2 Samuel 18:1-33
18 David kinpouak takamej akin iuan yetoyaj uan kinxejxeloj mijmil uan ciejcien. No kinixtalij seki takamej maj kinixyekanakan.
2 Uan David exkan kinxejxeloj takamej akin iuan yetoyaj. Uan kinixtalij maj kinixyekanakan Joab, Abisái iokichpil Zeruyá uan Ittái akin kayot Gat. Abisái katka iikniuj Joab. Tekiuaj no kiniluij: “Nejua no nias nitateuitiuj namouan”.
3 Sayoj ke takamej kiluijkej: “Amo touan xiouj, porin yejuan amo kinkuejmolos komo tejuan ticholouaj oso tajko de nochin akin titateuitij timikij. Amo tejuan techtemouaj, ta tejua, porin komo mitsmiktiaj kemej yeskia kinmiktiskiaj 10 mil takamej. Okachi kuali ximokaua itech ueyi xolal uan xitechtitanili tein monekis”.
4 Tekiuaj kiniluij: “Nikchiuas tein nankijtouaj”. Yejua ika tekiuaj moketsato puertajtenoj den ueyi xolal uan nochin takamej kistiajkej ijkon kemej kinxejxelojka. Kistiajkej de ciejcien uan mijmil.
5 Tekiuaj no kinauatij Joab, Abisái uan Ittái: “Amo teyi xikchiuilikan Absalón porin yejua nokonetsin”. Uan nochin takamej kikakkej tein tekiuaj kinnauatij.
6 Nochin isoldados David yajkej kalampakopa den ueyi xolal para moteuiskej iniuan israelitas akin kipaleuiayaj Absalón. Uan moteuijkej koujtaj kampa kintaxejxelouilijkaj ikoneuan Efraín.
7 Isoldados David kintankej israelitas akin kipaleuiayaj Absalón uan tel miakej kinmiktijkej. Nejon tonal kinmiktijkej 20 mil takamej.
8 Uan miakkan momoyaujkej* keman moteuijtoyaj. Uan no, maski miakej kinmiktijkej ika machete tein ojkan tenej,* okachi miakej mikkej koujtaj.
9 Absalón moixnamikito iniuan isoldados David. Yejua yaya itech imula uan keman kinitak cholojteuak. Sayoj ke imula panotikisak itampa se ueyi kouit tein tel makoujyoj. Uan Absalón ompa mokuaijilpij* uan mopiloj* porin imula kisentokak motaloj.
10 Se soldado kiitak Absalón uan kiluito Joab: “Yekin nikitak Absalón pilkatok itech se ueyi kouit”.
11 Joab kiluij soldado: “¿Uan keyej amo tikmiktij komo tikitak? Komo tikmiktiskia nimitsmakaskia 100 gramos* de plata uan se cinturón”.
12 Sayoj ke soldado kiluij Joab: “Ipa amo nikmiktiskia iokichpil tekiuaj maski nechmakaskiaj* 11 kilos uan tajko* de plata. Tejuan tikakkej keman tekiuaj mitsnauatij maj amo teyi tikchiuilikan Absalón porin ikonetsin, uan no kinnauatij Abisái uan Ittái.
13 Komo nikmiktiskia amo niktakamatiskia tekiuaj uan ipa amo ueliskia niktatilis* ke nikmiktij iokichpil. Uan tejua amo tinechpaleuiskia maj tekiuaj amo teyi nechchiuili”.
14 Keman Joab kikakik nejon, kiluij: “¡Nenkajsan nimitsnojnotstok!”. Joab kikuik eyi koujmej tein puntajyejkej* uan kitokilij Absalón iyolixko.* Absalón pilkatoya itech imakoujyo ueyi kouit uan yoltoyaok keman Joab kichiuak nejon.
15 Satepan ajsikej majtakti takamej akin kimamaliayaj Joab tein ika tateuiaya. Yejuan motokijkej kampa yetoya Absalón uan kimagakej hasta ke kimiktijkej.
16 Joab kipitsak kuaomit para maj amo moteuianijok uan soldados amo kintokatiajkejok israelitas akin kipaleuiayaj Absalón.
17 Satepan kipantamotkej Absalón itech se talkoyok tein yetoya koujtaj uan ompa kipantalilijkej miak tet. Uan nochin israelitas akin kipaleuiayaj Absalón cholojkej uan mokepkej ininchan.
18 Keman Absalón nemiaok, tanauatij maj kiketsakan se ueyi tet itech tal tamanis* tein iaxka tekiuaj. Absalón moluiaya: “Amo nikpia nion se nokoneuj para maj niktokayti kemej nejua uan maj amo ixpoliui notokay”. Yejua ika nejon ueyi tet kitokaytij Absalón. Hasta axkan moixmati kemej tet tein kiketsak Absalón.
19 Ahimáaz iokichpil Sadoc kiluij Joab: “Nimitstataujtia xinechkaua maj nikiluiti tekiuaj tein panok, porin Jehová kimakixtij uan amo teyi kichiuilijkej akin kitauelitaj”.
