1 Tesalonicenses 4:1-18
4 Uan axkan nokniuan, tamechnextilijkejya keniuj moneki nanemiskej para nankiyolpaktiskej Dios, uan ijkon nankichiujtokej. Sayoj ke axkan tamechyoleuaj uan tamechtataujtiaj itokaykopa toTekotsin Jesús okachiok ijkon xikchiujtokan.
2 Namejuan nankimattokejya toni tamechnauatijkej itokaykopa toTekotsin Jesús.
3 Yejua nejin tein Dios kineki: xichipaujkanemikan uan amo xiauilnemikan.*
4 Nansejsemej moneki nankimatiskej keniuj nankikuiskej namonakayo para nanyeskij nanchipaujkej iixpan Dios uan nankiyolpaktiskej,*
5 uan amo nankichiuaskej kemej akin amo kiixmatij Dios, porin yejuan kitelnejnektokej motekaskej iuan aksa* uan amo keman ixuij.
6 Maj amo akin kichiuili iikniuj tein amo kuali nion maj ika mauilti ijkon, porin Jehová* kintatsakuiltis akin kichiuaj nochi nejin tajtakolmej, ijkon kemej tamechiluijkejya uan tamechnejmachtijkej.
7 Porin Dios amo technotsak para maj tikchiuakan tein pitsotik, ta para maj tichipaujkej.
8 Yejua ika, akin kiixtopeua nejin tamachtilis, amo techixtopeujtok tejuan, ta Dios, akin namechmaka ichikaualis.
9 Sayoj ke, amo moneki maj tamechijkuilouilikan ke moneki namotasojtaskej kemej yeskia naniknimej, porin Dios namechmachtijtok ximotasojtakan se iuan okse.
10 Tein melauj, nankintasojtajya nochin tokniuan akin moajsij Macedonia. Sayoj ke nokniuan, tamechyoleuaj okachi xitetasojtakan.
11 Ijkon kemej tamechnauatijkej, xikixtalikan nanyolseujkanemiskej, amo namokalakijtinemiskej kampa amo namotekiuj uan nantekitiskej,
12 para maj akin amo taneltokaj kiitakan ke namejuan nanchipaujkanemij uan para maj amo teyi namechpolo.
13 Uan no nokniuan, tiknekij xikmatikan tein kinpanos akin momikilijkejya,* para amo xitayokoyakan kemej akin amo kichiaj tein kuali.
14 Porin komo titakuaujtamatij ke Jesús momikilij uan oksepa nemik,* no titakuaujtamatij ke Dios no kinuikas iuan akin momikilijkejya* uan amo kikaujkej* Jesús.
15 Tein axkan tamechiluiaj, yejua tein Jehová* kijtoua: akin tiyoltoskejok keman toTekotsin mokepasya* amo tikinyekanteuaskej akin momikilijkejya;*
16 porin toTekotsin ualpantemos de ne iluikak ika se tanauatil,* uan tajtos kemej akin kinixyekana ángeles uan maaktiualas itrompeta Dios, uan itatojtokakauan Cristo akin momikilijkejya, achto oksepa nemiskej.*
17 Satepan, akin tiyoltoskejok uan timokauaskejok, techkuiteuaskej mixtsalan para iniuan tietoskej uan iuan timonamikiskej toTekotsin ne ejekaixko, uan ijkon nochipa tietoskej iuan toTekotsin.
18 Yejua ika, xiksentokakan ximoyolseuijtokan se iuan okse ika nejin tajtolmej.
Tajtolmelaualismej
^ Tajtol griego, pornéia. Xikonita auilnemilis.
^ Oso “oksekin namechtakachiuaskej”.
^ Oso “akin”, “akaj”.
^ Itech griego, “kochtokej”.
^ Itech griego, “moajokuik”.
^ Itech griego, “kochkejya”.
^ Oso “itechkopa”.
^ Tajtol griego, parousía. Xikonita keman Cristo mokepasya.
^ Itech griego, “kochkejya”.
^ Oso “chikauak tajtol”.
^ Itech griego, “moajokuiskej”.
