2 Samuel 4:1-12
4 Is-Bóset iokichpil Saúl semi mouik keman kikakik ke kimiktijkaj Abner ompa Hebrón. Uan nochin israelitas semi motekipachojkej.
2 Ome takamej kitekitiliayaj Is-Bóset, se monotsaya Baaná uan okse Recab. Yejuan kinixyekanayaj seki tachtekinij. Inintat Baaná uan Recab katka Rimón akin kayot Beerot uan pouiaj iniuan ikoneuan Benjamín. (Ueyi xolal Beerot no yetoya kampa kintaxejxelouilijkaj ikoneuan Benjamín.
3 Akin nemiaj Beerot cholojkej uan yajkej Guitaim uan ompa nemij hasta axkan maski amo ompa kayomej).
4 Jonatán iokichpil Saúl kipiaya se iokichpil akin monotsaya Mefibóset. Keman Mefibóset kipiaya makuil xiuit, seki takamej akin ualeujkaj Jezreel kitematiltikoj ke Saúl uan Jonatán mikkaj. Siuatsin akin kiiskaltijtoya Mefibóset kinapalojteuak uan choloj. Sayoj ke kemej semi moujtoya uan motalojtoya kimapetskoj uan okichpiltsin semi mometskokoj. Yejua ika amo uelikok nejnemik.*
5 Se tonal, Recab uan Baaná ikoneuan Rimón akin kayot Beerot, yajkej ichan Is-Bóset. Yajkej nepantaj keman semi tonaya uan Is-Bóset tepitsin moseuijtoya.
6 Recab uan Baaná kalakkej ichan Is-Bóset kemej yeskia kikuitoj trigo. Sayoj ke keman ompa yetoyajya kipoxtokilijkej ininmachete tein ojkan tenej* uan cholojteujkej.
7 Keman kalakkej ichan Is-Bóset, yejua yetoya kampa kochia uan uetstoya itech icama. Kipoxtokilijkej ininmachete uan mikik, satepan kikechkotonkej uan kikuiteujkej itsontekon. Nochi youal nejnenkej itech ojti tein ajsi Arabá.
8 Recab uan Baaná ajsikej Hebrón kampa yetoya David. Yejuan kiuikilijkej itsontekon Is-Bóset uan kiluijkej: “Timitsualkuilijkej itsontekon Is-Bóset iokichpil Saúl, akin mitstauelitaya uan kinekia mitsmiktis. Noteko, nejin tonal Jehová mitspaleuij xikintaxtaualti Saúl uan ikoneuan”.
9 Sayoj ke David kiluij Recab uan iikniuj Baaná, ikoneuan Rimón akin kayot Beerot: “Jehová, Dios akin nochipa yoltok uan akin nochipa nechpaleuij* keman nitajyouijtoya, kuali kimati ke melauj tein nimitsiluia.
10 Se takat nechiluiko ke Saúl mikik. Yejua kinemilij ke nikuelitaskia tein kichiuak uan ke niktaxtauiskia, sayoj ke nikitskij uan nikmiktij ompa Ziclag.
11 No ijkon nikinchiuilis akin kiichtakauitoj se takat kampa kochtoya uan kimiktijkej maski amo teyi kichiujka. Yejua ika namechtaxtaualtiti por tein nankichiujkej, namechixpoloti porin nankimiktijkej”.
12 David kinnauatij isoldados maj kinmiktikan Recab uan Baaná. Kinmakojkotonkej uan kinmetskojkotonkej uan kinpilojkej tanakastan den ueyi talkoyok kampa kisentiliaj at tein yetok Hebrón. Uan itsontekon Is-Bóset kitokatoj Hebrón kampa kitokkaj Abner.
