijkon amo namoueyimatiskej* uan amo nankipaleuiskej se uan nankiixnamikiskej okse.
7 Porin ¿akoni kichiua okachi xiueyichiujkej ke oksekin? Tein melauj, ¿amo Dios mitsmakak nochi tein tikpia? Komo yejua mitsmakak nochi, ¿keyej timoueyimattinemi* kemej yeskia amo teyi mitsmakak?
8 ¿Nankipiajya nochi tein nankinekij? ¿Amo teyi namechpolouaok? ¿Nanpeujkejya nantekiuajtij? Yekmelauj niknekiskia xipeuanijya xitekiuajtikan, para maj tejuan no titekiuajtikan namouan.
9 Porin niknemilia ke tejuan titatitanilmej, Dios techualkuik para maj nochin techitakan kemej akin ixyetok kinmiktitij keman tatamitiya. Porin timochiuanij kemej akin kinixpetaniaj miakej uan ángeles.
10 Techitaj ke amo tiyektanemiliaj porin tiktojtokaj Cristo, sayoj ke namejuan nanyektanemiliaj porin nankitojtokaj Cristo; tejuan amo tichikaujkej, sayoj ke namejuan nanchikaujkej; namejuan namechtakachiuaj* sayoj ke tejuan techixtopeuaj.
11 Hasta nejin tonal tiksentokaj amo tikpiaj tein tikuaskej uan tein titayiskej, uan amo semi tikpiaj tein timotaliliskej,* techteuiaj, amo tikpiaj tochan
12 uan chikauak titekitij. Keman techuijuikaltiaj,* kualtsin titanankiliaj; keman techtajyouiltiaj, titaxikouaj ika nejmachkayot;
13 keman techtakajkayauiliaj, kualtsin tikinnojnotsaj. Hasta axkan, nochin techitaj kemej tajsol, uan kemej tein kitamotajya.
14 Amo namechijkuilouilijtok nejin para namechpinaujtis, ta para namechyolmajxitis kemej yeskia nannokoneuan akin nikintasojta.
15 Porin maski namejuan nankinpiaskej 10 mil tamachtianij akin namechnextiliaj keniuj nankitojtokaskej Cristo, tein melauj amo miakej namotatuan. Sayoj ke nimochiuak namopaj porin namechixmatiltij kuali tanauatilmej* tein ika tajtoua Cristo Jesús.
16 Yejua ika namechtataujtia xikchiuakan kemej nejua.
17 Yejua ika namechtitanilia Timoteo, porin yejua nokoneuj akin niktasojta uan kitekitilijtok toTekotsin ika nochi iyolo. Yejua namechelnamiktis keniuj nikchiua seki taman para niktekitilis Cristo Jesús, ijkon kemej nejua nikinmachtijtinemi tokniuan itech sejse nechikol.
18 Sekin kinemiliaj ke amo namechitatiuj uan yejua ika semi moueyimatij.*
19 Sayoj ke, komo Jehová* kineki, amo uejkaua namechitatiuj. Nikneki nikinitas nejon akin semi moueyimatij, amo para nikmatis tein kijtojtokej, ta para nikmatis ox kipiaj ichikaualis Dios.
20 Porin iTaixyekanalis Dios amo monextia ika tein tikijtouaj, ta ika ichikaualis Dios.
21 ¿Toni nankinekij? ¿Maj namechkalpanoti ika se takot, oso maj niknexti ke namechtasojta uan maj namechyemankanojnotsa?
Tajtolmelaualismej
^ Xikonita tein Dios amo kitematiltijtoya.
^ Oso “amo namoueyinekiskej”.
^ Oso “timoueyinektinemi”.
^ Oso “namechpoujkaitaj”.
^ Itech griego, “tixipetstikej (tixitatstikej)”.
^ Oso “techtejtelchiuaj”.
^ Oso “tajtolmej”.
^ Oso “moueyinekij”.
