1 Juan 4:1-21
4 Nokniuantsitsin, amo xikneltokakan nion se tamachtilis* tein nesi ke Dios kitemaka, ta achto xikyekitakan ox yekmelauj Dios kitemaka, porin nikan taltikpak neskejya miakej tanauatianij akin amo melaujkej.
2 Uelis nankimatiskej ox se tamachtilis yekmelauj Dios kitemaka komo kinextia ke Jesucristo nemiko kemej takat.
3 Sayoj ke komo se tamachtilis amo kinextia ke Jesús nemiko kemej takat, nejon tamachtilis amo yekmelauj Dios kitemaka. Nejon itamachtilis akin kiixnamiki Cristo, akin namejuan nankimatij ke ualaskia uan yetokya nikan taltikpak.
4 Nokoneuantsitsin, namejuan namechixyekana Dios uan nankintankej nejon takajkayauanij, porin akin namechpaleuijtok okachi chikauak ke akin kinpaleuijtok akin nemij nikan taltikpak.
5 Nejon takajkayauanij pouij nikan taltikpak; yejua ika, kijtouaj tein nikan taltikpak kinemiliaj uan yejuan kintajtolkakij.
6 Tejuan techixyekana Dios. Akin kiixmati Dios, techkaki; akin Dios amo kiixyekana, amo techkaki. Ijkon tikyekmatij katiyejua tamachtilis tein melauak uan katiyejua tein amo melauak.
7 Nokniuantsitsin, maj tiksentokakan timotasojtakan se iuan okse, porin Dios yejua akin achto tetasojtak, uan akin tetasojta, ikoneuj Dios uan kiixmati Dios.
8 Akin amo tetasojta amo kiixmati Dios, porin Dios yejua tetasojtalis.
9 Dios technextilij ke techtasojta ijkuin: Dios kiualtitanik nikan taltikpak iKoneuj akin yojtsin para maj itechkopa, tejuan ueli tinemikan.
10 Dios kiualtitanik iKoneuj para techkixtilis totajtakoluan uan para oksepa uelis timouikaskej iuan Dios.* Yejua kichiuak nejin porin techtasojtak uan amo porin tejuan tiktasojtakej.
11 Nokniuantsitsin, komo Dios ijkon techtasojtak, tejuan no moneki timotasojtaskej se iuan okse.
12 Amo keman akaj kiitani Dios. Komo tiksentokaj timotasojtaj se iuan okse, Dios kisentoka touan yetok uan senkis kinextia ke techtasojta.
13 Nejin kinextia ke tiksentokaj iuan tipouij uan ke yejua touan poui: porin yejua techmakak ichikaualis.
14 Uan no tejuan tikitakej ke toTajtsin kiualtitanik iKoneuj maj kinmakixtiki akin nemij nikan taltikpak, uan yejua nejon tein tikteixmatiltiaj.
15 Komo aksa* kijtoua ika nochi iyolo ke Jesús yejua iKoneuj Dios, Dios kisentoka iuan poui uan yejua kisentoka poui iuan Dios.
16 Uan tejuan tikmatij ke Dios techtasojta uan tikneltokaj nejon.
Dios yejua tetasojtalis, uan akin kisentoka tetasojta kisentoka poui iuan Dios, uan Dios kisentoka iuan poui.
17 Ijkon tiknextiaj ke senkis titetasojtaj, para maj itech tonal keman Dios taixejekos amo teyi techtsakuili titajtoskej, porin nikan taltikpak tejuan titamatij kemej Cristo.
18 Akin tetasojta amo moui. Komo senkis titetasojtaj amo timouij, porin komo timouij techtsakuilia maj tikchiuakan tein ueliskia tikchiuaskej. Tein melauj, akin moui amo senkis tetasojta.
19 Tejuan titetasojtaj porin yejua achto techtasojtak.
20 Komo aksa kijtoua, “Nejua niktasojta Dios” sayoj ke kitauelita iikniuj, takajkayaujtok. Porin akin amo kitasojta iiknitsin akin kiitstok, amo uelis kitasojtas Dios, akin amo ueli kiita.
21 Yejua techmakak nejin tanauatil: ke akin kitasojta Dios maj no kitasojta iiknitsin.
Tajtolmelaualismej
^ Tajtol griego, pnéuma. Xikonita chikaualis.
^ Xikonita Ueyi tonal keman kintapojpoluiayaj.
^ Oso “akin”, “akaj”.
