1 Tesalonicenses 1:1-10
1 Nejua Pablo, nietok iuan Silvano* uan no iuan Timoteo. Namechtitanilia nejin amatajkuilol namejuan tokniuan akin nanpouij iuan toTajtsin Dios uan toTekotsin Jesucristo ompa Tesalónica:
Maj Dios namechmaka tatiochiualis tein amo technamiki uan maj namechpaleui kuali iuan ximouikakan.
2 Nochipa tiktasojkamatiliaj Dios keman tamechelnamikij nanochin itech tonetataujtiluan,
3 porin iixpan toTajtsin Dios nochipa tikelnamikij tekit tein nankichiuaj porin nantakuaujtamatij uan nantetasojtaj, uan keniuj nantaxikouaj porin nantakuaujtamatij iuan toTekotsin Jesucristo.
4 Nokniuan akin Dios namechtasojta, tikmatij ke yejua namechijitak,*
5 porin kuali tanauatilmej* tamechixmatiltijkej amo sayoj ika tein tamechiluijkej, ta no Dios techpaleuij ika ichikaualis uan tikyekmatiaj ke tein tamechiluiayaj katka melauak uan nejon semi namechpaleuij. Uan namejuan nankimatij tein tikchiujkej para tamechpaleuiskej.
6 Uan no, namejuan nankichiujkej kemej toTekotsin uan kemej tejuan, porin maski semi nantajyouijtoyaj, ika yolpakilis tein Dios kitemaka ika ichikaualis namejuan nankineltokakej itajtol.
7 Ijkon nochin taneltokanij akin yetokej Macedonia uan Acaya, peujkej kichiuaj ijkon kemej namejuan.
8 Tein melauj, amo sayoj nankiteixmatiltianij itajtol Jehová* ompa Macedonia uan Acaya ta itech nochi xolalmej, uan no miakkan momati ke semi nantakuaujtamatij iuan Dios, yejua ika amo monekiok tamechiluiskej teisa.
9 Porin yejuan kisentokaj ika tajtouaj keman timoixmatkej uan keniuj namejuan nankinixtopeujkej namotatadiosuan* uan peujkej nankitekitiliaj Dios akin melauak uan nochipa yoltok
10 uan no nankichixtokej* maj uiki de ne iluikak iKoneuj, akin yejua kichiuak maj oksepa nemi,* Jesús akin techmakixtis keman Dios kinextis iueyi kualanyo tein amo uejkaua kinextiti.
Tajtolmelaualismej
^ No monotsa Silas.
^ Oso “namechixpejpenak”.
^ Oso “tajtolmej”.
^ Oso “namotiotsitsin”.
^ Oso “nankichatokej”.
^ Itech griego, “kiajokuik”.