20 Sayoj ke Joab kiluij: “Axkan amo tias tiktematiltitiuj teisa. Uelis tias okse tonal, sayoj ke axkan amo porin ikonetsin tekiuaj mikik”.
21 Uan Joab kiluij se takat akin kayot Cus:* “Xiouj xikiluiti tekiuaj tein tikitak”. Nejon takat cusita moixpiloj iixpan Joab uan tsikuinteuak.
22 Ahimáaz iokichpil Sadoc oksepa kiluij Joab: “Nimitstataujtia xinechkaua maj no nimotalo taikan den takat cusita, maski tein yeski nechpanos”. Sayoj ke Joab kiluij: “¿Keyej no tiasneki nokonetsin, ta amo onkakok toni tiktematiltis?”.
23 Maski Joab kiluij nejon, Ahimáaz kisentokak kitataujtij: “Xinechkaua maj niouj maski tein yeski nechpanos”. Yejua ika Joab kiluij: “Komo tiktelneki tias, xiouj”. Ahimáaz tsikuinteuak uan kikuik ojti tein panoua tal tamanis tein poui Jordán. Kemej ijsiujka motaloj, kipanauijtikisak takat cusita.
24 Ueyi xolal kampa yetoya David kipiaya ome puertas, se taijtikkopa uan okse kalampakopa. Uan David tokotsyetoya tatajko den ome puertas. Tajpixkej pankisak kalkuako,* ajkokopa den puerta. Nejon puerta pepechiujtoya iuan tepamit tein kiyoualoua ueyi xolal. Tajpixkej kiitak ke se takat iselti ualtsikuintoya.
25 Uan tajpixkej chikauak tsajtsik para kinauatis tekiuaj tein kiitstoya. Uan tekiuaj kiluij: “Komo iselti uitse kijtosneki ke techmatiltiki teisa”. Takat akin ualtsikuintoya ejkotoyaya ueyi xolal.
26 Satepan tajpixkej kiitak okse takat akin no ualtsikuintoya, uan chikauak kitsajtsilij akin tajpixtoya puertajtenoj: “¡Okse takat iselti ualtsikuintok!”. Tekiuaj kijtoj: “Nejin takat no techmatiltiki teisa”.
27 Tajpixkej kijtoj: “Takat akin ualtayekana tsikuini kemej Ahimáaz iokichpil Sadoc”. Yejua ika tekiuaj kijtoj: “Ahimáaz se takat yolkuali, xa techmatiltiki teisa tein kuali”.
28 Uan Ahimáaz chikauak kiluij tekiuaj: “¡Titatankej!”. Satepan motankuaketsak uan moixpiloj hasta talpan uan kiluij tekiuaj: “Noteko, maj tikueyitalikan toDios Jehová akin mitspaleuij xikintani takamej akin mitsixnamikiaj”.
29 Sayoj ke tekiuaj kitajtanij:* “¿Kuali yetok nokonetsin Absalón?”. Ahimáaz kiluij: “Keman Joab nechualtitanik maj nimitsitaki uan no kiualtitanik okse motakeual, nikitak ke miakej mosentilijtoyaj, sayoj ke amo nikmatik keyej”.
30 Tekiuaj kiluij: “Ximoketsaki nonakastan”. Uan Ahimáaz moketsato inakastan.
31 Satepan kisako takat cusita uan kijtoj: “Notekiuaj, nimitsmatiltiko tein mochiuak. Axkan Jehová mitspaleuij xikintani takamej akin mitsixnamikiaj”.
32 Sayoj ke tekiuaj kitajtanij takat cusita: “¿Kuali yetok nokonetsin Absalón?”. Takat kinankilij: “Notekiuaj, maj nochin akin mitstauelitaj uan nochin akin mitsixnamikkej no mikikan kemej Absalón”.
33 Keman tekiuaj kikakik nejon, fiero kimatik. Yejua pankisak kalkuako kampa yetoya se cuarto ajkokopa den puerta uan peuak choka. Peuak nenemi uan kijtojtiaya: “¡Nokonetsin Absalón! ¡Nokonetsin! ¡Nokonetsin Absalón! ¡Maj nejua nimikini uan amo tejua! ¡Nokonetsin Absalón, nokonetsin!”.
Tajtolmelaualismej
^ Oso “moxinijkej”.
^ Oso “espada”.
^ Oso “mokuatsikoj”.
^ Itech hebreo, “mopiloj ejekaixko”.
^ Oso “majtakti siclo”.
^ Itech hebreo, “nomakoya niktamachiujtoskia”.
^ Oso “mil siclos”.
^ Oso “nikcholtilis”.
^ Itech hebreo, “koujtakot”.
^ Itech hebreo, “itech iyolo”.
^ Oso “takomol”.
^ Oso “Etiopía”.
^ Oso “kitajtoltij”.
^ Oso “kaltipan”, “kalpani”.
