2 Samuel 6:1-23
6 David oksepa kinsentilij soldados israelitas akin okachi kuali tateuiayaj. Katkaj 30 mil.
2 Satepan, David uan nochin takamej akin iuan yetoyaj yajkej Baale-Judá kikuitoj tatiochiualkaxon* tein iaxka toTajtsin Dios para kipankixtiskej. Nochin israelitas yayaj kampa yetoya tatiochiualkaxon para kiueyichiuaskej itokay Jehová, Dios akin kinixyekana iangeluan uan tokotsyetok tapani* den querubines.
3 Tatiochiualkaxon tein iaxka toTajtsin Dios yetoya ichan Abinadab akin nemia itech se tepetsin. Keman kiuikakej, kitejkoltijkej* itech se carreta tein yankuik. Uzá uan Ahió ikoneuan Abinadab kiuikayaj nejon carreta.
4 Desde ichan Abinadab kiuikakej tatiochiualkaxon tein iaxka toTajtsin Dios, uan Ahió tayekantiaya.
5 David uan nochin israelitas kiiluichiuilijtiayaj Jehová. Yejuan mijtotijtiayaj uan cantarojtiayaj. Kitsotsontiayaj arpas, cítaras* uan miak taman tein chijchiujtoya ika enebrojkouit. No kitsilinijtiayaj tambortsitsin,* kitsetselojtiayaj sistros* uan kikakistiltijtiayaj címbalos.*
6 Sayoj ke keman ajsitoj ital Nacón kampa kichipauayaj xinach, Uzá kikitskij tatiochiualkaxon tein iaxka toTajtsin Dios porin kuakuejmej yaya kitsonkepatij.
7 Uan Jehová tel kualanik iuan Uzá uan niman kimiktij porin tajtakolchiuak. Uzá mikik inakastan tatiochiualkaxon tein iaxka toTajtsin Dios.
8 Sayoj ke David kualanik porin Jehová kualanik iuan Uzá uan kimiktij. Uan ompa kampa momikilij Uzá tatokaytijkej Pérez-Uzá* uan ijkon moixmati hasta axkan.
9 Uan nejon tonal David kimouilij Jehová uan kijtoj: “Ijkon amo uelis nikualkuis tatiochiualkaxon tein iaxka Jehová”.
10 David amo kinekik kiualkuis tatiochiualkaxon tein iaxka Jehová kampa yejua nemia, itech ueyi xolal tein iaxka David, ta tanauatij maj kiuikanij ichan Obed-Edom akin kayot Gat.*
11 Tatiochiualkaxon tein iaxka Jehová yetoya eyi metsti ichan Obed-Edom akin nemia Gat, uan Jehová semi kitatiochiuiaya Obed-Edom uan nochin akin nemiaj ichan.
12 Seki takamej kiluitoj tekiuaj David: “Kemej tatiochiualkaxon tein iaxka toTajtsin Dios yetok ichan Obed-Edom, Jehová semi kintatiochiuiani nochin akin nemij ichan uan kichiuani maj momiakili nochi tein kipia”. Uan David yajki ichan Obed-Edom uan semi yolpaktiaya. Kikuito tatiochiualkaxon tein iaxka toTajtsin Dios para kipankixtis hasta ueyi xolal tein iaxka David.
13 Keman akin kimamajtiayaj tatiochiualkaxon tein iaxka Jehová tepitsin nejnenkej,* David kimaktilij Dios se kuakouej uan se tapial tein tomauak.
14 David semi yolpakia, yejua ika mijtotiaya uan momamalakachouaya para kiueyichiuas Jehová. Yejua motalilijka se koton tein kiluiaj efod* tein chijchiujtoya ika lino.
15 David uan nochin israelitas kiualkuiaj tatiochiualkaxon tein iaxka Jehová uan ajkotsajtsitiualayaj keman ualpankistiayaj porin semi yolpakiaj. No mokakia kuaomit tein kipitstiualayaj.
16 Keman tatiochiualkaxon tein iaxka Jehová kiejkoltijkej itech ueyi xolal tein iaxka David, Mical iichpoch Saúl pantachixtoya desde iventana. Keman kiitak ke tekiuaj David mijtotijtiualaya, ajkotsikuintiualaya uan momamalakachojtiualaya para kiueyichiuas Jehová, peuak kitauelita.
17 David kichijchiujka se kaltsin* para ompa kitalis tatiochiualkaxon tein iaxka Jehová. Yejua ika ompa kitalijkej tatiochiualkaxon. David kichichinouilij Jehová tapialmej uan kimaktilij okseki taman para sentakuaskej,* uan Dios kiitstoya tein kichiujtoya.
18 Keman David kitamichichinouilij Dios nejon tapialmej uan kimaktilij okseki taman para sentakuaskej, kitajtanij Jehová akin kinixyekana iangeluan maj kintatiochiui israelitas.
19 Uan no kinmajmakak nochin takamej uan siuamej israelitas se pantsin youaltik, se taxkaltsin tein chijchiujtoya ika dátiles* uan se taxkaltsin tein chijchiujtoya ika pasas. Satepan, nochin yajkej ininchan.
20 Keman David mokepak ichan para kitataujtis Dios maj no kintatiochiui ichankauan, Mical akin katka iichpoch Saúl kinamikito uan kiixiluij: “Semi timopinaujtij axkan. Timokixtilij motasal ininixpan siuamej akin kintekitiliaj motakeualuan. Tikchiuak ijkon kemej kichiua aksa* akin kuatapolojtok maski tejua titekiuaj”.
21 Uan David kiluij Mical: “Nimijtotijtoya uan nicantarojtoya porin nikueyichiujtoya Jehová. Yejua nechijitak para maj nikinixyekana israelitas akin pouij itech ixolal Jehová, uan kiixtopeuak mopaj uan ichankauan. Yejua ika nimijtotis uan nicantaros para nikueyichiuas Jehová.
22 Uan nikchiuas okseki taman tein okachi tepinaujtij, porin nejua amo teyi nichiujkej. Sayoj ke siuamej akin ininka titajtoj nechueyitaliskej”.
23 Uan Mical akin katka iichpoch Saúl amo keman kinpiak konemej.
Tajtolmelaualismej
^ Xikonita tatiochiualkaxon.
^ Oso xa “tatajko”.
^ Oso “kipankixtijkej”.
^ Nejin tein ika tatsotsonayaj chijchiujtoya ika kouit uan kitaliliayaj cuerdas.
^ Oso “panderetas”.
^ Nejin tein ika tatsotsonayaj chijchiujtoya ika teposmej tein tsitsilikayaj kemej se sonaja.
^ Nejin tein ika tatsotsonayaj katkaj ome uejueyi teposmej tein yojyoualtikej.
^ Tokayit tein kijtosneki ‘ojti kampa kitatsakuiltijkej Uzá’.
^ Nikan xa ika motajtojtok Gat-Rimón.
^ Itech hebreo, “chikuasenpa taksakej (tatejteliksakej, tatsojtsoniksakej)”.
^ Nejin kaltsin chijchiujtoya ika tasal.
^ Nejin takilot motemaka itech se kouit tein tamati kemej palmajkouit.
^ Oso “akin”, “akaj”.
